ସୁବର୍ଣ୍ଣପୁର: କଲେଜ ଛାତ୍ରୀଙ୍କୁ ଅସଦାଚରଣ ସହ ମରଣାନ୍ତକ ଆକ୍ରମଣ । ଆକ୍ରମଣକାରୀ ଯୁବକ ଘଟଣାସ୍ଥଳରୁ ଫେରାର । ଏଭଳି ଘଟଣା ଘଟିଛି ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ରାମପୁର ଥାନା ସାନ ଭାଳୁପାଲି ଗାଁରେ ।
ଶନିବାର ରାମପୁର ମହିଳା କଲେଜର ଜଣେ ଛାତ୍ରୀ ନିଜଘର ସାନ ଭାଳୁପାଲି ଗାଁକୁ ଫେରୁଥିବା ସମୟରେ ଜଣେ ଯୁବକ ଛାତ୍ରୀ ଜଣଙ୍କୁ ଏକୁଟିଆ ଦେଖି ପ୍ରଥମେ ଅସଦାଚରଣ କରିବା ସହ ଟଣା ଓଟରା କରିଥିଲା । ଛାତ୍ରୀ ଜଣକ ବିରୋଧ କରିବାରୁ ଛାତ୍ରୀର ବେକକୁ ଦାରେ ହାଣିବାକୁ ଉଦ୍ୟମ କରିଥିଲା । ଛାତ୍ରୀ ଅଟକାଇବାରୁ ତାଙ୍କ ହାତର ଚାରୋଟି ଆଙ୍ଗୁଠି କାଟିବା ସହ ବେକରେ ଆଘାତ ଲାଗିଛି ।
ଛାତ୍ରୀ ଜଣକ କୌଣସି ମତେ ରକ୍ତ ଜୁଡୁବୁଡୁ ଅବସ୍ଥାରେ ଟାଙ୍ଗରକାର୍ଲେ ଗାଁକୁ ଖସି ଆସିଥିଲେ । କିଛି ଲୋକ ଛାତ୍ରୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପ୍ରଥମେ ରାମପୁର ଡାକ୍ତରଖାନାରେ ଭର୍ତ୍ତି କରିଥିଲେ । ତାଙ୍କ ଅବସ୍ଥା ଗୁରୁତର ହେବାରୁ ପରିବାର ଲୋକେ ଆସି ଡୁଙ୍ଗୁରିପାଲିରେ ଅଧିକ ଚିକିତ୍ସା ପାଇଁ ଭର୍ତ୍ତି କରିଥିଲେ ।
ପରେ ଛାତ୍ରୀଙ୍କ ଅବସ୍ଥା ସଙ୍କଟାପନ୍ନ ହେବାରୁ ବୁର୍ଲା ବୀର ସୁରେନ୍ଦ୍ର ସାଏ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ଏପଟେ ଯୁବକ ଜଣକର ପରିଚୟ ବର୍ତ୍ତମାନ ପର୍ଯ୍ୟନ୍ତ ମିଳିପାରିନାହିଁ । ଏନେଇ ଗତକାଲି ରାତିରେ ଛାତ୍ରୀର ମାମୁଁ ରାମପୁର ଥାନାରେ ଏକ ଲିଖିତ ଅଭିଯୋଗ କରିଥିଲେ । ରାମପୁର ଥାନାରେ ଏକ ମାମଲା ରୁଜୁ କରି ପୋଲିସ ତଦନ୍ତ କରୁଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
