ସୁବର୍ଣ୍ଣପୁର: ପୁଅର ଆକ୍ରମଣରେ ବାପର ମୃତ୍ୟୁ ହୋଇଥିବା ଘଟଣାରେ ପୋଲିସ ଅଭିଯୁକ୍ତ ପୁଅକୁ ଗିରଫ କରିବାରେ ସଫଳ ହୋଇଛି। ମୃତଦେହ ପୋତି ପୁଅ ଫେରାର ହେବାପରେ ଆଜି ଅଭିଯୁକ୍ତକୁ ଧରିବା ପାଇଁ ପୋଲିସ ଅଭିଯୁକ୍ତ ଘରେ ଚଢ଼ାଉ କରିଥିଲା। ବୀରମହାରାଜପୁର ଥାନା ଉଲୁଣ୍ଡା ବ୍ଲକ୍ ଅନ୍ତର୍ଗତ ମହଦା ପଞ୍ଚାୟତ ପାଲି ଗାଁର ଏହି ଘଟଣା ।
ଗାଁର ମୁରଲି ତସା ଓ ନାବାଳକ ପୁଅ ଇଟା ଗଢିବାକୁ ଯାଇଥିଲେ। ଭାଟି ଯାଗାରେ ଘରୋଇ କଳହକୁ ନେଇ ବାପ ପୁଅ ମଧ୍ୟରେ ତୀବ୍ର ଝଗଡା ହୋଇଥିଲା। ଏଥିରେ ପୁଅ ରାଗି ଯାଇ ଏକ ଶାବଳରେ ବାପାକୁ ଆକ୍ରମଣ କରିଥିଲା । ଘଟଣାସ୍ଥଳରେ ହିଁ ମୁରଲୀଙ୍କ ଜୀବନ ଚାଲିଯାଇଥିଲା । ଏହାପରେ ଗାଁର କିଛି ଲୋକଙ୍କ ସହାୟତାରେ ବାପାର ମୃତଦେହକୁ ପୁଅ ପୋତି ଦେଇଥିଲା ।
ଖବର ପାଇ ବୀରମହାରାଜପୁର ପୋଲିସ ପାଲି ଗାଁରେ ପହଞ୍ଚି ଅଭିଯୁକ୍ତ ଘରେ ଚଢ଼ାଉ କରି ତଦନ୍ତ କରିବା ସହିତ ଅଭିଯୁକ୍ତ ପୁଅକୁ ଗିରଫ କରିଛି । ଏହାସହ ମୃତଦେହ ପୋତିଥିବା ସ୍ଥାନକୁ ନେଇଛି । ତେବେ ପୋଲିସ ମୃତଦେହକୁ ମାଟି ତଳୁ ଖୋଳି ଉଦ୍ଧାର କରିବା ପାଇଁ ବ୍ୟବସ୍ଥା କରୁଛି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
