ସୁବର୍ଣ୍ଣପୁର: କଳକୀ ବେଶରେ ଭକ୍ତଙ୍କୁ ଦର୍ଶନ ଦେବେ ପାତାଳୀ ଶ୍ରୀକ୍ଷେତ୍ର ଭାବେ ପରିଚିତ ସୁବର୍ଣ୍ଣପୁରର ଶ୍ରୀ ବଡ ଜଗନ୍ନାଥ ଓ ଶ୍ରୀ ବଳଭଦ୍ର ମହାପ୍ରଭୁ ।
ବୁଧବାର ଶ୍ରୀ ବଡ ଜଗନ୍ନାଥ ଓ ଶ୍ରୀ ବଳଭଦ୍ର ବୁଦ୍ଧ ବେଶ ଧାରଣ କରି ଶ୍ରଦ୍ଧାଳୁମାନଙ୍କୁ ଦର୍ଶନ ଦେଇଥିଲେ । ସଂଧ୍ୟାରେ ବୁଦ୍ଧ ବେଶ ଦର୍ଶନ ପାଇଁ ଶ୍ରୀଗୁଣ୍ଡିଚା ମନ୍ଦିରରେ ଭକ୍ତମାନଙ୍କର ପ୍ରବଳ ସମାଗମ ହୋଇଥିଲା ।
ଅଗୁର, ଚନ୍ଦନ, କର୍ପୁର, ଧୂପ, ଦୀପ, ବିଭିନ୍ନ ପ୍ରକାରର ପୁଷ୍ପ ଓ ନୈବେଦ୍ୟରେ ମହକି ଉଠୁଥିଲା ଶ୍ରୀଗୁଣ୍ଡିଚା ମନ୍ଦିର । ଶ୍ରୀ ନୃସିଂହ ଦେବଙ୍କ ସହିତ ବେନି ଭାଇଙ୍କ ବେଶ ଓ ଦେବୀ ଶୁଭଦ୍ରାଙ୍କୁ ଦର୍ଶନ କରିବା ସହିତ ବିଭୂକୃପା ପାଇବାକୁ ସଂଧ୍ୟାରୁ ଭକ୍ତମାନଙ୍କର ଲମ୍ବାଧାଡି ଲାଗିଥିଲା
ଶୁକ୍ରବାର ଶ୍ରୀ ବଡ ଜଗନ୍ନାଥ ସ୍ବାମୀ ମନ୍ଦିର ପ୍ରତ୍ୟାବର୍ତନ ପାଇଁ ବାହୁଡା ଯାତ୍ରାରେ ବାହାରିବାକୁ ଥିବା ବେଳେ ଦେବୋତ୍ତର ବିଭାଗ ଓ ମନ୍ଦିର କମିଟି ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଆଜି ବେନି ଭାଇଙ୍କ କଳକୀ ବେଶ ଥିବାରୁ ଶ୍ରୀଗୁଣ୍ଡିଚା ଗୁଡିରେ ଭକ୍ତମାନଙ୍କର ପ୍ରବଳ ସମାଗମ ହେବା ଆଶା କରାଯାଉଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
