ସୁବର୍ଣ୍ଣପୁର: ବାଇକ ଦୁର୍ଘଟଣାରେ ଜଣେ ମୃତ୍ୟୁ, ଜଣେ ଗୁରୁତର । ଉଲୁଣ୍ଡା ସହରର ଲସ୍ତଲା ଗାଁର 35 ବର୍ଷୀୟ ବାବୁଲା ନାଏକଙ୍କ ମୃତ୍ୟୁ ହୋଇଛି । ବାଇକ ଆରୋହୀଙ୍କୁ ଗୁରୁତର ଅବସ୍ଥାରେ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି ।
ଗୁରୁବାର ବାବୁଲା ନାଏକ ରାସ୍ତା କଡରେ ଛିଡା ହୋଇଥିଲେ । ଉଦେପଦର ଗାଁର ଚରଣ ଭୋଇ ଭାରସାମ୍ୟ ହରାଇ ବାବୁଲା ନାଏକଙ୍କୁ ବାଇକରେ ବାଡେଇ ଥିଲେ । ଉଭୟଙ୍କୁ ଗୁରୁତର ଅବସ୍ଥାରେ ସଦର ମହକୁମା ହସ୍ପିଟାଲରେ ଭର୍ତ୍ତି କରାଯାଇଥିଲା । ବାବୁଲା ନାଏକଙ୍କ ମୃତ୍ୟୁ ହୋଇଥିବାବେଳେ ଗୁରୁତର ଅବସ୍ଥାରେ ବାଇକ ଆରୋହୀକୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି ।
ସେପଟେ, ହସ୍ପିଟାଲ ପରିସରରେ ମୃତକଙ୍କ ପରିବାର ଯୋଗୁଁ ଉତ୍ତେଜନା ଦେଖାଦେଇଥିଲା । ବାଇକ ଆରୋହୀକୁ ମାରପିଟ କରିବାକୁ ଗଣ୍ଡଗୋଳ କରିଥିଲେ । ଏନେଇ ପୋଲିସ ଡାକ୍ତରଖାନାରେ ପହଞ୍ଚି ସୁରକ୍ଷା ସହ ଗୁରୁତର ଚରଣକୁ ବୁର୍ଲା ପଠେଇଥିଲେ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
