ସୁବର୍ଣ୍ଣପୁର: କୋରୋନା ସଂକ୍ରମଣକୁ ରୋକିବା ପାଇଁ ସୁବର୍ଣ୍ଣପୁର ଜିଲ୍ଲା ପୋଲିସ ପ୍ରଶାସନ ପକ୍ଷରୁ କଡାକଡି ଭାବେ ଲକଡାଉନ କରାଯାଇଛି । ସହରର ପ୍ରତିଟି ଛକରେ ସୁରକ୍ଷାକର୍ମୀଙ୍କୁ ମୁତୟନ କରାଯିବା ସହ ଆଇନଶୃଙ୍ଖଳା ପରିସ୍ଥିତି ଉପରେ ପୋଲିସ ନଜର ରଖିଛି ।
ଜିଲ୍ଲା ଆରକ୍ଷୀ ଅଧିକ୍ଷକ ଦେବୀ ପ୍ରସାଦ ଦାସଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ପୋଲିସ କର୍ମଚାରୀମାନେ ସହର ଭିତରକୁ ପ୍ରବେଶ କରୁଥିବା ଗାଡ଼ିମଟର ସବୁ ଯାଞ୍ଚ କରୁଛନ୍ତି । ଏହା ସହ ସଂକ୍ରମଣ ରୋକିବା ପାଇଁ ମାସ୍କ ଅବା ଫେସ କଭର ବ୍ୟବହାର କରିବାକୁ ସଚେତନତା ସୃଷ୍ଟି କରୁଛନ୍ତି ।
ଆଜି ସଦର ଏସଡିପିଓ ମିହିର ପଣ୍ଡା ନଳିନୀ ଛକରେ ବିନା କାମରେ ମୋଟର ସାଇକେଲରେ ସହର ଭିତରେ ବୁଲୁଥିବା 20 ଜଣଙ୍କର ମୋଟର ସାଇକେଲ ଜବତ କରିଛନ୍ତି । ଆଜିଠାରୁ କେହି କାର୍ଯ୍ୟରେ ବାହାରକୁ ଆସିଲେ ସାଇକେଲ ଅବା ଚାଲିଚାଲି ଆସିବାକୁ ପୋଲିସ ଜନସାଧାରଣଙ୍କୁ ଅନୁରୋଧ କରିଛି । ସରକାରୀ କାର୍ଯ୍ୟରେ ଥିବା କର୍ମଚାରୀମାନେ କେବଳ ମୋଟରସାଇକେଲରେ ଯାଇ ପାରିବେ ବୋଲି ପୋଲିସ କହିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
