ବଲାଙ୍ଗୀର: ମାନବିକତା ଦେଖାଇଲେ ସ୍ବାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ । ସାଜିଲେ ଉଦାହରଣ । ଦୁର୍ଘଟଣାରେ ଆହତ ପରିବାରକୁ ଉଦ୍ଧାର କରିବା ସହ ଡାକ୍ତରଖାନାରେ ପହଞ୍ଚାଇଲେ । ତାଙ୍କର ଏଭଳି ପଦକ୍ଷେପ ଯୋଗୁଁ ଆହତ ଉଚିତ ସମୟରେ ଚିକିତ୍ସା ପାଇଲେ । ତେବେ ସ୍ବାସ୍ଥ୍ୟ ମନ୍ତ୍ରୀଙ୍କ ଏଭଳି ମାନବିକତାକୁ ସବୁଠି ପ୍ରଶଂସା କରାଯାଇଛି ।
ମାନବିକତା ଦେଖାଇଲେ ସ୍ୱାସ୍ଥ୍ୟ ମନ୍ତ୍ରୀ:
ସୂଚନା ଅନୁଯାୟୀ, ବରଗଡ ଜିଲ୍ଲା ଗୁର୍ଥୁଲା ଗ୍ରାମ ନିକଟରେ ଏକ ବାଇକ ଦୁର୍ଘଟଣା ଘଟିଥିଲା । ବାଇକରେ ବସିଥିବା ଜଣେ ମହିଳା ଗୁରୁତର ଆହତ ହୋଇଥିଲେ । ଏହି ସମୟରେ ବରଗଡ ଗସ୍ତ ସାରି ସେହି ବାଟ ଦେଇ ନିଜ ଅଞ୍ଚଳକୁ ଫେରୁଥିବା ସ୍ୱାସ୍ଥ୍ୟ ମନ୍ତ୍ରୀଙ୍କ ଦୃଷ୍ଟି ପଡିଥିଲା । ତୁରନ୍ତ ସେ ଗାଡିରୁ ଓହ୍ଲାଇ ଆହତ ମହିଳାଙ୍କୁ ସାହାଯ୍ୟ କରିଥିଲେ । ଆହତଙ୍କୁ ଉଦ୍ଧାର କରିବା ସହ ଆମ୍ବୁଲାନ୍ସ ଡକାଇ ତାଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ । ଏଥିସହ ଏନେଇ ସ୍ଥାନୀୟ ପୋଲିସ ଷ୍ଟେସନରେ ଖବର ଦେଇଥିଲେ । ତାଙ୍କର ଏହି କାର୍ଯ୍ୟ ଯୋଗୁଁ ସମସ୍ତ ଆହତଙ୍କ ଉଚିତ ସମୟରେ ଚିକିତ୍ସା ହୋଇ ପାରିଥିଲା । ଯାହା ଫଳରେ ମୂଲ୍ୟବାନ ଜୀବନ ବଞ୍ଚି ଯାଇଥିଲା ।
ଆହତଙ୍କୁ ସାହାଯ୍ୟ କରି ପ୍ରଶଂସାର ପାତ୍ର ହେଲେ ସ୍ୱାସ୍ଥ୍ୟ ମନ୍ତ୍ରୀ:
ଲୋଇସିଂହା ବିଧାୟକ ତଥା ସ୍ୱାସ୍ଥ୍ୟ ମନ୍ତ୍ରୀଙ୍କ ଏହି ମାନବିକତା ପାଇଁ ତାଙ୍କୁ ସବୁଠି ପ୍ରଶଂସା କରାଯାଇଛି । ତେବେ ସଡ଼କ ଦୁର୍ଘଟଣାରେ ଆହତଙ୍କୁ ସାହାଯ୍ୟ କରିବାକୁ ସରକାର ସଚେତନ କରି ଆସୁଛନ୍ତି । ଏପରିକି ପୁରସ୍କାର ଦିଆଯିବାର ବ୍ୟବସ୍ଥା ମଧ୍ୟ ରହିଛିି । ହେଲେ ସମୟ ଅଭାବ ହେଉ ବା ପୋଲିସ ଭୟ ପାଇଁ ଲୋକେ ଆଜି ବି ବିଭିନ୍ନ କାରଣରୁ ସାହାଯ୍ୟ ପାଇଁ ଆଗକୁ ଆସୁନାହାନ୍ତି । ଏଭଳି ସ୍ଥଳେ ସ୍ବାସ୍ଥ୍ୟ ମନ୍ତ୍ରୀ ନିଜେ ଏଭଳି କାର୍ଯ୍ୟ କରି ସମସ୍ତଙ୍କ ପାଇଁ ଉଦାହରଣ ସାଜିଛନ୍ତି । ତେବେ ପୂର୍ବରୁ ମଧ୍ୟ ଏହିଭଳି ସାହାଯ୍ୟ କରି ଅନେକ ଥର ପ୍ରଶଂସାର ପାତ୍ର ହୋଇଛନ୍ତି ମୁକେଶ ମହାଲିଙ୍ଗ ।
ଇଟିଭି ଭାରତ, ବଲାଙ୍ଗୀର
