ସୁବର୍ଣ୍ଣପୁର: ଜିଲ୍ଲାର ସର୍ବପୁରାତନ ସୋନପୁର ମହାବିଦ୍ୟାଳୟର ଅଧ୍ୟାପକ ତଥା କର୍ମଚାରୀମାନେ ପୂର୍ଣ୍ଣ ଅନୁଦାନ ଦାବି କରିଛନ୍ତି । ଏହି ଦାବିରେ ସେମାନେ ମହାବିଦ୍ୟାଳୟର ଆଗରେ ଧାରଣାରେ ବସିଛନ୍ତି । ୨୦୦୮ ମସିହାରୁ ଥିବା ଅଧ୍ୟାପକ ଓ କର୍ମଚାରୀମାନେ ଆଜି ପର୍ଯ୍ୟନ୍ତ ଓଡିଶାର ଗ୍ରାଣ୍ଟ-ଇନ-ଏଡ୍ ନିୟମରେ ପରିସର ଭୁକ୍ତ ହୋଇନଥିବା ଅଭିଯୋଗ ହୋଇଛି ।
ଆନ୍ଦୋଳନରତ ଅଧ୍ୟାପକଙ୍କ ଅଭିଯୋଗ ଅନୁସାରେ ସେମାନେ ମହାବିଦ୍ୟାଳୟ ମାନଙ୍କର ପରିଚାଳନା କମିଟି ଦ୍ବାରା ୨୦୦୮ ମସିହାରେ ନିଯୁକ୍ତି ପାଇଥିଲେ । ମାତ୍ର ଏଯାବତ୍ ଗ୍ରାଣ୍ଟ ଇନ ଏଡ୍ ନିୟମରେ ପରିସର ଭୁକ୍ତ ହୋଇ ନାହାନ୍ତି । ତେଣୁ ବେସରକାରୀ ଅଧ୍ଯାପକ କର୍ମଚାରୀମାନେ ମହାବିଦ୍ୟାଳୟର ସମ୍ମୁଖରେ ସମସ୍ତ କାର୍ଯ୍ୟ ବନ୍ଦ କରି ଅନୁଦାନ ପାଇବା ନେଇ ଧାରଣା ଦେଇଛନ୍ତି । ସରକାରଙ୍କ ଶିକ୍ଷକ ମାରଣ ନୀତି ବିରୁଦ୍ଧରେ ବିଭିନ୍ନ ପ୍ରକାର ସ୍ଲୋଗାନ ଦେଇଛନ୍ତି ।
ଦୀର୍ଘ ୧୧୩ ଦିନ ଧରି ଭୁବନେଶ୍ବର ସ୍ଥିତ ଗାନ୍ଧୀ ମାର୍ଗରେ ଅହୋରାତ୍ର ଧାରଣା ଦେବା ପରେ ମଧ୍ୟ ରାଜ୍ୟ ସରକାରଙ୍କ ନିରବତା କାରଣରୁ ଉକ୍ତ ଅନୁଦାନ ସମ୍ପର୍କିତ ଆନ୍ଦୋଳନ ସମଗ୍ର ରାଜ୍ୟରେ ଥିବା ମହାବିଦ୍ୟାଳୟକୁ ବ୍ୟାପିବାରେ ଲାଗିଛି । ଆଗାମୀ ଦିନରେ ସରକାର ଯଦି ଅନୁଦାନ ପ୍ରଦାନ ଦିଗରେ ସକରାତ୍ମକ ପଦକ୍ଷେପ ଗ୍ରହଣ ନକରନ୍ତି, ତେବେ ଏହି ଆନ୍ଦୋଳନ ପଞ୍ଚାୟତ ସ୍ତରରେ ଓ ଗାଁ ଗାଁରେ ବ୍ୟାପିବ ବୋଲି ସମସ୍ତ ଅଧ୍ୟାପକ ଓ କର୍ମଚାରୀ କହିଛନ୍ତି । ଏହି ଧାରଣାରେ ମହାବିଦ୍ୟାଳୟର ୨୦୦୮ ପରବର୍ତ୍ତୀ ସମସ୍ତ ଅଧ୍ୟାପକ ଓ କର୍ମଚାରୀ ଧାରଣାରେ ସାମିଲ ହୋଇଛନ୍ତି ।
ଇଟିଭି ଭାରତ, ସୁବର୍ଣ୍ଣପୁର
