ସୁବର୍ଣ୍ଣପୁର: ପାନ ଦୋକାନରୁ ଚୋରି । ପରେ ଗ୍ରାମବାସୀଙ୍କ ଠୁ ନିର୍ଦ୍ଦୁମ ଛେଚା । ସହଯୋଗୀଙ୍କ ସହ ଚୋରି କରିବା ସମୟରେ ଧରା ପଡିଲେ ଅଧ୍ୟାପକ । ଜଣେ ଅଧ୍ୟାପକଙ୍କ ଏଭଳି କାଣ୍ଡ କାରନାମା ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଏଭଳି ଲଜ୍ଜାକର ଘଟଣା ସୁବର୍ଣ୍ଣପୁର ଜିଲ୍ଲା ଡଙ୍ଗୁରିପାଲି ବ୍ଳକ ସୋହେଲା ଗାଁର ।
ଖବର ଅନୁଯାୟୀ, ଗତକାଲି ରାତିରେ ସୋହେଲା ଗାଁ ଛକରେ ଥିବା ପାନ ଦୋକାନରୁ ଅଧ୍ୟାପକ ମହାଶୟ ଦୋକାନ ଟିଣ କବାଟ ଭାଙ୍ଗି ନିଜର କେତେଜଣ ସହଯୋଗୀଙ୍କ ସହ ଚୋରି କରୁଥିଲେ । ଏହି ସମୟରେ ଗାଁର କିଛି ଲୋକ ପାନ ଦୋକାନରେ ଆସି ପହଞ୍ଚିଥିଲେ । ଲୋକେ ଆସୁଥିବା ଜାଣିପାରି ଅଧ୍ୟାପକ ମହାଶୟଙ୍କ ସାଥୀ ଚୋର ଫେରାର ହୋଇ ଯାଇଥିଲା । ହେଲେ ଅଧ୍ୟାପକ ମହାଶୟ ଫେରାର ହୋଇ ପାରିନଥିଲେ । ଏପରିକି ଯେଉଁ ବାଇକରେ ଅଭିଯୁକ୍ତ ଦୁଇଜଣ ଚୋରି କରିବାକୁ ଆସିଥିଲେ ତାକୁ ବି ନେଇ ପାରିନଥିଲେ ।
ଗ୍ରାମବାସୀ ମାନେ ଅଧ୍ୟାପକ ଜଣଙ୍କୁ କାବୁ କରିବା ସହିତ ଏକ ଖୁଣ୍ଟରେ ବାନ୍ଧି ନିସ୍ତୁକ ପିଟିଥିଲେ । ପରେ ଡୁଂଗୁରିପାଲି ପୋଲିସ ଘଟଣାସ୍ଥଳରେ ପହଞ୍ଚି ଅଧ୍ୟାପକ ଜଣଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରିଛି । ମିଳିଥିବା ସୂଚନା ଅନୁସାରେ, ଅଧ୍ୟାପକ ଜଣକ ସ୍ଥାନୀୟ ଏକ ମହାବିଦ୍ୟାଳୟର ଓଡିଆ ଅଧ୍ୟାପକ ଆଲୋକ ସେଠୀ ବୋଲି ଜଣାପଡିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
