ସୁବର୍ଣ୍ଣପୁର: ଜିଲ୍ଲାରେ ଗ୍ରାମାଞ୍ଚଳ ମାନଙ୍କରେ ଡାକ୍ତରଙ୍କ ଅଭାବ ଲାଗି ରହିଛି । ବିଶେଷକରି ଜିଲ୍ଲାର ଆଭ୍ୟନ୍ତରୀଣ ଅଞ୍ଚଳରେ ସ୍ୱାସ୍ଥ୍ୟସେବା ଓ ଚିକିତ୍ସା ପହଞ୍ଚି ପାରୁନାହିଁ । ଲୋକେ ସ୍ଥାନୀୟ ବୈଦ୍ୟ ଉପରେ ନିର୍ଭର କରୁଛନ୍ତି । ଏଭଳି ଏକ ଅଞ୍ଚଳ ହେଉଛି ଜିଲ୍ଲାର ସିଂଢୋଲ ଅଞ୍ଚଳ, ଯେଉଁଠି ଚିକିତ୍ସାଳୟ ତ ରହିଛି ହେଲେ ଚିକିତ୍ସକ ନାହାଁନ୍ତି।
ଦୀର୍ଘ ଦିନରୁ ଜଣେ ଡାକ୍ତର ନିଯୁକ୍ତି ଦେବା ପାଇଁ ଅଞ୍ଚଳବାସୀ ଦାବି କରି ଆସୁଛନ୍ତି ମାତ୍ର ଡାକ୍ତର ମିଳୁ ନାହାଁନ୍ତି ଫଳରେ ଲୋକେ ସାଧାରଣ ଜ୍ୱର ଓ ରୋଗ ପାଇଁ ଚିକିତ୍ସାଳୟର କମ୍ପାଉଣ୍ଡର ଉପରେ ନିର୍ଭର କରୁଛନ୍ତି କିମ୍ବା ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆସୁଛନ୍ତି । ସିଂଢୋଲ ନୂତନ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରଟି ଖୋଲିବା ପରେ ସ୍ଥାନୀୟ ଲୋକେ ମାଗଣାରେ ନିକଟରେ ସ୍ୱାସ୍ଥ୍ୟ ସେବା ଓ ଚିକିତ୍ସା ପାଇବେ ବୋଲି ଆଶା କରିଥିଲେ ମାତ୍ର ଆରମ୍ଭରୁ ହିଁ ଜଣକ ପରେ ଜଣେ ଡାକ୍ତର ନିଯୁକ୍ତି ଦିଆଯାଉଥିଲେ ବି ଡାକ୍ତର ମାନେ ଏହି ଆଭ୍ୟନ୍ତରୀଣ ଅଞ୍ଚଳରେ ନ ରହି ସହରାଞ୍ଚଳକୁ ଚାଲି ଆସୁଛନ୍ତି ।
ତେବେ ରୋଗୀମାନେ ବାଧ୍ୟ ହୋଇ ସ୍ଥାନୀୟ ବୈଦ୍ୟ କିମ୍ବା ଦୂରରେ ଥିବା ଚିକିତ୍ସାଳୟ ଉପରେ ନିର୍ଭର କରୁଛନ୍ତି । ତେବେ ଏହି ଡାକ୍ତରଖାନାରେ ଜଣେ ନିୟମିତ ଡାକ୍ତର ଦେବାକୁ ଅଞ୍ଚଳବାସୀ ଦାବି କରିଛନ୍ତି । ଅପରପକ୍ଷେ ଜିଲ୍ଲାରେ 150 ଜଣ ଡାକ୍ତର ରହିବା ଯାଗାରେ ଅଛନ୍ତି ମାତ୍ର 70 ଜଣ ଡାକ୍ତର । ତେଣୁ ସିଂଢୋଲ ନୂତନ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରକୁ ଉଲୁଣ୍ଡା ଡାକ୍ତରଖାନାରୁ ସପ୍ତାହକ ଦୁଇ ଦିନ ପାଇଁ ଜଣେ ଡାକ୍ତର ଯିବା ପାଇଁ ନିର୍ଦ୍ଦେଶ ଦିଆଯାଇଥିବା ଜିଲ୍ଲା ମୁଖ୍ୟ ଚିକିତ୍ସାଧିକାରୀ କହିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
