ସୁବର୍ଣ୍ଣପୁର: ଜିଲ୍ଲାର ଚାଷୀ ଜମିର କିସମ ଅନୁଯାୟୀ ଧାନ ସଂଗ୍ରହର ପ୍ରତିବାଦ କରିଛନ୍ତି। ରବି ଧାନ କ୍ରୟ ପାଇଁ ପ୍ରଶାସନ ପକ୍ଷରୁ ନୀତି ସ୍ପଷ୍ଟ ନହେଲେ ଅଯଥାରେ ଚାଷୀ ହଇରାଣ ହେବେ ବୋଲି ଚାଷୀମାନେ ଆଶଙ୍କା କରିଛନ୍ତି । ଧାନ ଅମଳ ସମୟ ଆସିଲାଣି । ତାର ଯଥେଷ୍ଟ ପୂର୍ବରୁ ଧାନ କ୍ରୟ ନୀତି ସ୍ପଷ୍ଟ କରିବା ପାଇଁ ଚାଷୀମାନେ ଜିଲ୍ଲା ଯୋଗାଣ ଅଧିକାରୀଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଏନେଇ ଜିଲ୍ଲାପାଳଙ୍କ ଉଦ୍ଦେଶ୍ୟରେ ଜିଲ୍ଲା ଯୋଗାଣ ଅଧିକାରୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି ।
କିସମ ଆକାରରେ ଧାନ କ୍ରୟରେ କଟକଣା ଲାଗୁ ପାଇଁ ପ୍ରଶାସନ ଯୋଜନା କରୁଥିବା ବେଳେ ଏଥିରେ ଚାଷୀ ମାନେ କ୍ଷତିଗ୍ରସ୍ତ ହେବେ ବୋଲି ଆଶଙ୍କା କରୁଛନ୍ତି । ଏହାକୁ ସେମାନେ ଦୃଢ ବିରୋଧ କରିଛନ୍ତି କାରଣ ରବି ଚାଷରେ କିସମର ମୂଲ୍ୟ କିଛି ନଥାଏ ।
ଉଠା ଜଳସେଚନ କିମ୍ବା ଗଭୀର ନଳକୂପ ଦ୍ବାରା ଚାଷୀ ଚାଷ କରୁଥିବା ବେଳେ ଅନୁନ୍ନତ ଯଥା ମାଳ , ଆଟ କିସମର ଜମିରୁ ବି ଉତ୍ପାଦନ ହୋଇ ପାରୁଛି ବୋଲି ଚାଷୀ କହିଛନ୍ତି। ନର୍ଦ୍ଧାରିତ ସମୟରେ କ୍ରୟ ନୀତି ସ୍ପଷ୍ଟ ନହେଲେ ଚାଷୀ ଅଭାବୀ ଧାନ ବିକ୍ରିର ଶିକାର ହେବାର ଆଶଙ୍କା ଥିବାରୁ ତୁରନ୍ତ ଏ ଦିଗରେ ଆବଶ୍ୟକ ପଦକ୍ଷେପ ନେବାକୁ ଦାବି କରିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
