ସୁବର୍ଣ୍ଣପୁର: ରବି ଧାନ ସଂଗ୍ରହ ଆରମ୍ଭରୁ ଜିଲ୍ଲାରେ ଚାଷୀ ଅସନ୍ତୋଷ ଦେଖା ଦେଇଛି । ଚାଷିମାନେ ଯେତିକି ଚାଷ କରିଛନ୍ତି ସେତିକି ପରିମାଣର ଧାନ ବିକ୍ରି ପାଇଁ ଟୋକନ ମିଳୁ ନଥିବା ଅଭିଯୋଗ ହୋଇଛି । ୪ ଏକର ଜମିରେ ଚାଷ କରିଥିବା ଚାଷୀଙ୍କ ୩ ଏକର ଜମିର ଟୋକନ ଆସିଥିବା ପରି ସଙ୍ଗୀନ ଅଭିଯୋଗ କରିଛନ୍ତି ଚାଷୀମାନେ । ଫଳରେ ବଳକା ଧାନକୁ କେଉଁଠି ବିକ୍ରି କରିବେ ବୋଲି ଚାଷୀମାନେ ପ୍ରଶ୍ନ କରିଛନ୍ତି ।
ଏନେଇ ବାରମ୍ବାର ସ୍ଥାନୀୟ ପ୍ୟାକ୍ସରେ ଅଭିଯୋଗ କରିଥିଲେ ହେଁ କୌଣସି ସୁଫଳ ନମିଳିବାରୁ ଆଜି(ଶୁକ୍ରବାର) ଜିଲ୍ଲା ମୁଖ୍ୟ ଯୋଗାଣ ଅଧିକାରୀଙ୍କ କାର୍ଯ୍ୟାଳୟକୁ ଆସି ଚାଷୀମାନେ ଲିଖିତ ଗୁହାରୀ କରିଛନ୍ତି ଜିଲ୍ଲାର ତରଭା ବ୍ଲକ ବନ୍ଧକେଡା ଗ୍ରାମର ଚାଷୀ । ଯେତିକି ଚାଷ ହୋଇଛି ସେହି ପରିମାଣର ଟୋକନ ଦେବା ପାଇଁ ସେମାନେ ଦାବି କରିଛନ୍ତି ।
ଦାବିପୂରଣ ନହେଲେ ଆଗାମୀ ଦିନରେ ଆନ୍ଦଳନ କରାଯିବ ବୋଲି ଚେତାବନୀ ଦେଇଛନ୍ତି । ଚଳିତ ବର୍ଷ ରାଜସ୍ୱ ବିଭାଗ ଓ କୃଷି ବିଭାଗ ପକ୍ଷରୁ ମିଳିତ ଯାଞ୍ଚ କରାଯାଇ ଯୋଗାଣ ବିଭାଗକୁ ରିପୋର୍ଟ ପ୍ରଦାନ କରାଯାଇଥିଲେ ହେଁ କମ ଟୋକନ ଆସିଥିବା ଜଣାପଡିଛି । ଯାହାକୁ ନେଇ ଚାଷିଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
