ସୁବର୍ଣ୍ଣପୁର: ଥାନା ଏଏସଆଇଙ୍କୁ ଚାପୁଡା ମାରିବା ଘଟଣା । ଆଜି କୋର୍ଟ ଚାଲାଣ ହେବ ଅଭିଯୁକ୍ତ । ଅଭିଯୁକ୍ତ ନାଁରେ ମାମଲା ରୁଜୁ କରିଛି ବିନିକା ପୋଲିସ । ସେପଟେ କାହିଁକି ଥାନା ଏଏସଆଇଙ୍କୁ ଚାପୁଡା ମାରିଲା, ଗଣମାଧ୍ୟମ ଆଗରେ ମଜାଳିଆ ବୟାନ ଦେଇଛି ଅଭିଯୁକ୍ତ ପାଣ୍ଡୁ କର୍ଣ୍ଣ ।
ପୁରା ଘଟଣା ଥିଲା ଏପରି । ଡେଣ୍ଡୁପଦର ଗାଁରେ ବର୍ଷାପାଣି ଯିବା ବାଟକୁ ବନ୍ଦ ରଖିଥିଲା ଗାଁର ଅଭିଯୁକ୍ତ ପାଣ୍ଡୁ କର୍ଣ୍ଣ । ଏହାକୁ ପ୍ରତିବାଦ କରି ଗାଁର ମହିଳାମାନେ ଜିଲ୍ଲାପାଳଙ୍କ ଜନ ଶୁଣାଣି ଶିବିରରେ ଅଭିଯୋଗ କରିଥିଲେ । ଘଟଣାର ତଦନ୍ତ କରିବାକୁ ପୋଲିସକୁ ନିର୍ଦ୍ଦେଶ ଦିଆଯାଇଥିଲା । ଏହି ଆଧାରରେ ଅଭିଯୁକ୍ତ ପାଣ୍ଡୁକୁ ପଚରାଉଚରା ପାଇଁ ସୋମବାର ଥାନାକୁ ଡାକିଥିଲେ ବିନିକା ଥାନା ଏଏସଆଇ ଅଭିମନ୍ୟୁ ସେଠୀ । ଏପଟେ ଥାନାବାବୁଙ୍କୁ ଚାପୁଡାଏ ମାରିଥିଲା ଅଭିଯୁକ୍ତ ।
ଅଭିଯୁକ୍ତ ପାଣ୍ଡୁର କହିବା କଥା ହେଲା, ଥାନାବାବୁ ସାଧା ପୋଷାକରେ ଥିଲେ । ପୋଲିସ ବାବୁ ବୋଲି ସେ ଜାଣିନଥିଲା । ପ୍ରଥମେ ଥାନାବାବୁ ତାକୁ ଚାପୁଡାଏ ମାରିଥିଲେ । ଚିହ୍ନି ନପାରି ସେ ମଧ୍ୟ ଚାପୁଡା ମାରିଥିବା କହିଛି ପାଣ୍ଡୁ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
