ସମ୍ବଲପୁର: ରାକ୍ଷୀ ପୂର୍ଣ୍ଣିମା ତଥା ରକ୍ଷା ବନ୍ଧନ ପର୍ବକୁ ନେଇ ସାରା ଦେଶ ଆଜି ଉତ୍ସବ ମୁଖର । ଭାଇ ମାନଙ୍କ ହାତରେ ଭଉଣୀ ରାକ୍ଷୀ ବାନ୍ଧି ନିଜର ସୁରକ୍ଷା କରିବାର ସଂକଳ୍ପ ଭାଇଠୁ ନେଇଥାଏ । କିନ୍ତୁ ଏହି ରକ୍ଷା ବନ୍ଧନ ଉତ୍ସବକୁ ସମ୍ବଲପୁରର ବୁଢ଼ାରାଜା ପାହାଡ଼ ବନ ସୁରକ୍ଷା ସମିତିର ସଦସ୍ୟମାନେ ଏକ ନିଆରା ଢଙ୍ଗରେ ପାଳନ କରିଛନ୍ତି । ଗଛକୁ ରାକ୍ଷୀ ବାନ୍ଧିବା ସହ ଗଛଗୁଡ଼ିକର ସୁରକ୍ଷା ପାଇଁ ସଂକଳ୍ପ ନେଇଛନ୍ତି l
ତେବେ ସମ୍ବଲପୁର ସହରର ବୁଢ଼ାରାଜା ପାହାଡ଼ରେ ବିଭିନ୍ନ ପ୍ରଜାତିର ବିରାଟକାୟ ବୃକ୍ଷ ଠିଆ ହୋଇଛି । ତେଣୁ ଏହାକୁ ସହରର ଅକ୍ସିଜେନ ପ୍ଲାଣ୍ଟ ବୋଲି ମଧ୍ୟ କୁହାଯାଏ l ପ୍ରତ୍ୟେକ ବର୍ଷ ରକ୍ଷା ବନ୍ଧନ ଅବସରରେ ଏହି ପାହାଡରେ ଥିବା ଗଛଗୁଡିକୁ ରାକ୍ଷୀ ବନ୍ଧା ଯାଇଥାଏ l ବୁଢ଼ାରାଜା ପାହାଡ଼ ବନ ସୁରକ୍ଷା ସମିତିର ଉଦ୍ୟମରେ ସଦସ୍ୟ ଓ ସ୍ଥାନୀୟମହିଳା ମାନେ ଏହି ପାହାଡ଼ରେ ଥିବା ଗଛଗୁଡ଼ିକୁ ରାକ୍ଷୀ ବାନ୍ଧିବା ସହ ଗଛଗୁଡ଼ିକର ସୁରକ୍ଷା ପାଇଁ ସଂକଳ୍ପ ନିଅନ୍ତି l ପ୍ରତ୍ୟେକ ବର୍ଷ ରାକ୍ଷୀ ପୂର୍ଣ୍ଣିମା ଅବସରରେ ଏଠାରେ ଘଣ୍ଟ ଶଙ୍ଖ, ହୁଳହୁଳି ସହ ପୂଜାର୍ଚ୍ଚନା କରାଯାଇ ଗଛ ଗୁଡିକୁ ରାକ୍ଷୀ ବାନ୍ଧିଛନ୍ତି ଲୋକେ l ଆଉ ସହରରେ ପାଳନ ହେଉଥିବା ଏହି ନିଆରା ରକ୍ଷା ବନ୍ଧନ ଦୀର୍ଘ ବର୍ଷ ହେଲା ଅନୁଷ୍ଠିତ ହୋଇ ଆସୁଛି । ପ୍ରତିବର୍ଷ ପରିବେଶ ସୁରକ୍ଷା ସହ ବୄକ୍ଷଙ୍କୁ ସୁରକ୍ଷା ଯୋଗାଇବାର ମହତ୍ ବାର୍ତ୍ତା ଦେବା ପାଇଁ ରକ୍ଷାବନ୍ଧନ ଅବସରରେ ଏହା ପାଳନ ହୋଇ ଆସୁଛି ।
ଏହା ମଧ୍ୟ ପଢନ୍ତୁ- Raksha Bandhan 2023: ପ୍ରଧାନମନ୍ତ୍ରୀ ମୋଦିଙ୍କୁ ରାକ୍ଷୀ ବାନ୍ଧିଲେ ସ୍କୁଲ ଛାତ୍ରୀ
ସମ୍ବଲପୁରର ବୁଢ଼ାରାଜା ବନ ସୁରକ୍ଷା ସମିତି ପକ୍ଷରୁ ଆଜକୁ 23 ବର୍ଷ ହେବ ବୄକ୍ଷ ସହ ରକ୍ଷାବନ୍ଧନ କାର୍ଯ୍ୟକ୍ରମ ଅନୁଷ୍ଠିତ କରାଯାଉଛି । ବୁଢାରାଜା ପାହାଡ ଓ ଏହାର ବୄକ୍ଷ ଗୁଡିକୁ ସୁରକ୍ଷା ଦେବା ପାଇଁ ସଂକଳ୍ପ ନେଇଆସୁଛନ୍ତି ସ୍ଥାନୀୟ ଲୋକେ । ଭଉଣୀଟିଏ ଯେପରି ନିଜର ଭାଇର ଶୁଭ ମନାସି ନିଷ୍ଠାର ସହକାରେ ତାର ହାତରେ ରାକ୍ଷୀଟିଏ ବାନ୍ଧି ଥାଏ ଓ ତାକୁ ସୁରକ୍ଷା ଦେବାପାଇଁ କହିଥାଏ । ସେହିପରି ଭାବରେ ବୁଢାରଜା ବନ ସୁରକ୍ଷା ସମିତିର ସଭ୍ୟ ଓ ଛାତ୍ରୀମାନେ ବୄକ୍ଷକୁ ପୂଜା କରି ରାକ୍ଷୀ ବାନ୍ଧି ତାଙ୍କୁ ସୁରକ୍ଷା ଦେବା ପାଇଁ ଶପଥ ନେଇଥାନ୍ତି । ଏହି ନିଆରା ରକ୍ଷାବନ୍ଧନ ଅଭିଯାନ ପାଇଁ ଆଜି ଯାଏଁ ପାହାଡ଼ଟି ସୁରକ୍ଷିତ ରହିବା ସହ ସବୁଜିମାରେ ପରିଣତ ହୋଇପାରିଛି । ପରିବେଶ ସୁରକ୍ଷା ସଚେତନତା ପାଇଁ ହେଉଥିବା ଏହି ରକ୍ଷାବନ୍ଧନ କାର୍ଯ୍ୟକ୍ରମର ନିଆରା ପ୍ରୟାସରେ ସହରର ବହୁ ପରିବେଶବିତ୍, ବୁଦ୍ଧିଜୀବୀ, ବନବିଭାଗର ଅଧିକାରୀ, ବିଭିନ୍ନ ଶିକ୍ଷାନୁଷ୍ଠାନର ଛାତ୍ରୀମାନେ ମଧ୍ୟ ସାମିଲ ହୋଇ ଆସୁଛନ୍ତି ।
ଇଟିଭି ଭାରତ, ସମ୍ବଲପୁର
