ସମ୍ବଲପୁର: ମଙ୍ଗଳବାର ଠାରୁ ଆରମ୍ଭ ହୋଇଛି ସମ୍ବଲପୁର ମହାନଗର ନିଗମର ମହା ସଫେଇ ଅଭିଯାନ। ସମ୍ବଲପୁରର ସମସ୍ତ ସ୍ବେଚ୍ଛାସେବୀ ଅନୁଷ୍ଠାନକୁ ନେଇ ମହାନଗର ନିଗମର ନେତୃତ୍ବରେ ଆଜି ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସଫେଇ କରାଯାଇଥିବା ବେଳେ ଆଗକୁ ସମ୍ବଲପୁର ମହାନଗରର ପ୍ରମୁଖ ସ୍ଥାନ ଗୁଡିକୁ ସଫେଇ ଅଭିଯାନ ଜରିଆରେ ସ୍ଵଛତା ଓ ସଚେତନତା କରାଯିବ ବୋଲି କୁହାଯାଇଛି।
ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପ୍ରତ୍ୟେକ ଦିନ ସମ୍ବଲପୁର ତଥା ଆଖପାଖ ଜିଲ୍ଲାର ଲୋକେ ଚିକିତ୍ସିତ ହେବା ପାଇଁ ଆସନ୍ତି । ସେଥିପାଇଁ ଏହାର ସ୍ବଚ୍ଛତାର ଗୁରୁତ୍ବକୁ ବୁଝି ସମ୍ବଲପୁର ମହାନଗର ନିଗମ ଆଜିଠୁ ଆରମ୍ଭ କରିଛି ମହା ସଫେଇ ଅଭିଯାନ। ମହାନଗର ନିଗମର କର୍ମଚାରୀ ସହ ପ୍ରମୁଖ ସ୍ବେଚ୍ଛାସେବୀ ଅନୁଷ୍ଠାନର ସଦସ୍ୟମାନେ ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟର ସଫେଇ କରିଛନ୍ତି ।
ହାତରେ ଗ୍ଲୋବସ ଓ ମୁହଁରେ ମାସ୍କ ଲଗାଇ ଉତ୍ସାହି ଯୁବକ ଯୁବତୀ ମାନେ ଏହି କାର୍ଯ୍ୟ କରିଛନ୍ତି । ସମ୍ବଲପୁରର ସମ୍ବଳ ଓ ବିଜୁ ଯୁବ ବାହିନୀ, ପଶ୍ଚିମାଞ୍ଚଳ ଏକତା ମଞ୍ଚ ପରି ଅନୁଷ୍ଠାନ ଏଥିରେ ସାମିଲ ହୋଇଥିବା ବେଳେ ଏହାର ନେତୃତ୍ବ ନେଇଥିଲେ ସମ୍ବଲପୁର ମହାନଗର ନିଗମର ଡେପୁଟି କମିଶନର ଦେବେନ୍ଦ୍ର ନନ୍ଦ।
ଆଗକୁ ଏହି ସଫେଇ ଅଭିଯାନରେ ଜିଲ୍ଲାର ସମଲେଶ୍ବରୀ ମନ୍ଦିର, ଗଙ୍ଗାଧର ମେହେର ବିଶ୍ବବିଦ୍ୟାଳୟ ବୁର୍ଲା ବଡ଼ ମେଡିକାଲର ସଫେଇକୁ ଅନ୍ତର୍ଭୁକ୍ତ କରାଯିବ ବୋଲି କୁହାଯାଇଛି । ଏହା ସହ ମାସକରେ 2 ଥର ପ୍ରମୁଖ ସ୍ଥାନ ଗୁଡିକର ସଫେଇ ହେବ ବୋଲି କୁହାଯାଇଛି । ସମ୍ବଲପୁରର 41 ଟି ୱାର୍ଡକୁ ପର୍ଯ୍ୟାୟକ୍ରମରେ ଏମିତି ସଫେଇ କରାଯିବ ବୋଲି କୁହାଯାଇଛି । ସମ୍ବଲପୁର ମହାନଗରର ଏହି ପ୍ରୟାସକୁ ପ୍ରଶଂସା କରଯାଇଛି।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
