ସମ୍ବଲପୁର: ସମ୍ବଲପୁର ଜିଲ୍ଲା ଶାସନ ଥାନା ଅନ୍ତର୍ଗତ ମାନେଶ୍ବର ନିକଟସ୍ଥ ମୁରା ଗ୍ରାମର କୋଠରୀ ଭିତରୁ ଜଣେ ଅଧ୍ୟାପକଙ୍କ ରକ୍ତାକ୍ତ ମୃତଦେହ ଉଦ୍ଧାର ହୋଇଛି । ତେବେ ଏହା ହତ୍ୟା ନା ଆତ୍ମହତ୍ୟା ସ୍ପଷ୍ଟ ହୋଇନାହିଁ । ସମ୍ବଲପୁର ମୁରା ଆଞ୍ଚଳିକ ମହାବିଦ୍ୟାଲୟର ରାଜନୀତି ବିଜ୍ଞାନ ଅଧ୍ୟାପକଙ୍କ ସନ୍ଦେହ ଜନକ ମୃତ୍ୟୁ ହୋଇଛି । ମୃତ ଅଧ୍ୟାପକ ହୃଦାନନ୍ଦ ପ୍ରଧାନ ମୁରା ଗ୍ରାମର ହାଇସ୍କୁଲ ପରିସରରେ ଥିବା ଏକ ଘରେ ରହି ସେହି ଗ୍ରାମର କଲେଜରେ ଅଧ୍ୟାପନା କରୁଥିଲେ । ସକାଳୁ କଲେଜ ନଆସିବା ଯୋଗୁଁ ସ୍ଥାନୀୟ ଲୋକେ ପଚରା ଉଚୁରା କରି ରହୁଥିବା ଘରକୁ ଯାଇଥିଲେ । ଘର ବାହାରେ ଅଧ୍ୟାପକଙ୍କ ଚପଲ ଥିବା ଦେଖି ସନ୍ଦେହ ହୋଇଥିଲା ।
ଏନେଇ ଶାଶନ ଥାନାକୁ ଖବର ଦେଇଥିଲେ ଗ୍ରାମବାସୀ । ଘଟଣା ସଂପର୍କରେ ଖବର ପାଇ ପୋଲିସ ସାଇଣ୍ଟିଫିକ ଟିମ ଉପସ୍ଥିତିରେ କବାଟ ଖୋଲିବା ପରେ ମୃତଦେହ ପଡିଥିବା ଦେଖିବାକୁ ମିଳିଥିଲା । ମୃତଦେହକୁ ପୋଲିସ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଶାସନ ପୋଲିସ ଘଟଣାର ତଦନ୍ତ ଜାରି ରଖିଛି । ତେବେ ମୃତ୍ୟର କାରଣ ବ୍ୟବଚ୍ଛେଦ ରିପୋର୍ଟ ଆସିଲା ପରେ ଜଣା ପଡିବ ବୋଲି ପୋଲିସ କହିଛି ।
ସମ୍ବଲପୁରରୁ ବାଦଶାହା ଜୁଷ୍ମନ ରଣା, ଇଟିଭି ଭାରତ
