ସମ୍ବଲପୁର: ଯୋଜନାର ଅଭାବ ନାହିଁ । ହେଲେ ପ୍ରକୃତ ହିତାଧିକାରୀ ସୁଫଳ ପାଇବାରୁ ବଞ୍ଚିତ । ସମ୍ବଲପୁର ମହାନଗର ନିଗମ ୱାର୍ଡ ନଂ 1 ର ଚାଁଆରପୁର, ଝରାପାଲିରେ ରହୁଥିବା ଏହି ଗରିବ ପରିବାରକୁ ଦେଖିଲେ ତାହା ସ୍ପଷ୍ଟ ବାରି ହୋଇପଡୁଛି । ଏ ହେଉଛନ୍ତି ଦିବ୍ୟାଙ୍ଗ ବିଷ୍ଣୁ ମାଝୀ । 10 ବର୍ଷ ତଳେ ଏକ ଦୁର୍ଘଟଣାରେ ଗୋଟିଏ ହାତ ହରାଇ ବସିଛନ୍ତି । ସେବେଠୁ ନିଜ ବୋଝ ଉଠାଇବା ସହ ପରିବାରର 6 ପ୍ରାଣୀଙ୍କ କଥା ବୁଝିଛନ୍ତି । 4 ଫୁଟ ଉଚ୍ଚତା ବିଶିଷ୍ଟ ଭଙ୍ଗା ଆଜବେଷ୍ଟସ ଘରେ ମୁଣ୍ଡ ଗୁଞ୍ଜିଛନ୍ତି 7ଜଣ । ଜଙ୍ଗଲରୁ କାଠ ଆଣି ତ ପରଘରୁ ମାଗିଯାଚି ଓଳିଏ ଖାଇ ଓଳିଏ ଉପାସ ରହିଥାନ୍ତି ଏହି ପରିବାର । ସେପଟେ ଏହି ଅଞ୍ଚଳ ମହାନଗର ନିଗମ ଅଧୀନରେ ଆସୁଥିଲେ ମଧ୍ୟ ନା ପରିବାରକୁ ମିଳୁଛି କୌଣସି ଭତ୍ତା ନା ସରକାରୀ ଆବାସ । କାରଣ ବିଷ୍ଣୁଙ୍କ ନିଜର କୌଣସି ଜମିପଟ୍ଟା ନଥିବାରୁ ସରକାରୀ ଯୋଜନାରୁ ସେ ବାଦ ପଡିଛନ୍ତି ।
ଅନ୍ୟପଟେ ଏହି ପରିବାରର ସମସ୍ୟା ନେଇ ସମ୍ବଲପୁର ମହାନଗର ନିଗମ କମିଶନରଙ୍କ ସହ ଯୋଗାଯୋଗ କରାଯିବା ପରେ ସହାୟତା ଯୋଗାଇ ଦେବାକୁ ସେ ପ୍ରତିଶୃତି ଦେଇଛନ୍ତି । ଯଦି ପରିବାର ଲୋକ ଅନୁମତି ଦେବେ ତାହେଲେ ପିଲାଙ୍କୁ ସରକାରୀ ସ୍କୁଲ ଆଶ୍ରମରେ ରହିବାର ବ୍ୟବସ୍ଥା କରାଯିବ। ଏହାସହ ସରକାରୀ ଯୋଜନାରେ ଏହି ପରିବାର କିପରି ଅନ୍ତର୍ଭୁକ୍ତ ହୋଇପାରିବ, ସେ ନେଇ ବ୍ୟବସ୍ଥା ଗ୍ରହଣ କରାଯିବ ବୋଲି ମହାନଗର ନିଗମ କମିଶନର କହିଛନ୍ତି ।
ସମ୍ବଲପୁର ମହାନଗର ନିଗମ ପୁନର୍ଗଠନ ହେବା ପରେ ଏମିତି ଅନେକ ଗ୍ରାମାଞ୍ଚଳ ବ୍ଲକରୁ ଆସି ମହାନଗର ନିଗମରେ ମିଶିଲା ସତ କିନ୍ତୁ ଏହି ଅଞ୍ଚଳର ଏମିତି ଅନେକ ପରିବାର ଏବେ ସହରି ସୁବିଧା ତ ଦୂରରେ ଥାଉ ସର୍ବନିମ୍ନ ସୁବିଧା ମଧ୍ୟ ପାଉ ନାହାଁନ୍ତି।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
