ସମ୍ବଲପୁର: ବିଷାକ୍ତ ଛତୁ ନେଲା ଜୀବନ । ଘଟଣା ଘଟିଛି ସମ୍ବଲପୁର ଜିଲ୍ଲା ରେଢ଼ାଖୋଲ ଉପଖଣ୍ଡ କିସିଣ୍ଡା ଥାନା ଅନ୍ତର୍ଗତ ହୀରାଲୋଇ ଗ୍ରାମରେ । ଏହି ଗ୍ରାମର ରମେଶ ଲୁଗୁନ ଛେଳି ଚରାଇବା ପାଇଁ ଗ୍ରାମ ନିକଟସ୍ଥ ଜଙ୍ଗଲକୁ ଯାଇଥିଲେ ଓ ଘରକୁ ଫେରିବା ବାଟରେ କିଛି ଛତୁ ଆଣିଥିଲେ । ଘରେ ଛତୁ ରାନ୍ଧି ଖାଇବା ସହ ନିକଟସ୍ଥ ପଡୋଶୀ ଘରର ଦୁଇଜଣ ଶିଶୁଙ୍କୁ ଖାଇବାକୁ ଦେଇଥିଲେ ।
ଛତୁ ଖାଇବା ପରେ ସନ୍ଧ୍ୟାରେ ସମସ୍ତେ ଗୁରୁତର ଅସୁସ୍ଥ ହୋଇଥିଲେ । ସମସ୍ତଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ପ୍ରଥମେ ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ହସ୍ପିଟାଲରେ ରମେଶ ଲୁଗୁନର ମୃତ୍ୟୁ ହୋଇଥିବା ବେଳେ ତାଙ୍କ ସ୍ତ୍ରୀ ଅଞ୍ଜଳି ଲୁଗୁନ ଗୁରୁତର ଅବସ୍ଥାରେ ବୁର୍ଲାରେ ଚିକିତ୍ସିତ ହେଉଛନ୍ତି ।
ଦୁଇଜଣ ଶିଶୁ ଅମନ ଓ ସୀମାନ ଗୁରୁତର ଅବସ୍ଥାରେ ସମ୍ବଲପୁର ଶିଶୁ ବିଭାଗରେ ଚିକିତ୍ସାଧୀନ ଅବସ୍ଥାରେ ଅଛନ୍ତି । ଗୋଟିଏ ପରିବାରର ଜଣେ ପ୍ରାଣ ହାରିଥିବା ବେଳେ ତାଙ୍କ ସ୍ତ୍ରୀ ବୁର୍ଲାରେ ଚିକିତ୍ସିତ ହେଉଛନ୍ତି । ଅନ୍ୟ ପରିବାରର 2 ବାଳକ ସମ୍ବଲପୁର ମୂଖ୍ୟ ଚିକିତ୍ସାଳୟରେ ଚିକିତ୍ସିତ ଅଛନ୍ତି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା,ଇଟିଭି ଭାରତ
