ସମ୍ବଲପୁର: ଓଡ଼ିଆ ଚଳଚ୍ଚିତ୍ର ଅଭିନେତା ମନୋଜ ମିଶ୍ରଙ୍କ ମନ୍ତବ୍ୟକୁ ନେଇ ବିବାଦ ବଢ଼ିବାରେ ଲାଗିଛି । ଗଣମାଧ୍ୟମକୁ ଏକ ସାକ୍ଷାତକାର ଦେବା ସମୟରେ ମନୋ ମିଶ୍ର ଓଡି଼ଆ ସିନେ ଇଣ୍ଡଷ୍ଟ୍ରିକୁ ନେଇ ନିଜର ମତ ରଖିଥିଲେ । ଏହାପରେ କିଛି କଳାକାର ତାଙ୍କର ଏପରି ମନ୍ତବ୍ୟକୁ ନିନ୍ଦା କରିଛନ୍ତି । ଏବେ ଏହାର ପ୍ରତିକ୍ରିୟା ସମ୍ବଲପୁରରେ ଦେଖିବାକୁ ମିଳିଛି l ମନୋଜଙ୍କ ସମର୍ଥନରେ ବାହାରିଛି ସମ୍ବଲପୁରର ସ୍ବେଚ୍ଛାସେବୀ ସଂଗଠନ l ମନୋଜଙ୍କୁ ଗାଳି ଗୁଲଜ କରି ଧମକ ଦେବା ସହ ପଶ୍ଚିମ ଓଡ଼ିଶାକୁ ଆକ୍ଷେପ କରିଥିବା ଅଭିଯୋଗରେ ସମ୍ବଲପୁର ଟାଉନ ଥାନାରେ ଏତଲା ହୋଇଛି l
କିଛି ଦିନ ତଳେ ଅଭିନେତା ମନୋଜ ମିଶ୍ର ଏକ ନିର୍ଦ୍ଧିଷ୍ଟ ଗଣମାଧ୍ୟମରେ ଓଡି଼ଆ ସିନେ ଇଣ୍ଡଷ୍ଟ୍ରିକୁ ନେଇ ବିବାଦୀୟ ମନ୍ତବ୍ୟ ଦେଇଥିବା ଅଭିଯୋଗ ହୋଇଥିଲା । ଏହା ପରେ ଆରମ୍ଭ ହୋଇଥିଲା ବିବାଦ । କିଛି ଲୋକେ ଗଣ ମାଧ୍ୟମରେ ମନୋଜ ମିଶ୍ରଙ୍କୁ ଏଭଳି ମନ୍ତବ୍ୟ ପାଇଁ ଗାଳି ଗୁଲଜ କରିବା ସହ ପଶ୍ଚିମ ଓଡ଼ିଶା ପରିଚୟକୁ ନେଇ ଆଶାଳୀନ ମନ୍ତବ୍ୟ ଦେଇଥିଲେ l ଯାହାକୁ ସମ୍ବଲପୁର ସ୍ବେଚ୍ଛାସେବୀ ସଂଗଠନ ନିନ୍ଦା ପ୍ରକାଶ କରିଛି । କେତେକ ସ୍ବେଚ୍ଛାସେବୀ ସଂଗଠନ ପକ୍ଷରୁ ଏନେଇ ଅସନ୍ତୋଷ ଜାହିର କରାଯିବା ସହ ମନୋଜ ମିଶ୍ରଙ୍କୁ ଗାଳି ଗୁଲଜ କରିବା ଓ ପଶ୍ଚିମ ଓଡ଼ିଶା ପ୍ରତି ଆପତ୍ତିଜନକ ବୟାନ ଦେଇଥିବା ଲୋକଙ୍କ ବିରୁଦ୍ଧରେ ସମ୍ବଲପୁର ଟାଉନ ଥାନାରେ ଏତଲା ଦିଆଯାଇଛି । ପୋଲିସ ତୁରନ୍ତ ଏଦିଗରେ କାର୍ଯ୍ୟାନୁଷ୍ଠାନ ନେବାକୁ ଦାବି କରାଯାଇଛି l
