ସମ୍ବଲପୁର: ଜିଲ୍ଲାର ଯୁଜୁମୁରା ଥାନା ଅନ୍ତର୍ଗତ ଗଇଲଗୁଡ଼ି ଗାଁରେ ନିଖୋଜ ମହିଳାଙ୍କ ମୃତଦେହକୁ ମାଟିତଳୁ ଉଦ୍ଧାର କଲା ପୋଲିସ । ଏହି ଘଟଣାରେ ପତ୍ନୀହନ୍ତାକୁ ଗିରଫ କରିଛି ଯୁଜୁମୁରା ପୋଲିସ । ସାତ ଜନ୍ମର ସାଥି ହେବା କଥା ଦେଇ ସ୍ତ୍ରୀର ହତ୍ୟାକାରୀ ସାଜିଲା ସ୍ବାମୀ ।
ସୂଚନା ଅନୁସାରେ, ଗତ ୧୫ ତାରିଖରୁ ଯୁଜୁମୁରା ଥାନା ଗଇଲଗୁଡି ଗ୍ରାମର ପଦ୍ମିନୀ ଶବର ନାମକ ଜଣେ ମହିଳା ନିଖୋଜ ହେବାପରେ ଥାନାରେ ମାମଲା ରୁଜୁ ହୋଇଥିଲା । ଅଭିଯୋଗ ଆଧାରରେ ପୋଲିସ ମହିଳାଙ୍କ ସ୍ୱାମୀ ମଙ୍ଗଳୁ ଶବରକୁ ଜେରା କରୁଥିଲା । ପରେ ଯୁଜୁମୁରା ପୋଲିସ ଶନିବାର ଗଇଲଗୁଡି ଜଙ୍ଗଲ ନିକଟରେ ମାଟିତଳୁ ନିଖୋଜ ମହିଳା ପଦ୍ମିନି ଶବରଙ୍କ ମୄତଦେହକୁ ଉଦ୍ଧାର କରିଛି । ଏହି ଘଟଣାରେ ଯୁଜୁମୁରା ପୋଲିସ ଅଭିଯୁକ୍ତ ସ୍ୱାମୀ ମଙ୍ଗଳୁ ଶବରଙ୍କୁ ଗିରଫ କରିଥିବା ଯୁଜୁମୁରା ପୋଲିସ ସୂଚନା ଦେଇଛି । ମଙ୍ଗଳୁ ନିଜ ସ୍ତ୍ରୀ ପଦ୍ମିନୀକୁ ହତ୍ୟା କରି ମାଟି ତଳେ ପୋତି ଦେଇଥିବା ବେଳେ ଶନିବାର ମାଜିଷ୍ଟ୍ରେଟ ମମତା ନନ୍ଦ, ଏସଡିପିଓ ପ୍ରଶାନ୍ତ ମେହେର ଓ ସାଇଣ୍ଟିଫିକ୍ ଟିମର ଉପସ୍ଥିତିରେ ନିଖୋଜ ମହିଳାର ମୄତଦେହକୁ ଉଦ୍ଧାର କରାଯାଇଥିବା ପୋଲିସ ସୂଚନା ଦେଇଛି ।
ଇଟିଭି ଭାରତ, ସମ୍ବଲପୁର
