ସମ୍ବଲପୁର: ଶିଳ୍ପ ସମୃଦ୍ଧ ଜିଲ୍ଲା ସମ୍ବଲପୁର l ଏହି ଜିଲ୍ଲାର ରେଙ୍ଗାଲି ବ୍ଲକ ଓ ହୀରାକୁଦ ସହର ଅଞ୍ଚଳରେ ରହିଛି ଏକାଧିକ ଶିଳ୍ପ ଅନୁଷ୍ଠାନ l ହେଲେ ଜିଲ୍ଲାରେ କାମର ଅଭାବ ଯୋଗୁଁ ହଜାର ହଜାର ଦାଦନ ଶ୍ରମିକ ରାଜ୍ୟ ବାହାରକୁ କାମ କରିବାକୁ ଯାଉଛନ୍ତି l ରାଜ୍ୟ ସରକାରଙ୍କ ଦାଦନ ପ୍ରବଣ ଜିଲ୍ଲାର ତାଲିକାରେ ସମ୍ବଲପୁର ଜିଲ୍ଲା ନଥିବା ସତ୍ତ୍ବେ ପ୍ରାୟ 13 ହଜାର ଶ୍ରମିକ ରାଜ୍ୟ ବାହାରେ କାର୍ଯ୍ୟ କରୁଥିବା ଜଣାପଡିଛି l
ଗତ କରୋନା ସମୟରେ ରାଜ୍ୟ ବାହାରୁ ସମ୍ବଲପୁର ଫେରିଥିବା ଶ୍ରମିକଙ୍କ ସଂଖ୍ୟାରୁ ଏହି ତଥ୍ୟ ମିଳିଥିଲା l ତେବେ ଗତ ବର୍ଷ ଜୁଲାଇ ମାସରେ ବିଧାନସଭାରେ ରାଜ୍ୟର ଦାଦନ ପ୍ରବଣ ଜିଲ୍ଲା ଭାବରେ 14 ଜିଲ୍ଲା ଘୋଷଣା କରାଯାଇଥିଲା l ଏହି ଜିଲ୍ଲା ଗୁଡିକ ହେଲା ବାଲାଙ୍ଗୀର, ବରଗଡ଼, ସୁବର୍ଣ୍ଣପୁର, ନୁଆଁପଡା,ଗଞ୍ଜାମ ଗଜପତି, କୋରାପୁଟ, ରାୟଗଡା, ନବରଙ୍ଗପୁର,ପୁରୀ, କେନ୍ଦ୍ରାପଡା, ସୁନ୍ଦରଗଡ଼ ଓ ଖୋର୍ଦ୍ଧା ଜିଲ୍ଲା l ଏହି ଜିଲ୍ଲା ତାଲିକାରେ ସମ୍ବଲପୁର ଜିଲ୍ଲା ନ ଥିଲେ ମଧ୍ୟ ସମ୍ବଲପୁର ଜିଲ୍ଲାର ରେଢ଼ାଖୋଲ, ନାକଟିଦେଉଳ ଓ ମାନେଶ୍ଵର, ଧନକଉଡ଼ା ବ୍ଲକ ର ବହୁ ଶ୍ରମିକ ଦାଦନ ଖଟିବାକୁ ଆନ୍ଧ୍ର ପ୍ରଦେଶ, ତାମିଲନାଡୁ ଓ ତେଲେଙ୍ଗାନାକୁ ଯାଉଥିବା ନଜର ରହିଛି l
ସୂଚନା ଅନୁସାରେ, ଗତ 2019 ମସିହାରେ ସମ୍ବଲପୁର ଜିଲ୍ଲାରେ ବିଭିନ୍ନ ଲାଇସେନ୍ସ ପ୍ରାପ୍ତ ସଂସ୍ଥା ଦ୍ୱାରା ପ୍ରାୟ 9500 ଜଣ ଶ୍ରମିକ ରାଜ୍ୟ ବାହାରକୁ କାମ କରିବାକୁ ଯାଇଥିଲେ l 2020 ରେ ଏହି ସଂଖ୍ୟା ବୃଦ୍ଧି ପାଇ 11256 ରେ ପହଞ୍ଚିଥିଲା l ସେହିଭଳି 2021 ରେ 13036 ଥିବା ବେଳେ 2022 ରେ 13249 ରେ ପହଞ୍ଚିଥିବା ବିଶିଷ୍ଟ ସୂତ୍ରରୁ ସୂଚନା ମିଳିଛି l ଆଉ ଚଳିତ ବର୍ଷ ଏହା ପାଖାପାଖି 14ହଜାରରେ ପହଞ୍ଚିବା ଅନୁମାନ କରାଯାଇଛି । ହେଲେ ଜିଲ୍ଲା ଶ୍ରମ ଅଧିକାରୀ ଏନେଇ କୌଣସି ସୂଚନା ନ ଥିବା କହିଛନ୍ତି l
ସେ କହିଛନ୍ତି, "ଯେଉଁ ଲୋକମାନେ ଜିଲ୍ଲା ଶ୍ରମ ବିଭାଗ ପାଖରେ ପଞ୍ଜିକରଣ କରି ରାଜ୍ୟ ବାହାରକୁ କାମ କରିବାକୁ ଯାଆନ୍ତି କେଵଳ ସେମାନଙ୍କ ତଥ୍ୟ ରହିଛି l ତେବେ ଯେଉଁମାନେ ନିଜ ଇଛାରେ ଜିଲ୍ଲା ପ୍ରଶାସନ ର ଅଜାଣତରେ ରାଜ୍ୟ ବାହାରକୁ ଯାଉଛନ୍ତି ତାକୁ ଦାଦନ ଶ୍ରମିକ ଭାବେ ଗଣନା କରାଯାଇ ପାରିବ ନାହିଁ l ଯଦି 5 ଜଣରୁ ଅଧିକ ଶ୍ରମିକ କୌଣସି ମଧ୍ୟସ୍ଥି ଯୋଗେ ଜିଲ୍ଲା ପ୍ରଶାସନ ଠାରେ ପଞ୍ଜିକରଣ କରି ରାଜ୍ୟ ବାହାରକୁ ଯାଉଛନ୍ତି ତା ହେଲେ ସେମାନଙ୍କୁ ଦାଦନ ଭାବେ ଗଣନା କରାଯାଏ l ସେହିପରି ସମ୍ବଲପୁର ଜିଲ୍ଲାରେ ଶିଳ୍ପ ଅନୁଷ୍ଠାନ ସବୁ ଥିବାରୁ ବହୁତ କମ ଲୋକ ରାଜ୍ୟ ବାହାରକୁ କାମ କରିବାକୁ ଯାଉଛନ୍ତି l" ଦାଦନ ସମସ୍ୟା ରୋକିବା ଜିଲ୍ଲା ଶ୍ରମ ବିଭାଗ ପକ୍ଷରୁ ସଚେତନତା କରାଯାଉଥିବା ଜିଲ୍ଲା ଶ୍ରମ ଅଧିକାରୀ ସୂଚନା ଦେଇଛନ୍ତି l
ଇଟିଭି ଭାରତ, ସମ୍ବଲପୁର
