ସମ୍ବଲପୁର: ଦୀପାବଳି ରାତିରେ ଚୋରଙ୍କ ଉନ୍ମତ୍ତ କାଣ୍ଡ । ଘରେ ବୃଦ୍ଧାଙ୍କୁ ଏକାକୀ ପାଇ ବୁଲାଇଲେ କଳାକନା । ସମ୍ବଲପୁର ସହର ଧନୁପାଲି ଥାନା ଅନ୍ତର୍ଗତ ଗିରିଜା ନଗରରେ ଅଞ୍ଚଳରେ ଗତକାଲି(ଗୁରୁବାର) ରାତି ପାଖାପାଖି ୨ଟା ସମୟରେ ଡକାୟତି ହୋଇଛି । ୪ ଜଣ ଚୋର ଗ୍ରୀଲ କାଟି ଘରେ ପଶିବା ସହ ୪ ଲକ୍ଷ ଟଙ୍କାର ସୁନାଗହଣା ଓ ଜିନିଷପତ୍ର ଲୁଟି ନେଇଛନ୍ତି ।
ସୂଚନାଯୋଗ୍ୟ, ଗିରିଜା ନଗରର ସୁମିତ୍ରା ପାଢୀ ନାମକ ଜଣେ ବୃଦ୍ଧା ନିଜ ଝିଅ ଘରେ ଏକାକୀ ଥିଲେ । ଏହି ସୁଯୋଗରେ ଗତକାଲି(ଗୁରୁବାର) ରାତିରେ କିଛି ଦୁର୍ବୃତ୍ତ ତାଙ୍କ ଘରେ ଗ୍ରୀଲ କାଟି ପଶିଥିଲେ । ବୃଦ୍ଧାଙ୍କୁ ଧମକ ଦେଇ ଘରେ ଯାହା ମୂଲ୍ୟବାନ ଅଳଙ୍କାର ଥିଲା ସବୁ ଲୁଟି ନେଇଥିଲେ ।
ଏନେଇ ଅଭିଯୋଗ ପରେ ଘଟଣାସ୍ଥଳରେ ପୋଲିସ ଏବଂ ସାଇଣ୍ଟିଫିକ୍ ଟିମ ସନ୍ଧାନୀ କୁକୁର ସହ ସେଠାରେ ପହଞ୍ଚି ଛାନଭିନ୍ ଆରମ୍ଭ କରିଛନ୍ତି । ସ୍ଥାନୀୟ ଅଞ୍ଚଳରେ ପୋଲିସ ପାଟ୍ରୋଲିଂ ଠିକ୍ ଭାବେ ହେଉନଥିବାରୁ ଏଭଳି ଘଟଣାମାନ ଘଟୁଥିବା ସ୍ଥାନୀୟ ଲୋକେ କହିଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରାଣା, ଇଟିଭି ଭାରତ
