ସମ୍ବଲପୁର: ଜିଲ୍ଲାର ମାନେଶ୍ବର ବ୍ଲକ ବତେମୁରା ଗ୍ରାମ ପଞ୍ଚାୟତର ସୁରଡ଼ା ଗାଁରେ କିଡନୀ ରୋଗ ଆତଙ୍କ । ବର୍ତ୍ତମାନ ସୁଦ୍ଧା ଏହି ଗାଁରେ 9 ଜଣ ଲୋକ କିଡନୀ ଜନିତ ରୋଗ କାରଣରୁ ନିଜ ପ୍ରାଣ ହରାଇଲେଣି। ମାତ୍ର ଗ୍ରାମବାସୀ ଅଭିଯୋଗ କରିଛନ୍ତି ଆଉ ଏବେ 7ଜଣ କିଡନୀ ରୋଗରେ ଆକ୍ରାନ୍ତ ହୋଇ ଜୀବନ କାଟୁଛନ୍ତି । ତେବେ ଗାଁ ଲୋକଙ୍କୁ କାହିଁକି କିଡନୀ ରୋଗ ହେଉଛି ତାର କାରଣ ଖୋଜିପାରୁନି ପ୍ରଶାସନ ।
ଏହି ଗ୍ରାମରେ 100ରୁ ଅଧିକ ପରିବାର ବସବାସ କରନ୍ତି । ଅଧିକାଂଶ ପରିବାରର ଲୋକେ ଦିନ ମଜୁରିଆ ଶ୍ରେଣୀର। ଆଉ ଏବେ ଗାଁରେ ଆତଙ୍କ ଖେଳାଇଛି କିଡନୀ ରୋଗ । ବର୍ତ୍ତମାନ ସୁଦ୍ଧା 9 ଜଣ ଏହି ରୋଗରେ ପ୍ରାଣ ମଧ୍ୟ ହରାଇଲେଣି । ଉକ୍ତ ଗାଁର ସାରଥୀ ଲୁହା ନିଜେ କିଡନୀ ରୋଗରେ ପୀଡିତ ଥିବା ବେଳେ ସେ ପୂର୍ବରୁ ତାଙ୍କର 2 ଭାଇ ଦାଶରଥି ଲୁହା ଓ ଭାଗିରଥି ଲୁହାଙ୍କୁ କିଡନୀ ରୋଗରେ ହରାଇଛନ୍ତି । ସେପଟେ ତାଙ୍କ ପତ୍ନୀ ମଧ୍ୟ କିଡନୀ ରୋଗରେ ପୀଡିତ ଥିବା ସେ କହିଛନ୍ତି।
ଆର୍ଥିକ ସ୍ଥିତି ଦୁର୍ବଳ ଥିବାରୁ ଅଧିକାଂଶ ଲୋକେ ଭଲରେ ନିଜର ଚିକିତ୍ସା କରାଇବାକୁ ଅକ୍ଷମ ହେଉଛନ୍ତି । ଏଭଳି ପରିସ୍ଥିତିରେ କିଛି ଲୋକ ଏଠିକାର ପାନୀୟଜଳ ଯୋଗୁ ଏଭଲି ରୋଗ ହେଉଥିବା ଆଶଙ୍କା କରୁଛନ୍ତି। ହେଲେ ତାହା ସ୍ପଷ୍ଟ ହୋଇପାରିନି। ଏନେଇ ସ୍ଥାନୀୟ ବିଡ଼ିଓଙ୍କୁ ଜଣାଇବା ପରେ ଏକ ମେଡିକାଲ ଟିମ ବିଭିନ୍ନ ନଳକୂପର ନମୁନା ସଂଗ୍ରହ କରି ନେଇଥିବାର ଗାଁ ଲୋକେ କହିଛନ୍ତି।
ଅନ୍ୟପଟେ ସ୍ଥାନୀୟ ସଚେତନ ଲୋକଙ୍କ କହିବା କଥା ହେଲା ଯେ ଅନ୍ତତଃ କିଡନୀ ରୋଗର କାରଣ ସ୍ପଷ୍ଟ ହୋଇଗଲେ ଲୋକେ ସଚେତନ ହୁଅନ୍ତେ । କିନ୍ତୁ ପ୍ରଶାସନ ତାହା ସ୍ପଷ୍ଟ କରୁନି । ତେବେ ଏନେଇ ମାନେଶ୍ବର ବ୍ଲକର ବ୍ଲକ ଉନ୍ନୟନ ଅଧିକାରୀ ଚିନ୍ମୟୀ କୁଅଁର କ୍ୟାମେରା ସାମ୍ନାରେ କିଛି କହିବାକୁ ମନା କରିଥିଲେ ମଧ୍ୟ ଏହି ସୂଚନା ଦେଇଛନ୍ତି ଯେ ଜିଲ୍ଲା ପ୍ରଶାସନର ଏକ ମେଡିକାଲ ଟିମ ଘଟଣାସ୍ଥଳ ପରିଦର୍ଶନ କରି ପାନୀୟ ଜଳର ନମୁନା ସଂଗ୍ରହ କରିଛି। ପରୀକ୍ଷା ପାଇଁ RWSS ବିଭାଗକୁ ହସ୍ତାନ୍ତର କରିଛି । ଅନ୍ୟପଟେ ସ୍ଥାନୀୟ ବିଧାୟକ ନାଉରୀ ନାଏକ ଏନେଇ ଜିଲ୍ଲା ପ୍ରଶାସନକୁ ଶୀଘ୍ର ପଦକ୍ଷେପ ନେବାକୁ ଦାବି ଜଣାଇବେ ବୋଲି କହିଛନ୍ତି।
ତେବେ ବର୍ତ୍ତମାନ ପ୍ରଶ୍ନ ଉଠୁଛି ଏପରି ପରିସ୍ଥିତିରେ ଲୋକ କ'ଣ କରିବେ । ରୋଗର କାରଣ ଜାଣିଲେ ହିଁ ସେମାନେ ସତର୍କତା ଅବଲମ୍ବନ କରିବେ କିନ୍ତୁ ଏଠାରେ ତ କାରଣ ହିଁ ଅସ୍ପଷ୍ଟ।
ସମ୍ବଲପୁରରୁ ଜୁସମନ୍ ରଣା, ଇଟିଭି ଭାରତ
