ସମ୍ବଲପୁର: ଜିଲ୍ଲାର ବିଭିନ୍ନ ପୂଜା ମଣ୍ଡପରେ ମା’ ଦୁର୍ଗାର ପୂଜାର୍ଚ୍ଚନା ଆରମ୍ଭ ହୋଇଛି । ପ୍ରମୁଖ ପୂଜା କମିଟି ଗୁଡ଼ିକର ଆକର୍ଷଣୀୟ ତୋରଣ ଓ ସାଜସଜ୍ଜା ଲୋକଙ୍କୁ ପୂଜା ମଣ୍ଡପ ଆଡକୁ ଆକର୍ଷିତ କରିଛି। ସମ୍ବଲପୁରର ଅନ୍ୟତମ ପ୍ରମୁଖ ପୂଜା ମଣ୍ଡପ କୁହାଯାଉଥିବା ଗୋବିନ୍ଦତୋଳାରେ ଏଥର କୋଲକାତାର ନନ୍ଦିଗ୍ରାମର ଦେବୀ ମନ୍ଦିର ସଦୃଶ ତୋରଣ ତିଆରି ହୋଇଥିବା ବେଳେ ଧନୁପାଲି ପୂଜା ମଣ୍ଡପର ତୋରଣ ଏଥର ଇକୋ ଫ୍ରେଣ୍ଡଲି । ଏଠାରେ ପ୍ରାକୃତିକ ଓ ବନଜାତ ଦ୍ରବ୍ୟରେ ତିଆରି ହୋଇଛି ତୋରଣ। ଏହି ମଣ୍ଡପରେ ପ୍ଲାଷ୍ଟିକ ବାରଣର ସନ୍ଦେଶ ଦିଆଯାଇଛି।
ଗୋବିନ୍ଦତୋଳା ପୂଜା ମଣ୍ଡପରେ ଶୁକ୍ରବାର ପୂର୍ବାହ୍ନ 10ଟା ପରେ ପୂଜା ଆରମ୍ଭ ହୋଇଥିଲା । ପ୍ରଥମେ, ସ୍ନାନ, ନ୍ୟାସ, ଜୀବନ୍ୟାସ, ପ୍ରାଣ ପ୍ରତିଷ୍ଠା, ଉପଚାର ପୂଜା, ଅରାତିକ ଚଣ୍ଡୀ ପାଠ ଆଦି ପୂଜା କରାଯାଇଥିଲା । ଶନିବାର ସକାଳ 8ଟା ପରେ ମହାଷ୍ଟମୀ ପୂଜା ହେବ। ତେବେ କୋଲକାତାର ନନ୍ଦିଗ୍ରାମର ଦେବୀ ମନ୍ଦିର ଢାଞ୍ଚାରେ ତିଆରି ହୋଇଥିବା ଏହି ମଣ୍ଡପର ତୋରଣ ବେଶ ଆକର୍ଷିତ କରୁଛି ଶ୍ରଦ୍ଧାଳୁଙ୍କୁ । ଚଳିତବର୍ଷ ଏହି ପୁଜା କମିଟିର ବଜେଟ ରହିଛି 30 ଲକ୍ଷ ଟଙ୍କା ।
ସେପଟେ ଅନ୍ୟତମ ପ୍ରମୁଖ ପୂଜା କମିଟି ଧନୁପାଲିର ତୋରଣକୁ ନେଇ ମଧ୍ୟ ସବୁଆଡେ ଚର୍ଚ୍ଚା। ଏହି ପୂଜା କମିଟିର ତୋରଣ ଖୁବ ଆକର୍ଷଣୀୟ ହେବା ସହ ଲୋକଙ୍କୁ ପ୍ଲାଷ୍ଟିକ ମୁକ୍ତ ପରିବେଶର ବାର୍ତ୍ତା ଦେଉଛି । ବିନା କୌଣସି ପ୍ଲାଷ୍ଟିକର ବ୍ୟବହାରରେ କେବଳ ବନ୍ୟ ଜାତ ଦ୍ରବ୍ୟରେ ଏହି ତୋରଣ ତିଆରି ହୋଇଛି। ଏହାକୁ କୁଆଖିଆର କାରିଗର ନିର୍ମାଣ କରିଛନ୍ତି। ଏଠାରେ ଗୁରୁବାର ଦିନ ବେଲବରଣି ଓ ଅଧିବାସ ହୋଇଥିବା ବେଳେ ଶୁକ୍ରବାର ସପ୍ତମୀ ପୂଜା ହେଉଛି।
ମାଙ୍କ ଆଗମନରେ ଚଳଚଞ୍ଚଳ ହୋଇ ଉଠିଛି ସମ୍ବଲପୁର ସହର । ଆଉ ଚାରିଆଡ଼େ ସୃଷ୍ଟି ହୋଇଛି ଏକ ଆଧ୍ୟାତ୍ମିକ ପରିବେଶ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
