ସମ୍ବଲପୁର: ବୁର୍ଲା ମେଡିକାଲରେ ରୋଗୀଙ୍କ ସମ୍ପର୍କୀୟଙ୍କୁ ହେପାଜତକୁ ନେଇଛି ପୋଲିସ । ଡାକ୍ତରୀ ଛାତ୍ର ନିର୍ଯାତନା ଦେବା ଭିଡିଓ ଭାଇରାଲ ହେବା ପରେ ସମ୍ବଲପୁରରେ ଏନେଇ ଦୃଢ଼ ପ୍ରତିକ୍ରିୟା ପ୍ରକାଶ ପାଇଛି । ଭିଡ଼ିଓରେ ରୋଗୀଙ୍କ ସମ୍ପର୍କୀୟ ଝସକେତନ ରାଉତଙ୍କ ସାର୍ଟ ଚିରିଦେବା ଓ ଭୁଲ ସ୍ବୀକାର କରିବାକୁ କହି କାନ ଧରି ଉଠବସ କହୁଥିବାର ଦୃଶ୍ୟକୁ ସମ୍ବଲପୁର ସଚେତନ ନାଗରିକ ମହଲରେ ଏହା ଡ଼ାକ୍ତରଙ୍କ କଙ୍ଗାରୁ କୋର୍ଟ ବୋଲି କୁହାଯାଉଛି ।
ଏହାଦ୍ବାରା ସମାଜରେ ଡାକ୍ତରଙ୍କ ପ୍ରତି ଏକ ନକାରାତ୍ମକ ସନ୍ଦେଶ ଯାଉଛି ବୋଲି ଚର୍ଚ୍ଚା ହେଉଛି। ଏପଟେ ସମ୍ବଲପୁର ଏସପି ଡାକ୍ତରଙ୍କ ଆକ୍ରମଣ ଘଟଣାରେ 2 ଜଣକୁ ଗିରଫ କରି କୋର୍ଟ ଚାଲାଣ କରାଯାଇଥିବା କହିବା ସହ ଭାଇରାଲ ଭିଡ଼ିଓର ଯାଞ୍ଚ ହେଉଥିବାର କହିଛନ୍ତି । ଅନ୍ୟପଟେ ରୋଗୀଙ୍କ ପରିବାର ନିଜ ପିଲାଙ୍କୁ ନିର୍ଦ୍ଦୋଷ କହିବା ସହ ଡାକ୍ତରଙ୍କ ବିରୁଦ୍ଧରେ ବୁର୍ଲା ମେଡିକାଲରେ ଏତଲା ଦେଇଛନ୍ତି ।
କଙ୍ଗାରୁ କୋର୍ଟ ପରି ଦୃଶ୍ୟ ବୁର୍ଲା ମେଡିକାଲ ପରିସରରେ ଥିବା ଫାଣ୍ଡି ସମ୍ମୁଖରେ ଦେଖିବାକୁ ମିଳିଥିଲା। ପୋଲିସ ହେପାଜତରେ ଥିବା ଏକ ଅଭିଯୁକ୍ତକୁ ସମ୍ବଲପୁର ଭୀମସାର ମେଡିକାଲ ଛାତ୍ର ଯେଉଁ ନିର୍ଯାତନା ଦେଇଥିଲେ ତାକୁ ନେଇ ଚାରିଆଡେ ଚର୍ଚ୍ଚା। ପୋଲିସ ବିଭାଗର ଅତିରିକ୍ତ ଏସପି ଓ ବୁର୍ଲା ଏସଡିପିଓ ସହ 3 ପ୍ଲାଟୁନ ପୋଲିସ ଉପସ୍ଥିତି ସତ୍ତ୍ବେ ପୋଲିସ ହେପାଜତରେ ଥିବା ରୋଗୀଙ୍କ ସମ୍ପର୍କୀୟଙ୍କ ସାର୍ଟ ଚିରି , ଦୋଷ ସ୍ବୀକାର କରିବାକୁ କହି କାନ ଧରି ଉଠବସ କରାଇ ଗୋଡ଼ ଧରି କ୍ଷମା ମାଗିବାକୁ କହୁଥିବାର ଭିଡିଓ ଡାକ୍ତରୀ ଛାତ୍ର ମାନେ ଭାଇରାଲ କରିଥିବା ସୂଚନା ରହିଛି।
ଏହି ଘଟଣାକୁ ସମ୍ବଲପୁରବାସୀ ତୀବ୍ର ନିନ୍ଦା କରିବା ସହ ଏହାକୁ କଙ୍ଗାରୁ କୋର୍ଟ ବୋଲି କହିଛନ୍ତି। ଏପଟେ ଅଭିଯୁକ୍ତଙ୍କ ପରିବାର ନିଜକୁ ନିର୍ଦ୍ଦୋଷ ବୋଲି କହିଛନ୍ତି ଓ ଡାକ୍ତରୀ ଛାତ୍ର ଓଲଟା ମାଡ଼ ମାରି ପୋଲିସକୁ ଚାପ ପକାଇ ଫସାଇଥିବାର ଅଭିଯୋଗ କରିଛନ୍ତି। ଏନେଇ ରୋଗୀଙ୍କ ସମ୍ପର୍କୀୟ ବୁର୍ଲା ଥାନାରେ ଏକ ଏତଲା ଦେଇଥିବାର କହିଛନ୍ତି।
ଅନ୍ୟପଟେ ସମ୍ବଲପୁର ଏସପି କନୱର ବିଶାଲ ସିଂ ଭାଇରାଲ ଭିଡିଓର ଯାଞ୍ଚ ହେଉଛି ବୋଲି କହିଛନ୍ତି। ଯାଞ୍ଚ ହେବା ପରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି କହିଛନ୍ତି ।
ଗୋଟିଏ ପଟେ ଡାକ୍ତରଙ୍କୁ ଭଗବାନଙ୍କ ଦ୍ବିତୀୟ ରୂପ ବୋଲି କୁହାଯାଉଥିବା ବେଳେ ଏବେ ଡାକ୍ତରୀ ଛାତ୍ର ମାନେ ନିଜର ୟୁନିୟନର ସମର୍ଥନରେ ରୋଗୀ ସେବା ବନ୍ଦ କରିବାର ଧମକ ଦେଇ ମନମାନି କରୁଥିବାର ବହୁ ଉଦାହରଣ ଦେଖିବାକୁ ମିଲୁଛି।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
