ସମ୍ବଲପୁର: ଜିଲ୍ଲାର କୁଚିଣ୍ଡା ଉପଖଣ୍ଡର ବିଭିନ୍ନ ମଣ୍ଡିରେ ଧାନ କ୍ରୟଜନିତ ସମସ୍ୟା ଲାଗି ରହିବାରୁ ପ୍ରତିବାଦରେ ବିଜେପି ପକ୍ଷରୁ ଆନ୍ଦୋଳନ କରାଯାଇଛି । ଆଜି(ବୁଧବାର) ବିଜେପି ସମ୍ବଲପୁର ରାଜରାସ୍ତା ଅବରୋଧ କରିଛି । ଏଥିସହ ମିଲର୍ସଙ୍କ ଟାର୍ଗେଟ ନଥିବାରୁ ଧାନମଣ୍ଡି ଉଠୁନଥିବା ଅଭିଯୋଗ କରିଛି ବିଜେପି ।
ମୁଖ୍ୟତଃ ଜମନକିରା ବ୍ଲକକୁ ଧାନକ୍ରୟରେ ଟାର୍ଗେଟ ଦେବା, ଲ୍ୟାପ୍ସ ହୋଇଥିବା ଟୋକନକୁ ପୁନଃ କାର୍ଯ୍ୟକ୍ଷମ କରାଇବା ତଥା ଧାନବିକ୍ରିରୁ ବଞ୍ଚିତ ଚାଷୀଙ୍କୁ ସୁଯୋଗ ଦେବା ଆଦି ଦାବିରେ ଜମନକିରା ଠାରେ ମୁମ୍ବାଇ-କୋଲକାତା ରାଜରାସ୍ତା ଅବରୋଧ କରାଯାଇଛି । ତେବେ ମିଲର୍ସଙ୍କ ଟାର୍ଗେଟ ନଥିବାରୁ ମଣ୍ଡିରୁ ଧାନ ଉଠୁନଥିବା ଅଭିଯୋଗ କରିଛି ବିଜେପି । ଫଳରେ ଅନେକ ଚାଷୀଙ୍କ ଟୋକନ ଲ୍ୟାପ୍ସ ହୋଇଗଲାଣି । ଏହାକୁ ନେଇ ସମ୍ବଲପୁର ଜିଲ୍ଲା ବିଜେପି ପକ୍ଷରୁ ବିଗତ ଦିନରେ ଜିଲ୍ଲାପାଳ ଅଫିସ ଘେରାଉ କରାଯାଇଥିଲା । କିଛିଦିନ ପୂର୍ବରୁ ଏନେଇ ଆରଡିସିଙ୍କୁ ଦାବିପତ୍ର ଦେବା ସହିତ ଚାଷୀଙ୍କ ଧାନବିକ୍ରି ପାଇଁ ଟାର୍ଗେଟ ନଆସିଲେ ରାସ୍ତା ଅବରୋଧ ପାଇଁ ଚେତାବନୀ ମଧ୍ୟ ଦିଆଯାଇଥିଲା ।
ଏନେଇ କୌଣସି ସମାଧାନ ନହେବାରୁ ଭାରତୀୟ ଜନତା ପାର୍ଟି ପକ୍ଷରୁ ୫୩ ନଂ ଜାତୀୟ ରାଜପଥ ଷଣ୍ଢପଥର ଠାରେ ରାସ୍ତା ଅବରୋଧ କରାଯାଇ ଥିବାବେଳେ ୪୯ ନଂ ଜାତୀୟ ରାଜପଥର ସଇଡା, କୁଚିଣ୍ଡା-ବଣାଇଁ ରାସ୍ତାର ଟାଇଁସର, କୁଚିଣ୍ଡା-ଜମନକିରା ରାସ୍ତାର ବକ୍ସମା ଓ କୁଚିଣ୍ଡା-ଲଇଡା ରାସ୍ତାର ସାତକମା ଠାରେ ରାସ୍ତା ଅବରୋଧ କରାଯାଇଛି । ଫଳରେ କୁଚିଣ୍ଡାରୁ ସମ୍ବଲପୁର, ଝାରସୁଗୁଡା, ବାମରା, ଜମନକିରା, ଦେବଗଡ଼ ଆଦି ସମସ୍ତ ମୁଖ୍ୟରାସ୍ତା ବନ୍ଦ ରହିଥିବାରୁ ଶହ ଶହ ଯାନବାହାନ ଅଟକି ରହିଛି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
