ସମ୍ବଲପୁର: ବୁର୍ଲା ଭୀମସାରରେ ରୋଗୀଙ୍କ ସମ୍ପର୍କୀୟଙ୍କୁ ମରଣାନ୍ତକ ଆକ୍ରମଣ ଓ କଙ୍ଗାରୁ କୋର୍ଟ ଘଟଣାକୁ ବିତିଯାଇଛି 20 ଦିନ । ହେଲେ ଆଜି ଯାଏଁ କଙ୍ଗାରୁ କୋର୍ଟ କରିଥିବା ଡାକ୍ତରୀ ଛାତ୍ରଙ୍କୁ ଗିରଫ କରିନାହିଁ ପୋଲିସ । ବରଂ ଘଟଣାରେ ନିର୍ଯ୍ୟାତନାର ଶିକାର ହୋଇଥିବା 2 ଯୁବକ 10 ଦିନ ଧରି ଜେଲ ଦଣ୍ଡ ଭୋଗିଛନ୍ତି । ଉଭୟ ଜେଲରୁ ମୁକ୍ତ ହେବା ପରେ ନ୍ୟାୟ ପାଇଁ ପରିବାର ସହ ଶୁକ୍ରବାର ସମ୍ବଲପୁର ଏସପିଙ୍କୁ ଭେଟିଛନ୍ତି । ଏହା ସହ ଏକ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରି ଲିଖିତ ଦାବିପତ୍ର ଦେଇଛନ୍ତି ।
ସୂଚନାନୁସାରେ, ଗତ ଅକ୍ଟୋବର 20 ତାରିଖରେ ସମ୍ବଲପୁର ବୁର୍ଲା ଭୀମସାର ମେଡିକାଲର ସ୍ନାୟୁଶଲ୍ୟ ବିଭାଗର ସହକାରୀ ପ୍ରଫେସର ସୂର୍ଯ୍ୟକାନ୍ତ ପାଟଯୋଶୀ ଅସ୍ତ୍ରୋପଚାର ଗୃହରେ ଅସ୍ତ୍ରୋପଚାର ପାଇଁ ପ୍ରସ୍ତୁତ ହେଉଥିଲେ ।
ସେ ସମୟରେ ଝାରସୁଗୁଡା ଅଞ୍ଚଳର ଜଣେ ପକ୍ଷାଘାତ ରୋଗୀଙ୍କ ପୁଅ ମୁକେଶ ବେହେରା ଏବଂ ସମ୍ପର୍କୀୟ ପୁତୁରା ଝସକେତନ ରାଉଳ ଡାକ୍ତରଙ୍କୁ ଭେଟି ଘରୋଇ ନର୍ସିଂହୋମକୁ ଡିସଚାର୍ଜ କରିବା ପାଇଁ ଅନୁରୋଧ କରିଥିଲେ । ତେବେ ଡାକ୍ତର ଜଣକ ଅସ୍ତ୍ରୋପଚାର କରୁଥିବା କହି ବାହାରେ ଅପେକ୍ଷା କରିବାକୁ କହିଥିଲେ । ଏହା ପରେ ଉଭୟ ଯୁବକ ଡାକ୍ତରଙ୍କୁ ଠେଲାପେଲା କରିବା ସହିତ ଆକ୍ରମଣ କରିଥିଲେ । ଡାକ୍ତର ଚିତ୍କାର କରି ପିଜି ଡାକ୍ତରୀ ଛାତ୍ରଙ୍କୁ ଡାକିବା ପରେ ପିଜି ଛାତ୍ର ସେହି ଯୁବକ ଦୁଇ ଜଣଙ୍କୁ କାବୁ କରି ମାଡ ମାରିବା ସହ ଏକ କକ୍ଷରେ ଅଟକ ରଖିଥିଲେ ।
ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଡାକ୍ତରୀ ଛାତ୍ରଙ୍କ ଆକ୍ରୋଶର ଶିକାର ହୋଇଥିବା ଯୁବକଙ୍କୁ ଉଦ୍ଧାର କରି ମେଡିକାଲ ଫାଣ୍ଡିକୁ ଆଣିଥିଲେ । ପରେ ପ୍ରାୟ 200ଜଣ ଡାକ୍ତରୀ ଛାତ୍ର ଆସି ଫାଣ୍ଡିକୁ ଘେରାଉ କରିବା ସହିତ ପୋଲିସ ହେପାଜତରୁ 2 ଯୁବକଙ୍କୁ ବାହାରକୁ ଆଣିଥିଲେ । ଏଥିସହିତ ପୋଲିସ ଉପସ୍ଥିତିରେ କଙ୍ଗାରୁ କୋର୍ଟ କରି ଡାକ୍ତରୀ ଛାତ୍ରମାନେ ଝସକେତନଙ୍କୁ କ୍ଷମା ମାଗିବାକୁ କହିବା ସହ କାନ ଧରି ବସ ଉଠ କରାଇଥିଲେ । ଯାହାର ଏକ ଭିଡିଓ ଭାଇରାଲ ହୋଇଥିଲା ।
ତେବେ ନିର୍ଯାତନାର ଶିକାର ହୋଇଥିବା 2 ଯୁବକଙ୍କୁ ପୋଲିସ ଡାକ୍ତରଙ୍କୁ ଆକ୍ରମଣ କରିଥିବା ଅଭିଯୋଗରେ ଧାରା 307 ଲଗାଇ ଜେଲ ପଠାଇଦେଇଥିଲା ପୋଲିସ । ହେଲେ ଆଜି ଯାଏଁ କଙ୍ଗାରୁ କୋର୍ଟ କରି ନିର୍ଯ୍ୟାତନା ଦେଇଥିବା ଅଭିଯୁକ୍ତଙ୍କୁ ଗିରଫ କରାଯାଇନାହିଁ । ଏନେଇ ପୀଡିତଙ୍କ ପରିବାର ସମ୍ବଲପୁର ଏସପିଙ୍କୁ ଭେଟି ଦୋଷୀ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ।
ନିର୍ଯ୍ୟାତନା ଶିକାର ହୋଇଥିବା 2 ଯୁବକ ବର୍ତ୍ତମାନ କଲେଜ ଛାତ୍ର ହୋଇଥିବା ବେଳେ ସେମାନେ ଦଳିତ ହୋଇଥିବାରୁ ତାଙ୍କୁ ନ୍ୟାୟ ମିଳୁନଥିବା ଅଭିଯୋଗ କରଛନ୍ତି । ଏହା ସହିତ ନିର୍ଯାତନା ଦେଇଥିବା ଲୋକଙ୍କ ବିରୁଦ୍ଧରେ ଆଟ୍ରୋସିଟି ଆକ୍ଟ କାହିଁକି ଲଗାଯାଇନାହିଁ ବୋଲି ପ୍ରଶ୍ନ କରିଛନ୍ତି । ଅନ୍ୟପଟେ ସମ୍ବଲପୁର ପୋଲିସ ଘଟଣାର ତଦନ୍ତ ଚାଲୁଛି ବୋଲି ଚିରାଚରିତ ଢଙ୍ଗରେ ପ୍ରତିକ୍ରିୟା ଦେଇଛନ୍ତି । ଯଦି ଆଗାମୀ ଦିନରେ କଙ୍ଗାରୁ କୋର୍ଟରେ ନିର୍ଯ୍ୟାତିତ ଯୁବକଙ୍କୁ ନ୍ୟାୟ ନମିଳେ ତେବେ ଆସନ୍ତା 20 ତାରିଖରେ ପଶ୍ଚିମ ଓଡିଶା ଦଳିତ ସୁରକ୍ଷା ସମିତି ତରଫରୁ ବୁର୍ଲାରେ ଏକ ପ୍ରତିବାଦ ଶୋଭାଯାତ୍ରା କରାଯିବ ବୋଲି କୁହାଯାଇଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
