ସମ୍ୱଲପୁର: ରାଜ୍ୟରେ ଛାତ୍ର ସଂସଦ ନିର୍ବାଚନ ବନ୍ଦ ନିଷ୍ପତ୍ତିକୁ ନେଇ ଜୋରଦାର ବିରୋଧ ଦେଖିବାକୁ ମିଳିଛି । ସରକାରଙ୍କ ଏଭଳି ନିଷ୍ପତ୍ତିକୁ ବିରୋଧ କରିବା ସହ ବିକ୍ଷୋଭ ପ୍ରଦର୍ଶନ କରିଛି ସମ୍ବଲପୁର ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ l ଶୁକ୍ରବାର ସମ୍ବଲପୁରରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ପକ୍ଷରୁ ସମ୍ବଲପୁର ଉତ୍ତରାଞ୍ଚଳ ଆରଡିସିଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବା ସହ ସରକାର ବିରୋଧି ନାରାବାଜି ଦିଆଯାଇଛି । ରାଜ୍ୟ ସରକାର ନିଷ୍ପତ୍ତି ପରିବର୍ତ୍ତନ କରି ଯଥାଶୀଘ୍ର ଛାତ୍ର ନିର୍ବାଚନର ତାରିଖ ଘୋଷଣା କରନ୍ତୁ ବୋଲି ଦାବି ହୋଇଛି ।
ଆରଡିସି କାର୍ଯ୍ୟାଳୟ ସମ୍ମୁଖରେ ପ୍ରତିବାଦ କରି ସରକାରଙ୍କ ଉପରେ ବର୍ଷିଛି ଏବିଭିପି । ରାଜ୍ୟ ସରକାର ବିନା କାରଣରେ ନିର୍ବାଚନ ବନ୍ଦ କରିଥିବା ଅଭିଯୋଗ କରାଯାଇଛି । ଗତ 5 ବର୍ଷ ହେଲା ରାଜ୍ୟ ସରକାର ନିର୍ବାଚନ ବନ୍ଦ କରିଛନ୍ତି । ତେବେ ନିର୍ବାଚନ ଯୋଗୁଁ ଶିକ୍ଷା ଅନୁଷ୍ଠାନ ଗୁଡିକର ଶୈକ୍ଷିକ ବାତାବରଣ ନଷ୍ଟ ହେଉଥିବା ଯଦି ସରକାର କହୁଛନ୍ତି ତେବେ ଉତ୍କଳ ବିଶ୍ୱ ବିଦ୍ୟାଳୟ ଓ ବ୍ରହ୍ମପୁର ବିଶ୍ୱ ବିଦ୍ୟାଳୟର ନାକ୍ ଗ୍ରେଡେସନ କାହିଁକି ଖସିଲା ବୋଲି ଏବିଭିପି ପ୍ରଶ୍ନ କରିଛି l
ଏବିଭିପି ପକ୍ଷରୁ ଆଉ ମଧ୍ୟ କୁହାଯାଇଛି ଯେ, ବର୍ତ୍ତମାନ ଯେଉଁ ଶିକ୍ଷା ଅନୁଷ୍ଠାନ ଉପରେ ନଜର ପକେଇଲେ ଶହ ଶହ ଶିକ୍ଷକ, ଅଣ ଶିକ୍ଷକ ପଦବୀ ଖାଲି ପଡିଛି, ଶିକ୍ଷା ଅନୁଷ୍ଠାନ ଗୁଡିକରେ ଅଣଛାତ୍ର ଶାସକ ଦଳର ଗୁଣ୍ଡାଙ୍କ ପ୍ରାଦୁର୍ଭାବ ରହିଛି l ଅଣ ଛାତ୍ରଙ୍କୁ ପ୍ରୋତ୍ସାହନ ଦିଆଯାଉଛି, ନିଶା ବେପାରୀଙ୍କ ପ୍ରମୁଖ ସ୍ଥାନ ପାଲଟିଛି ଶିକ୍ଷା ଅନୁଷ୍ଠାନ l ଏଭଳି ସ୍ଥିତିରେ ନିର୍ବାଚନ ନ କରାଇବାର କଣ ପ୍ରାସଙ୍ଗିକତା ରହିଛି ବୋଲି ଏବିଭିପି ପ୍ରଶ୍ନ କରିଛି l
ଏହାମଧ୍ୟ ପଢନ୍ତୁ.. ତେଜିଲା ଛାତ୍ର ସଂସଦ ନିର୍ବାଚନ ଦାବି, କଟକରେ ଏବିଭିପିର ବିକ୍ଷୋଭ ପ୍ରଦର୍ଶନ
ସେପଟେ 5ଟି ସଚିବଙ୍କ ଗସ୍ତ ସମୟରେ ଛାତ୍ରଛାତ୍ରୀଙ୍କ ଉପସ୍ଥିିତିକୁ ନେଇ ମଧ୍ୟ କଡା ସମାଲୋଚନା କରିଛି ଏବିଭିପି । ଦଳ ପକ୍ଷରୁ କୁହାଯାଇଛି ଯେ, 5ଟି ସଚିବଙ୍କ ଗସ୍ତ ସମୟରେ ରବିବାର ଦିନ ଛାତ୍ରଛାତ୍ରୀଙ୍କୁ ରାଜନୈତିକ କାର୍ଯ୍ୟକ୍ରମକୁ ଡକାଯାଉଛି । ସଚିବଙ୍କ ଗସ୍ତ ପାଇଁ ପରୀକ୍ଷା ବାତିଲ କରାଯାଉଛି l ହେଲେ ନିର୍ବାଚନ କରାଯାଉନାହିଁ । ବିଜେଡି ସରକାରର 23 ବର୍ଷର ଶାସନରେ ସରକାରୀ ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହୋଇ ଯାଇଛି ବୋଲି ଅଭିଯୋଗ ଆଣିଛି ଏବିଭିପି ।
ଏହାମଧ୍ୟ ପଢନ୍ତୁ.. ଛାତ୍ର ସଂସଦ ନିର୍ବାଚନ ବନ୍ଦ ପ୍ରତିବାଦ, ଉଚ୍ଚଶିକ୍ଷା ମନ୍ତ୍ରୀଙ୍କ ଘରକୁ ଅଣ୍ଡାମାଡ଼
ତେବେ ଆଗାମୀ ଦିନରେ ରାଜ୍ୟ ସରକାର ନିଜର ନିଷ୍ପତ୍ତି ପରିବର୍ତ୍ତନ କରି ଛାତ୍ରସଂସଦ ନିର୍ବାଚନର ତାରିଖ ଘୋଷଣା ନ କଲେ ଭୁବନେଶ୍ୱରରେ ବଡ଼ ଧରଣର ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ।
ସମ୍ବଲପୁର, ଇଟିଭି ଭାରତ
