ସମ୍ବଲପୁର: ସାଂସ୍କୃତିକ ଶୋଭାଯାତ୍ରା ପରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ସହ ଆରମ୍ଭ ହୋଇଛି ସମ୍ବଲପୁର ମହୋତ୍ସବ । ପ୍ରଥମ ସନ୍ଧ୍ୟାରେ ରାଜ୍ୟ ତଥା ରାଜ୍ୟ ବାହାରୁ ଆସିଥିବା କଳାକାରଙ୍କ ନୃତ୍ୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିବା ସହ ମହୋତ୍ସବର ଶୋଭାକୁ ଦ୍ବିଗୁଣିତ କରିଥିଲା । ତେବେ ଶନିବାର ଆୟୋଜିତ ପ୍ରଥମ ସନ୍ଧ୍ୟାରେ ସମ୍ବଲପୁରର ଶଙ୍କର ଦତ୍ତ, ଡ଼ଃ ସବିତା ହୋତା, ଦିଲ୍ଲୀପ ବାଗ ଓ ଗୀତାଞ୍ଜଳୀ ପୋଢଙ୍କ ପରି ବିଶିଷ୍ଟ କଳାକାରମାନେ ସମ୍ବଲପୁରୀ ନୃତ୍ୟ ପରିବେଷଣ କରିଥିଲେ ।
ଏହାପରେ ଆରମ୍ଭ ହୋଇଥିଲା ଲୋକନୃତ୍ୟର ଆସର । ପ୍ରଥମେ ଉତ୍ତରପ୍ରଦେଶର ମଥୁରାରୁ ଆସିଥିବା ଶ୍ୟାମ ଲୋକକଳା ମଞ୍ଚର କଳାକାରମାନେ ଶ୍ରୀକୃଷ୍ଣ ଓ ରାଧାଙ୍କ ଶାଶ୍ବତ ପ୍ରେମକୁ ମୟୂର ନୃତ୍ୟ ମାଧ୍ୟମରେ ପରିବେଷଣ କରିଥିଲେ । ପରେ ପରେ କଳାହାଣ୍ଡିର ଘୁମୁରା, ବଲାଙ୍ଗୀର ତୁଷରାର ଘୁବୁକୁଡୁ ନୃତ୍ୟ ଦର୍ଶକଙ୍କୁ ବିଳମ୍ବିତ ରାତି ଯାଏଁ ବାନ୍ଧି ରଖିଥିଲା ।
ପୂର୍ବରୁ ସମ୍ବଲପୁରର ଏହି 23ତମ ଲୋକ ମହୋତ୍ସବର ପ୍ରଥମ ସନ୍ଧ୍ୟାରେ ଜିଲ୍ଲାପାଳ ଶୁଭମ ସକ୍ସେନା, ରେଙ୍ଗାଲୀ ବିଧାୟକ ନାଉରୀ ନାଏକ, କୁଚିଣ୍ଡା ବିଧାୟକ କିଶୋର ଚନ୍ଦ୍ର ନାଏକଙ୍କ ସମେତ ପଦ୍ମଶ୍ରୀ ଜିତେନ୍ଦ୍ରିୟ ହରିପାଲ ଓ ପଦ୍ମଶ୍ରୀ ହଳଧର ନାଗ ପ୍ରମୁଖ ଯୋଗ ଦେଇ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
