ସମ୍ବଲପୁର: ଯୁଯୁମୁରା ଥାନା ସମ୍ମୁଖରେ ମର୍ମନ୍ତୁଦ ସଡକ ଦୁର୍ଘଟଣା । ଶନିବାର ସକାଳୁ ଦୁଇଟି ଟ୍ରକ ମୁହାଁମୁହିଁ ଧକ୍କା ହେବା ଫଳରେ ଲାଗିଥିଲା ନିଆଁ । ତେବେ ଟ୍ରକରେ ଏତେ ଜୋରରେ ନିଆଁ ଲାଗିଥିଲା ଯେ, ଉଭୟ ଟ୍ରକର ଡ୍ରାଇଭର ଜୀବନ୍ତ ଦଗ୍ଧ ହୋଇଥିବାବେଳେ ହେଲପର ନିଖୋଜ ଅଛନ୍ତି ।
ତେବେ ଟ୍ରକର ସମ୍ମୁଖଭାଗ ସମ୍ପୂର୍ଣ୍ଣ ଜଳିଯାଇଛି । ଘଟଣାସ୍ଥଳରେ ପ୍ରଥମେ ସ୍ଥାନୀୟ ଲୋକେ ଏବଂ ପୋଲିସ ପହଞ୍ଚି ଉଦ୍ଧାର କରିବା ପାଇଁ ଚେଷ୍ଟା କରିଥିଲେ ମଧ୍ୟ ନିଆଁର ତେଜ ଯୋଗୁଁ ଉଦ୍ଧାର କାର୍ଯ୍ୟ ସମ୍ଭବ ହୋଇପାରିନଥିଲା । ପ୍ରଥମେ ଯୁଯୁମୁରା ଅଗ୍ନିଶମ ବିଭାଗ ନିଆଁକୁ ଆୟତ୍ତ କରିବାରେ ବିଫଳ ହେବାରୁ ସମ୍ବଲପୁରରୁ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା ।
ଦୁର୍ଘଟଣା ଯୋଗୁଁ ରାସ୍ତାରେ ଗାଡି ଯିବାଆସିବା ସମ୍ଭବ ହୋଇପାରିନାହିଁ । ହେଲପରର ପତ୍ତା ମିଳିନଥିବାବେଳେ ତଦନ୍ତ ଜାରି ରଖିଛି ପୋଲିସ । ତେବେ କୁହୁଡି ଯୋଗୁଁ ଅଥବା ଡ୍ରାଇଭରର ଆଖି ଲାଗିଯିବାରୁ ଦୁର୍ଘଟଣା ଘଟିଥିବା ସନ୍ଦେହ କରାଯାଉଛି ।
ସମ୍ବଲପୁରରୁ ବାଦଶାହା ଜୁସ୍ମନ ରାଣା, ଇଟିଭି ଭାରତ
