ରାୟଗଡା: ପୂର୍ବ ଶତ୍ରୁତାରୁ ଯୁବକକୁ ହତ୍ୟା । ଅଭିଯୁକ୍ତ ଗିରଫ । ଚାନ୍ଦିଲି ଥାନା ଅନ୍ତର୍ଗତ ତାଣ୍ଡିପୁର ଛକରେ ପୂର୍ବ ଶତ୍ରୁତାକୁ କେନ୍ଦ୍ର କରି ଏକ ନିର୍ମମ ହତ୍ୟାକାଣ୍ଡ ଘଟିଛି । ହତ୍ୟାର ଶିକାର ହୋଇଥିବା ଯୁବକ ଜଣଙ୍କ କୁମୁଟିପେଣ୍ଠ ପଞ୍ଚାୟତ ଶାନ୍ତି ନଗରର ଅର୍ଜୁନ କଣ୍ଡାଗିରି ବୋଲି ଜଣାପଡିଛି।
ହତ୍ୟାକାଣ୍ଡ ଘଟାଇଥିବା ଅଭିଯୁକ୍ତକୁ ପୋଲିସ ଅଟକ ରଖିଥିବାବେଳେ ଘଟଣାସ୍ଥଳରେ ରାୟଗଡା ଏସପି ଡା. ଶର୍ବଣା ବିବେକ ଏମ୍ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ହତ୍ୟାକାଣ୍ଡ ପରେ ଅଞ୍ଚଳରେ ପ୍ରବଳ ଉତ୍ତେଜନା ଦେଖାଦେଇଛି। ଚାନ୍ଦିଲି ପୋଲିସ ଶବ ଜବତ କରି ବ୍ୟବଚ୍ଛେଦ ପାଇଁ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛି।
ସୂଚନା ଅନୁସାରେ, ଆଜି ସନ୍ଧ୍ୟା ୭ଟାରେ ଅଭିଯୁକ୍ତ ଓ ଅର୍ଜୁନଙ୍କ ମଧ୍ୟରେ ବଚସା ହୋଇଥିଲା । ପରେ ଉଭୟଙ୍କ ମଧ୍ୟରେ ମାରପିଟ ହୋଇଥିଲା । ଏହି ସମୟରେ ଅଭିଯୁକ୍ତ ଯୁବକ, ଅର୍ଜୁନଙ୍କ ତଣ୍ଟି ଚିପି ଦେଇଥିଲା। ଫଳରେ ଶ୍ଵାସରୁଦ୍ଧ ହୋଇ ଅର୍ଜୁନଙ୍କ ମୃତ୍ୟୁ ହୋଇଥିବା ସନ୍ଦେହ କରାଯାଉଛି । ଏହା ପରେ ଅର୍ଜୁନଙ୍କ ମୃତଦେହକୁ ଅଭିଯୁକ୍ତ ଡ୍ରେନରେ ଫୋପାଡି ଦେଇଥିବା ଜଣାପଡିଛି । ସେପେଟେ ଆଇନ ଶୃଙ୍ଖଳା ପରିସ୍ଥିତିକୁ ଆଖି ଆଗରେ ରଖି ତାଣ୍ଡିପୁରରେ ପୋଲିସ ମୁତୟନ କରାଯାଇଛି।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
