ରାୟଗଡା: ଜିଲ୍ଲାରେ କମିବାର ନା ନେଉନି ଜନନୀ ଯନ୍ତ୍ରଣା । ଆମ୍ବୁଲାନ୍ସ ନମିଳିବାରୁ ବାଟରେ ବିଷମକଟକ ବ୍ଲକ କଡିଗୁମା ଗ୍ରାମର ଜଣେ ଡଙ୍ଗରିଆ ଆଦିବାସୀ ପ୍ରସୂତିଙ୍କ ପ୍ରସବ । ଡାକ୍ତରଖାନାକୁ ଚାଲି ଚାଲି ଯିବା ସମୟରେ ବାଟରେ ପ୍ରସବ କରିଛନ୍ତି ମହିଳା । ଯାହା ଜିଲ୍ଲା ସ୍ବାସ୍ଥ୍ୟ ବିଭାଗ ଉପରେ ଅଙ୍ଗୁଳି ନିର୍ଦ୍ଦେଶ କରୁଛି ।
ବିଷମକଟକ କଡିଗୁମା ଗ୍ରାମର ଡଙ୍ଗରିଆ ଆଦିବାସୀ ମହିଳା ତଲେଡି ତୁଇକା ଗର୍ଭଯନ୍ତ୍ରଣାରେ ଛଟପଟ ହେଉଥିଲେ । ତେବେ ଗାଁକୁ ରାସ୍ତା ନଥିବାରୁ ଚାଲି ଚାଲି ନିକଟସ୍ଥ ଛକକୁ ଆସିବାକୁ ପଡିଥିଲା । ତେବେ 2 କିଲୋମିଟର ଚାଲିବା ପରେ ବାଟରେ ତାଙ୍କର ପ୍ରସବ ହୋଇଥିଲା । ସେ ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ ।
ପରେ ଶିଶୁକୁ ଧରି ପୁଣି 4 କିଲୋମିଟର ଚାଲି ଚାଲି ନିକଟସ୍ଥ ଦେଗାଁ ଛକରେ ପହଞ୍ଚିଥିଲେ । ତଥାପି ଆମ୍ବୁଲାନ୍ସ ଆସିନଥିବାରୁ ଆଶା ଦିଦିଙ୍କ ସହାୟତାରେ ଏକ ଗାଡି ଭଡା କରି ଉଭୟ ମା’ ଓ ପିଲାଙ୍କୁ ବିଷମକଟକ ଡାକ୍ତରଖାନାରେ ଭର୍ତ୍ତି କରିଥିଲେ । ଏବେ ଉଭୟ ମା’ ଓ ଶିଶୁ ସୁସ୍ଥ ଥିବା ଜଣାପଡିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
