ରାୟଗଡା: ବଜ୍ରାଘାତ ନେଲା ପୁଣି ଦୁଇଜଣଙ୍କ ଜୀବନ । ଏଭଳି ଅଭାବନୀୟ ଘଟଣା ଘଟିଛି ଅମ୍ବାଦଳା ଗାଁରେ । ରାୟଗଡା ଜିଲ୍ଲା ମୁନିଗୁଡା ବ୍ଲକ ଅନ୍ତର୍ଗତ ଅମ୍ବାଦଳା ଗାଁରେ ଆଜି ଅପରାହ୍ନରେ ବଜ୍ରାଘାତ ଘଟି ଦୁଇଜଣ ଯୁବକଙ୍କ ମୃତ୍ୟୁ ଘଟିଥିବାବେଳେ ଅନ୍ୟଜଣେ ଯୁବକ ଗୁରୁତର ହୋଇଛନ୍ତି । ଗୁରୁତର ଯୁବକକୁ ରାୟଗଡା ଜିଲ୍ଲା ହସ୍ପିଟାଲରେ ଭର୍ତି କରାଯାଇଛି ।
ମିଳିଥିବା ସୂଚନା ଅନୁଯାୟୀ ଆଜି(ଶନିବାର) ଅପରାହ୍ନରେ 2 ଜଣ ସାଙ୍ଗ ନଦୀକୁ ଶୌଚ ପାଇଁ ଯାଇଥିବାବେଳେ ଅନ୍ୟଜଣେ ଗାଈ ଚରାଉଥିଲା । ତେବେ ହଠାତ ଘଡଘଡି ସହ ବର୍ଷା ଆସିବାରୁ ନିକଟସ୍ଥ ଏକ ବରଗଛ ତଳେ ଆଶ୍ରୟ ନେଇଥିବାବେଳେ ବଜ୍ରାଘାତ ଘଟିଥିଲା ।
ଏହି ବଜ୍ରାଘାତରେ ଅମ୍ବାଦଳା ଗାଁର ନରେଶ ସୁନା ଓ ଅର୍ଜଲଲ ପଲକିଆଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି । ଗୁରୁତର ଅବସ୍ଥାରେ ତ୍ରିପାତି ହିଆଲଙ୍କୁ ରାୟଗଡା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ଅମ୍ବାଦଳା ପୁଲିସ ଘଟଣାସ୍ଥଳେ ପହଞ୍ଚି ମୃତଦେହ ଜବତ କରିବା ସହ ବ୍ୟବଛେଦ ପରେ ପରିବାରକୁ ହସ୍ତାନ୍ତର କରିଛି ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
