ରାୟଗଡା: ଟ୍ରେନ ଯୋଗେଁ ମାଲକାନଗିରିରୁ ଝାରସୁଗୁଡା ଗଞ୍ଜେଇ ଚୋରାଚାଲାଣ କରିବା ବେଳେ ଧରା ପଡିଯାଇଛନ୍ତି 2 ଚାଲାଣକାରୀ । ସେମାନଙ୍କ ଠାରୁ ୧୦ କେଜି ଗଞ୍ଜେଇ ଜବତ କରିବା ସେହି 2 ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି ପୋଲିସ । ଚୋରା ଗଞ୍ଜେଇ ଚାଲାଣ କାରବାରରେ ଗିରଫ ହୋଇଥିବା ଅଭିଯୁକ୍ତ ହେଲେ ମାଲକାନଗିରିର ଗୋବିନ୍ଦ ଖରା ଓ ନନ୍ଦ ଖୋସଲା । ମଙ୍ଗଳବାର ରାୟଗଡା ରେଳଷ୍ଟେସନରେ ଆରପିଏଫ ଓ ଜିଆରପି ପୋଲିସର ମିଳିତ ଯାଞ୍ଚ ପରେ ଚୋରା ଗଞ୍ଜେଇ ଜବତ ହୋଇଛି ।
ଜଗଦଲପୁର-ହାୱଡା ସମଲେଶ୍ବରୀ ଏକ୍ସପ୍ରେସରେ ଯାଉଥିବା ଗୋବିନ୍ଦ ଓ ନନ୍ଦକୁ ସନ୍ଦେହ କରି ସେମାନଙ୍କ ପାଖରେ ଥିବା ଦୁଇଟି ବ୍ୟାଗକୁ ଯାଞ୍ଚ କରାଯାଇଥିଲା । ଉଭୟ ବ୍ୟାଗରୁ ୫କେଜି ଓଜନ ପ୍ୟାକିଂ ହୋଇଥିବା ୨ଟି ଗଞ୍ଜେଇ ପ୍ୟାକେଟକୁ ଜବତ କରାଯାଇଥିବା ଆରପିଏଫ ଥାନାଧିକାରୀ ଡି.ଏନ.ତ୍ରିଲୋକ ଜଣାଇଛନ୍ତି । ଜବତ ଗଞ୍ଜେଇର ଆନୁମାନିକ ମୂଲ୍ୟ ପ୍ରାୟ ୫୦ ହଜାର ଟଙ୍କା ହେବ । ମାଲକାନଗିରିରୁ କୋରାପୁଟ ଦେଇ ଝାରସୁଗୁଡାକୁ ଗଞ୍ଜେଇ ଚୋରାଚାଲାଣ ହେଉଥିବା ଜଣାପଡିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
