ରାୟଗଡା: ନୂଆବର୍ଷ ପାଇଁ ସାରା ଜିଲ୍ଲା ଚଳଚଞ୍ଚଳ । ପ୍ରମୁଖ କାର୍ଯ୍ୟାଳୟ ମାନଙ୍କରେ ନୂତନ ବର୍ଷର ଶୁଭେଚ୍ଛା ଦେବାକୁ ଭିଡ ଜମିଥିବା ବେଳେ ଏପଟେ କିନ୍ତୁ ଜିଲ୍ଲା ମୁଖିଆ ପରିବାରଙ୍କ ସହିତ ଅସହାୟ ପିଲାଙ୍କ ଗହଣରେ ପାଳିଛନ୍ତି ନବବର୍ଷ ।
ବୁଧବାର ଜିଲ୍ଲାପାଳ ପ୍ରମୋଦ କୁମାର ବେହେରା ଏବଂ ଆରକ୍ଷୀ ଅଧିକ୍ଷକ ଶର୍ବଣ ବିବେକ ଏମ ନିଜ ପରିବାର ସହିତ ରାୟଗଡା ସହର ଉପଖଣ୍ଡରେ ଥିବା ସେବା ସମାଜକୁ ଯାଇଥିଲେ । ସେଠାରେ ରହୁଥିବା ଅସହାୟ ପିଲାଙ୍କୁ ମିଠା ଖୁଆଇ ନୂତନ ବର୍ଷକୁ ସ୍ବାଗତ କରିଥିଲେ । ପିଲାଙ୍କ ସହ ଆଲୋଚନା ବେଳେ ସେମାନେ ଭୋଗୁଥିବା ବିଭିନ୍ନ ସମସ୍ୟା ଜିଲ୍ଲାପାଳ ଓ ଏସପିଙ୍କୁ ଅବଗତ କରାଇଥିଲେ ।
ତେବେ ପୂର୍ବରୁ ଅସହାୟ ପିଲାଙ୍କ ଆବଶ୍ୟକୀୟ ଉପକରଣ କିଣିବା ପାଇଁ ମୁଖ୍ୟମନ୍ତ୍ରୀ ରିଲିଫ୍ ପାଣ୍ଠିରୁ ଜିଲ୍ଲାକୁ 10 ଲକ୍ଷ ଟଙ୍କା ଯୋଗାଇ ଦେଇଥିଲେ । ସେହି ଟଙ୍କାରେ ଗୁଣପୁର,ଜବରଗୁଡା,ଲିମାମଡ଼ା ଏବଂ ରାୟଗଡ଼ା ସହରରେ ରହୁଥିବା ଅସହାୟ ପିଲା ରହୁଥିବା ଆଶ୍ରମକୁ ଗୋଟିଏ ଲେଖାଏଁ ଫ୍ରିଜ, ୱାସିଙ୍ଗମେସିନ ,ଇନଭଟର, ଗୋଟିଏ କମ୍ପ୍ୟୁଟର ସହ ପ୍ରିଣ୍ଟର, ୩ ଟି ଅଗ୍ନି ନିର୍ବାପକ ଯନ୍ତ୍ର, ୧୦୦୦ ଲିଟର କ୍ଷମତା ସମ୍ପର୍ଣ୍ଣ ଗୋଟିଏ ପାଣି ଟାଙ୍କି, ଗୋଟିଏ ଗ୍ରାଇଣ୍ଡର ଏବଂ ୪ ଟି ଅନୁଷ୍ଠାନରେ ଆବଶ୍ୟକ ଥିବା ୫୬ ଟି ଖଟ ସହ ଗଦି ଯୋଗାଇ ଦେଇଥିଲେ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
