ରାୟଗଡା: ଜିଲ୍ଲାପାଳ ସରୋଜ କୁମାର ମିଶ୍ର ଦିନିକିଆ କାଶିପୁର ବ୍ଲକ ଗସ୍ତ କରି ଉନ୍ନୟନ ମୂଳକ କାର୍ଯ୍ୟର ସମୀକ୍ଷା କରିଛନ୍ତି । କାଶିପୁର ଠାରେ ପ୍ରସ୍ତାବିତ ବସଷ୍ଟାଣ୍ଡ ନିମନ୍ତେ ଚିହ୍ନଟ ହୋଇଥିବା ଜମି ପରିଦର୍ଶନ କରିଥିଲେ । ଚିହ୍ନଟ ହୋଇଥିବା ଜମି ବହୁ ଦୂରରେ ଥିବାରୁ ଅନ୍ୟତ୍ର ଜମି ଚିହ୍ନଟ ପାଇଁ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ, ଯଦି ଅନ୍ୟତ୍ର ଜମି ନ ମିଳେ ପ୍ରସ୍ତାବିତ ଜମିକୁ କାଏମ ରଖିବାକୁ ମଧ୍ୟ ନିର୍ଦ୍ଦେଶ ଦେଇଥିଲେ । କାଶିପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପରିଦର୍ଶନ କରି କୋଭିଡ ଟୀକାକରଣର ଯାଞ୍ଚ କରିଥିଲେ ।
ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପରିସର ମଧ୍ୟରେ ପ୍ରସ୍ତାବିତ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ନୂତନ କୋଠା ଓ ଷ୍ଟାଫ କ୍ବାଟର୍ସ ଜମିର ପରିଦର୍ଶନ କରିଥିଲେ ଓ ଉକ୍ତ କାର୍ଯ୍ୟ ତ୍ବରାନ୍ବିତ କରିବା ପାଇଁ ନିର୍ଦ୍ଦେଶ ଦେଇଥିଲେ । କାଶିପୁର ବ୍ଲକ ଅନ୍ତର୍ଗତ ସିନ୍ଦୁରଘାଟି ଗ୍ରାମ ପଞ୍ଚାୟତ ପରିଦର୍ଶନ କରି ନବ ନିର୍ମିତ ଗ୍ରାମ ପଞ୍ଚାୟତ କାର୍ଯ୍ୟାଳୟ ପ୍ରଦର୍ଶନ କରିଥିଲେ । ଜିଲ୍ଲାପାଳଙ୍କ ସିନ୍ଦୁରଘାଟି ପଞ୍ଚାୟତ ପରିଦର୍ଶନ ସମୟରେ ଗ୍ରାମ ରୋଜଗାର ସେବକ ଅନୁପସ୍ଥିତ ଥିବାରୁ କାରଣ ଦର୍ଶାଅ ନୋଟିସ ମାଗିବା ନିମନ୍ତେ ନିର୍ଦ୍ଦେଶ ଦେଇଥିଲେ ଜିଲ୍ଲାପାଳ ।
ନିର୍ମାଣଧିନ ପିଇଓ କ୍ବାଟର୍ସ ତୁରନ୍ତ ସଂପୂର୍ଣ୍ଣ କରିବା ନିମନ୍ତେ ମଧ୍ୟ ନିର୍ଦ୍ଦେଶ ଦେଇଥିଲେ । ସୁଙ୍ଗେର ଗ୍ରାମ ପଞ୍ଚାୟତ ପରିଦର୍ଶନ କରି ସୁବିଧା ଅସୁବିଧା ବୁଝିଥିଲେ ଓ ସରପଞ୍ଚଙ୍କୁ ପଞ୍ଚାୟତରେ ଯେପରି ସମସ୍ତେ କୋଭଡ ଟିକା ନେବେ ସେଥିପ୍ରତି ଦୃଷ୍ଟି ଦେବାକୁ କହିଥିଲେ । ଏହାପରେ ସୁଙ୍ଗରେ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ପରିଦର୍ଶନ କରିଥିଲେ ଓ ଲୋକଙ୍କୁ କୋଭିଡ ଟିକା ନେବା ନିମନ୍ତେ ସଚେତନ କରିଥିଲେ ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
