ରାୟଗଡା: କଥାରେ ଅଛି ଜଳ ହିଁ ଜୀବନ । ଜଳ ବହୁଳେ ସୃଷ୍ଟି ନାଶ ଜଳ ବିହୁନେ ସୃଷ୍ଟି ନାଶ । କେଉଁଠି ଜଳ ବିନା ହାହାକାର ତ ପୁଣି କେଉଁଠି ଧରିତ୍ରୀ ଛାତି ଫଟେଇ ଢାଳି ଦେଉଛି ଅମୃତର ଧାର । ଏମିତି ଅଦ୍ଭୁଦ ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲାରେ । ଯାହା ଜାଣିଲେ ଆପଣ ଆଶ୍ଚର୍ଯ୍ୟ ହେବେ ।
ବର୍ଷ ତମାମ ଏହି ଜିଲ୍ଲା ପାଣିର ଉତ୍କଟ ସମସ୍ୟା ଭୋଗ କରିଥାଏ । ଯାହାର ଖବର ବାରମ୍ବାର ଗଣ ମାଧ୍ୟମରେ ପ୍ରକାଶ ପାଇଛି । ହେଲେ ଜିଲ୍ଲାରେ ଏମିତି ଏକ ଗାଁ ଅଛି ଯେଉଁଠି ପ୍ରକୃତି ଯେମିତି ଆଶୀର୍ବାଦ ଅଜାଡି ଦେଇଛି । ରାୟଗଡାର ରଘୁଭାଟଗୁଡା ଗାଁ । ଏଠାରେ ଏମିତି ଏକ ନଳକୂଅ ଅଛି ଯେଉଁଠି ଅନବରତ ବୋହି ଚାଲିଛି ପାଣି ସେ ପୁଣି ବିନା କାହା ସାହାଯ୍ୟରେ । ଗ୍ରାମବାସୀଙ୍କୁ ପାଣି ପାଇଁ କଷ୍ଟ କରିବାକୁ ପଡେ ନାହିଁ । କାରଣ ନଳକୂଅର ଆପେ ଆପେ ବାହାରୁଛି ପାଣି । ଏଥିପାଇଁ ଗାଁ ଲୋକେ ମଧ୍ୟ ମହାଆନନ୍ଦରେ ପାଣି ବୋହି ନିଅନ୍ତି । ଗତ ଦେଢ ବର୍ଷ ହେବ ଏଠାରୁ ଏମିତି ପାଣି ଝରୁଥିବା ସ୍ଥାନୀୟ ଲୋକେ କହିଛନ୍ତି ।
ଅନ୍ୟପଟେ ଅନବରତ ବୋହି ଚାଲିଥିବା ପାଣିକୁ ନେଇ ବିଭିନ୍ନ କଥା ଶୁଣିବାକୁ ମିଳେ, ଏଠାକାର ଲୋକେ ଏହାକୁ ଇଶ୍ବରଙ୍କ ବରଦାନ କହୁଥିବା ବେଳେ ଜନସ୍ବାସ୍ଥ୍ୟ ବିଭାଗର ସହକାରୀ ଯନ୍ତ୍ରୀ ଇଞ୍ଜିନିୟର ଭାଷାରେ ଆକ୍ଟ୍ରିସିୟାନ ବୋଲି କହିଛନ୍ତି । ଯାହାକି ସାଧାରଣତଃ ଏଭଳି ଘଟଣା ଅଷ୍ଟ୍ରେଲିଆରେ ଦେଖିବାକୁ ମିଳେ । ତେବେ ଏଠି ପ୍ରଶ୍ନ ଉଠୁଛି, ଜଳ ସଂରକ୍ଷଣ ପାଇଁ ସରକାରଙ୍କ କେତେ କଣ ପଦକ୍ଷେପ ନେଉଛନ୍ତି । କିନ୍ତୁ ଏଠାରେ ଦୀର୍ଘ ବର୍ଷ ଧରି ପାଣି ଅପଚୟ ହେଉଥିବା ବେଳେ ପ୍ରଶାସନର ଦୃଷ୍ଟି ପଡୁନି କାହିଁକି । ଏଥିପ୍ରତି ପ୍ରଶାସନ ନଜର ଦେବା ଆବଶ୍ୟକ ହୋଇ ପଡିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
