ରାୟଗଡା: ଗୁଣୁପୁର ଖର୍ଲିଂ ନିକଟରେ ସଡକ ଦୁର୍ଘଟଣାରେ ମୃତ ବ୍ୟକ୍ତିଙ୍କ ମୃତଦେହ ରଖି ସ୍ଥାନୀୟ ଲୋକେ ବିକ୍ଷୋଭ କରିଛନ୍ତି । ମୃତ ବ୍ୟକ୍ତିଙ୍କ ପରିବାରକୁ କ୍ଷତିପୂରଣ ଦେବା ଦାବିରେ ଉତ୍ୟକ୍ତ ଲୋକେ GIET ବିଶ୍ବବିଦ୍ୟାଳୟ ଆଗରେ ବିକ୍ଷୋଭ କରିଛନ୍ତି । ମୃତ ବ୍ୟକ୍ତିଙ୍କ ନାମ ପୀରତି ବିଡିକା ହୋଇଥିବାବେଳେ ତାଙ୍କ ଘର ଗୁଣପୁର ବ୍ଲକ ପଡା ସାହିରେ ବୋଲି ଜଣାପଡିଛି ।
ଗୁଣୁପୁର ଖର୍ଲିଂ ନିକଟରେ ମଙ୍ଗଳବାର ରାତିରେ ହୋଇଥିବା ବସ ଧକ୍କାରେ ଗୋଟିଏ ପରିବାରର 3 ଜଣ ଗୁରୁତର ଆହତ ହୋଇଥିଲେ । ଜଣକର ଅବସ୍ଥା ଗୁରୁତର ହେବାରୁ ତାଙ୍କୁ ପ୍ରଥମେ ବ୍ରହ୍ମପୁର ପରେ ବିଶାଖାପାଟଣା ସ୍ଥାନାନ୍ତର ବେଳେ ବୁଧବାର ଚିକିତ୍ସିତ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । GIET ବିଶ୍ବବିଦ୍ୟାଳୟର ଏକ ବସ ଦୁର୍ଘଟଣା ଘଟାଇଥିବା ସୂଚନା ମିଳିଥିବା ବେଳେ ଲୋକେ କ୍ଷତିପୂରଣ ଦାବିରେ ବିଶ୍ବବିଦ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି ।
ପରେ ସ୍ଥାନୀୟ ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ପରେ ଲୋକେ ଧାରଣାରୁ ହଟିବା ସହ ପୋଲିସକୁ ମୃତଦେହ ବ୍ୟବଚ୍ଛେଦ ପାଇଁ ଛାଡିଥିଲେ । ଗୁଣୁପୁର ପୋଲିସ ମୃତଦେହ ବ୍ୟବଚ୍ଛେଦ ପରେ ସନ୍ଧ୍ୟାରେ ପରିବାରକୁ ହସ୍ତାନ୍ତର କରିଛି ।
ସୂଚନାଥାଉକି, ମଙ୍ଗଳବାର ରାତିରେ ପଦାସାହିର ଗୋଟିଏ ପରିବାରର 3 ଜଣ ବାଇକ ଯୋଗେ ନିଜ ଗ୍ରାମକୁ ଫେରୁଥିବା ବେଳେ GIET ବିଶ୍ବବିଦ୍ୟାଳୟର ଏକ ବସ ଦୁର୍ଘଟଣା ଘଟେଇଥିବା ସୂଚନା ମିଳିଛି । ଏବେ ମଧ୍ୟ ପରିବାରର ଅନ୍ୟ ଦୁଇଜଣ ଚିକିତ୍ସିତ ହେଉଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
