ରାୟଗଡା: ଭାଙ୍ଗିରୁଜି ଚୁରମାର ନବରଙ୍ଗପୁର ଜିଲ୍ଲାପାଳଙ୍କ ଗାଡି । ରାୟଗଡା ମୁକୁନ୍ଦପୁର ନିକଟସ୍ଥ ହାତିଖମ୍ବାରେ ଜିଲ୍ଲାପାଳଙ୍କ କାର ଦୁର୍ଘଟଣାଗ୍ରସ୍ତ ହୋଇଛି । ନବରଙ୍ଗପୁର ଜିଲ୍ଲାପାଳ ଡଃ. ଅଜିତ କୁମାର ମିଶ୍ର ନିଜ ଗାଡି ନଂ ଓଡି-୨୦ ଇ-୧୯୧୯ ରେ ଭୁବନେଶ୍ୱର ଅଭିମୁଖେ ଯାଉଥିବା ବେଳେ ମୁକୁନ୍ଦପୁର ହାତୀଖମ୍ବା ନିକଟରେ ଏକ ମଇଁଷି ସହ ଧକ୍କା ହୋଇଥିଲା । ତେବେ ଦୁର୍ଘଟଣାରେ କାରରେ ଥିବା ବ୍ୟକ୍ତିମାନେ ସୁରକ୍ଷିତ ଥିବା ଜଣାପଡିଛି ।
ଦୁର୍ଘଟଣା ନେଇ ଜିଲ୍ଲାପାଳଙ୍କ ଡ୍ରାଇଭର ନିରଞ୍ଜନ ସୁନା ଚାନ୍ଦିଲୀ ଥାନାରେ ଏତଲା ଦେଇଛନ୍ତି । ଦୁର୍ଘଟଣା ସମ୍ପର୍କରେ ଚାନ୍ଦିଲୀ ପୋଲିସ କ୍ୟାମେରା ଆଗରେ କୌଣସି ପ୍ରତିକ୍ରିୟା ଦେବାକୁ ମନା କରି ଦେଇଛନ୍ତି ।
ସୂତ୍ରରୁ ଜଣାପଡିଛି କି ଜିଲ୍ଲାପାଳ ଅଜିତ କୁମାର ଏହି ଗାଡିରେ ଥିବା କୁହାଯାଉଥିବା ବେଳେ ପୋଲିସ ପକ୍ଷରୁ ଏ ସଂପର୍କରେ କୌଣସି ସୂଚନା ମିଳିନାହିଁ । ଦୁର୍ଘଟଣାଗ୍ରସ୍ତ କାରକୁ ଶନିବାର ଏକ ମିନିଟ୍ରକ ଯୋଗେ ଚାନ୍ଦିଲୀ ଥାନାକୁ ଅଣାଯାଇଛି । ଘଟଣା ସଂପର୍କରେ ଚାନ୍ଦିଲୀ ଥାନାରେ ଏକ ଷ୍ଟେସନ ଡାଇରୀ କରାଯାଇ ଥିବା ସୂଚନା ମିଳିଛି । ତେବେ କୋରୋନା ଲକଡାଉନ ବେଳେ ନବରଙ୍ଗପୁର ଜିଲ୍ଲାପାଳ କେଉଁଠାକୁ ଯାଉଥିଲେ, କିମ୍ବା ଦୁର୍ଘଟଣା ସଂପର୍କରେ ଚାନ୍ଦିଲୀ ପୋଲିସ କାହିଁକି ମୁହଁ ଖୋଲୁନି ତାହା ସ୍ପଷ୍ଟ ହୋଇପାରୁନି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
