ରାୟଗଡ଼ା: 4 ମାସ ପରେ ଖୋଲାଗଲା ରାୟଗଡ଼ାର ଅଧିଷ୍ଠାତ୍ରୀ ଦେବା ମା' ମଝିଘରିଆଣିଙ୍କ ହୁଣ୍ଡି (Maa Majhighariani donation box opened)। ଚଳିତ ବର୍ଷର ଶେଷ ଥର ପାଇଁ ମା'ଙ୍କ ହୁଣ୍ଡି ଖୋଲାଯାଇଛି । ଏକ ବ୍ୟାଙ୍କ ଟଙ୍କା ଗଣିବା ଦାୟିତ୍ୱ ନେଇଥିବା ବେଳେ ଭେଙ୍କେଟେଶ୍ଵର ମନ୍ଦିର କମିଟି ସଦସ୍ୟ, ସତ୍ୟ ସାଇ ସେବା ସମିତି, ମଝିଘରିଆଣି ମନ୍ଦିର କମିଟି ସମେତ କିଛି କଲେଜ ଛାତ୍ରଛାତ୍ରୀ ମଧ୍ୟ ଟଙ୍କା ଗଣିବାରେ ସହାୟତା କରିଛନ୍ତି ।
ଦୀର୍ଘ ୪ ମାସ ପରେ ହୁଣ୍ଡି ଖୋଲାଯାଉ ଥିବାରୁ ଗତ ଥର ଠାରୁ ଅଧିକ ଟଙ୍କା ବାହାରି ଥିବା କହିଛନ୍ତି ମନ୍ଦିର ଟ୍ରଷ୍ଟି ରାଇସିଂ ବିଡ଼ିକା । ଚଳିତ ଥର ହୁଣ୍ଡିରୁ 62 ଲକ୍ଷ 22 ହଜାର 590 ନଗଦ ଟଙ୍କା ମିଳିଛି । ସେହିପରି 46 ଗ୍ରାମ ସୁନା, 1 କେଜି 775 ଗ୍ରାମ ରୁପା, 12 ଟି ବିଦେଶୀ ମୁଦ୍ରା ବାହାରିଛି । ମୁଖ୍ୟତଃ ଆନ୍ଧ୍ର, ଛତିଶଗଡ଼ ଓ ଓଡ଼ିଶାର ବହୁ ଭକ୍ତ ମା'ଙ୍କ ଦର୍ଶନ ପାଇଁ ଆସନ୍ତି । ମା'ଙ୍କ ଆଶୀର୍ବାଦ ଲାଭ କରି ମନସ୍କାମନା ପୂରଣ ପରେ ସୁନା ଓ ଟଙ୍କା ଦାନ କରିଥାନ୍ତି । ଯାହା ବାର୍ଷିକ ୪ କୋଟିରୁ ଅଧିକା ବୋଲି ରାଇସିଂ କହିଛନ୍ତି । ଏହି ଅର୍ଥକୁ ଜିଲ୍ଲାର ବିଭିନ୍ନ ଜନକଲ୍ୟାଣ କାର୍ଯ୍ୟକ୍ରମ, ମନ୍ଦିର ପୂଜା ରିତିନୀତି, ମନ୍ଦିର ଉନ୍ନୟନ ତଥା କର୍ମଚାରୀଙ୍କ ଦରମା ବାବଦରେ ଖର୍ଚ୍ଚ ହେଉଥିବା କୁହାଯାଇଛି । ଟଙ୍କା ଗଣତି ସମୟରେ ସୁରକ୍ଷାକୁ ଦୃଷ୍ଟିରେ ରଖି ସଶସ୍ତ୍ର ପୋଲିସ ମୁତୟନ କରାଯିବା ସହ ସିସିଟିଭିରେ କଡ଼ା ନଜର ରଖାଯାଇଥିଲା ।
ଏହା ମଧ୍ୟ ପଢ଼ନ୍ତୁ: ନୂଆ ରୂପ ପାଇବ ଐତିହ୍ୟ ଅଠରନଳା, ଆରମ୍ଭ ହେଲା ସୌନ୍ଦର୍ଯ୍ୟକରଣ କାର୍ଯ୍ୟ
ସୂଚନା ଥାଉକି, ଏହା ପୂର୍ବରୁ ଗତ ଅଗଷ୍ଟ ମାସରେ ମା' ମଝିଘରିଆଣିଙ୍କ ହୁଣ୍ଡି ଖୋଲାଯାଇଥିଲା । ହୁଣ୍ଡିରୁ ଅନେକ ଟଙ୍କା ସହ ସୁନା, ଅଳଙ୍କାର ଓ ବିଦେଶୀ ନୋଟ ଆମେରିକା ଡଲାର ଓ ଆଫ୍ରିକାର ନୋଟ ବାହାରିଥିଲା । ଗତ ମାର୍ଚ୍ଚ ମାସରେ ହୁଣ୍ଡିରୁ ପ୍ରାୟ 78 ଲକ୍ଷ 88 ହଜାର ଟଙ୍କା ସହ 54 ଗ୍ରାମ ସୁନା ଓ 2 କିଲୋ 60 ଗ୍ରାମ ରୂପା ବାହାରିଥିଲା ।
ଇଟିଭି ଭାରତ, ରାୟଗଡ଼ା
