ରାୟଗଡା: ଆଇନଜୀବୀ ଗାଡିକୁ ପଛରୁ ଧକ୍କା ଦେଇଥିବା ପେଟ୍ରୋଲପମ୍ପ ମାଲିକ ବିରୁଦ୍ଧରେ ଏସପିଙ୍କ ନିକଟରେ ଫେରାଦ ହେଲା ଆଇନଜୀବୀ ସଂଘ । ଦୁର୍ଘଟଣା ଘଟାଇଥିବା ବ୍ୟକ୍ତିଙ୍କୁ ରାୟଗଡା ଟାଉନ ଥାନା ପୋଲିସର ଜିମା ଦେଇଥିଲେ । ହେଲେ ପୋଲିସ ମାଲିକକୁ ଗିରଫ କରିବା ତ ଦୂରର କଥା ବରଂ ଛାଡିଦେଇଥିବା ପ୍ରତିବାଦରେ ବୁଧବାର ଆଇନଜୀବୀ ମାନେ ଏସପିଙ୍କୁ ଭେଟି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି କରିଛନ୍ତି ।
ସୂଚନା ମୁତାବକ, ଆଇନଜୀବୀ ପି.ଶ୍ରୀନିବାସ ନାଇଡୁ କୋରାପୁଟ ଜିଲ୍ଲା ନାରାୟଣପାଟଣା ବ୍ଲକରେ ଆୟୋଜିତ ହେଉଥିବା ନିଲାବାଡି ଯାତ୍ରା ଦେଖିବାକୁ ଯିବା ସମୟରେ ଗୁମ୍ମା ଘାଟି ନିକଟରେ ପେଟ୍ରୋଲ ପମ୍ପ ମାଲିକ କାରଟିକୁ ପଛପଟୁ ଧକ୍କା ଦେଇଥିଲେ । ଫଳରେ ଆଇନଜୀବୀଙ୍କ ବାମ ଗୋଡ ଓ ହାତରେ ଗଭୀର ଆଘାତ ଲାଗିଥିଲା । ଏନେଇ ସଂପୃକ୍ତ ଗାଡିର ମାଲିକଙ୍କ ନାମରେ ରାୟଗଡା ଥାନାରେ ଅଭିଯୋଗ ହେବା ପରେ ପୋଲିସ ପେଟ୍ରୋଲ ପମ୍ପ ମାଲିକକୁ ଅଟକ ରଖିଥିଲା । କିନ୍ତୁ ସଂପୃକ୍ତ ଡ୍ରାଇଭରଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବା ପରିବର୍ତ୍ତେ ପୋଲିସ ଗାଡି ଚଲାଉଥିବା ମାଲିକ ଓ ଦୁର୍ଘଟଣା ଘଟାଇଥିବା ଗାଡିକୁ ଛାଡିଦେଇଥିଲା ।
ତେବେ ଟାଉନ ଥାନା ପୋଲିସର ଏପରି କାର୍ଯ୍ୟଶୈଳୀକୁ ଆଇନଜୀବୀ ନିନ୍ଦା କରିବା ସହ ଘଟଣାର ପୁନଃତଦନ୍ତ କରାଯାଉ ବୋଲି ରାୟଗଡା ଏସପିଙ୍କୁ ଲିଖିତ ଅଭିଯୋଗ କରିଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
