ରାୟଗଡା: ଦିନ ତମାମ ରେଳପଥରେ ଚାଲୁଥିଲୁ, ରାତିରେ ଜଙ୍ଗଲରେ ଶୋଉଥିଲୁ। ପୋଲିସ ଓ କ୍ବାରେନଣ୍ଟାଇନ ଭୟରେ ରାଜରାସ୍ତାକୁ ଆସୁନଥିଲୁ। ରେଳପଥରେ ହିଁ ଘରକୁ ଫେରିବାର ଏକ ମାତ୍ର ରାସ୍ତା ଥିବାରୁ 14 ଦିନ ହେଲା ବିଜୟୱାଡାରୁ ଝାଡଖଣ୍ଡ ଅଭିମୁଖେ ରେଳପଥରେ ହିଁ ଚାଲୁଛୁ । ଏ ହେଉଛି ରାୟଗଡା ଜିଲ୍ଲାର ରେଳ ଲାଇନର ଦୃଶ୍ୟ । ଯେଉଁଠାରୁ 536 କିଲୋମିଟର ଯାଏଁ ରେଳପଥ ଅତିକ୍ରମ କରିବା ପରେ ଶନିବାର ଉଦ୍ଧାର ହୋଇଛନ୍ତି 12 ଜଣ ଶ୍ରମିକ । ରାୟଗଡ଼ା ଜିଲ୍ଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗ ଏମାନଙ୍କୁ ଉଦ୍ଧାର ପରେ ସ୍ବାସ୍ଥ୍ୟ ପରୀକ୍ଷା କରାଇ ସମସ୍ତଙ୍କୁ କ୍ବାରେନଣ୍ଟାଇନରେ ରଖିଛି।
ଝାଡ଼ଖଣ୍ଡ ରାଜ୍ୟ କାଣ୍ଟି ଥାନା ଅଞ୍ଚଳର ଏହି 12 ଜଣ ନିର୍ମାଣ ଶ୍ରମିକ କାମ କରିବାକୁ ବିଜୟୱାଡା ଯାଇଥିଲେ । ବିଜୟୱାଡାର ୟୁଆରସି ନାମକ ଘରୋଇ କମ୍ପାନୀରେ ଏହି ଶ୍ରମିକମାନେ ଘର ତିଆରି କାମରେ ନିୟୋଜିତ ହୋଇଥିଲେ । ସପ୍ତାହେ କାମ କରିବା ପରେ ଲକଡାଉନ ଲାଗୁ ହୋଇଥିଲା । ଫଳରେ କମ୍ପାନୀ କର୍ତ୍ତୃପକ୍ଷ ଶ୍ରମିକଙ୍କୁ ଘରକୁ ଚାଲି ଯିବାକୁ କହିଥିଲେ । କିନ୍ତୁ ରେଳ ଚଳାଚଳ ବନ୍ଦ ଯୋଗୁଁ ଶ୍ରମିକମାନେ ଘରକୁ ଫେରି ପାରିନଥିଲେ । କମ୍ପାନୀ ଶ୍ରମିକଙ୍କ ରହିବା କ୍ୟାମ୍ପକୁ ଖାଲି କରି ତାଲା ପକାଇ ଦେଇଥିଲେ । ସପ୍ତାହକର ମଜୁରୀ ମାଗିବା ପରେ କମ୍ପାନୀ ସୁପରଭାଇଜର ଶ୍ରମିକମାନଙ୍କୁ ଆଉ ଧରା ଛୁଆଁ ଦେଇନଥିଲେ ।
ଦୁଇ ତିନି ଦିନ ଭୋକ ଉପାସରେ କାଟିବା ପରେ ଘରକୁ ଫେରିବା ପାଇଁ ନିଷ୍ପତ୍ତି ନେଇଥିଲେ ଶ୍ରମିକମାନେ । ରାସ୍ତାକୁ ଆସିଲେ ପୋଲିସ ମାଡ଼ ମାରୁଥିବାରୁ ରେଳପଥରେ ହିଁ ଘରକୁ ଫେରିବା ପାଇଁ ନିଷ୍ପତ୍ତି ନେଇଥିଲେ ଏମାନେ । ଦିନ ତମାମ ଚାଲିବା ପରେ ସନ୍ଧ୍ୟା ହେଲେ ଜଙ୍ଗଲ ଅଞ୍ଚଳ ଦେଖି ଶ୍ରମିକମାନେ ଶୋଉଥିବା ପ୍ରମୋଦ କୁମାର ରାମ ନାମକ ଜଣେ ଶ୍ରମିକ କହିଛନ୍ତି । ପରିବାର ଲୋକେ ବ୍ୟାକୁଳ ହେଉଥିବାରୁ ସମସ୍ତ ଶ୍ରମିକ ସୁରକ୍ଷିତ ଭାବେ ଘରେ ପହଞ୍ଚିବା ପାଇଁ ରେଳପଥ ଦେଇ ହିଁ ଚାଲୁଥିଲେ । 14 ଦିନ ପରେ ଶ୍ରମିକମାନେ ଶନିବାର ସନ୍ଧ୍ୟାରେ ରାୟଗଡ଼ାରେ ପହଞ୍ଚିଥିଲେ ।
ଏନେଇ କୌଣସି ସୂତ୍ରରୁ ପ୍ରଶାସନ ଖବର ପାଇବା ପରେ ରାପିଡ ରେସପନ୍ସ ଟିମ୍ ପିତାମହଲ ନିକଟରେ ଶ୍ରମିକଙ୍କୁ ଅଟକାଇଥିଲେ । ଅଟୋ ମାଧ୍ୟମରେ ଶ୍ରମିକଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା । ଏହାପରେ ସମସ୍ତ ଶ୍ରମିକଙ୍କୁ କ୍ବାରେନଣ୍ଟାଇନରେ ରଖିବାକୁ ଜିଲ୍ଲା ପ୍ରଶାସନ ନିଷ୍ପତ୍ତି ନେଇଛି । ରବିବାର ଶ୍ରମିକଙ୍କ ସ୍ବାବ ସଂଗ୍ରହ କରାଯାଇ ପରୀକ୍ଷଣ ପାଇଁ ପଠାଯିବ ବୋଲି ସୂଚନା ମିଳିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
