ରାୟଗଡା: ସଚେତନତାର ଅଭାବ ଯୋଗୁଁ ଆଦିବାସୀ ଅଧ୍ୟୁଷିତ ଅଞ୍ଚଳର ଲୋକେ ଅନ୍ଧବିଶ୍ବାସକୁ ଆପଣାଉଛନ୍ତି । ଯାହାକି ଏବେ ସଭ୍ୟସମାଜ ପାଇଁ ଚିନ୍ତାର କାରଣ ପାଲଟିଛି । ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲା ବିଷମକଟକ ଥାନା ଅନ୍ତର୍ଗତ ଖୁଣ୍ଟବାଡୀ ଗ୍ରାମରେ । ଏହି ଗାଁରେ ଦେବାଦେବୀଙ୍କୁ ସନ୍ତୁଷ୍ଟ କରିବା ପାଇଁ ମୁଦ୍ରା ପୂଜା ଚାଲିଥିବାବେଳେ ଗାଁ ଭିତରକୁ ପ୍ରବେଶ କରିବା ପାଇଁ ଅନ୍ୟ ଗାଁର ଲୋକ ମାନଙ୍କୁ ବାରଣ କରାଯାଇଛି । ଆଉ ଏହାର ଖିଲାପକାରୀଙ୍କୁ 5ହଜାର ଟଙ୍କା ଜରିମାନା ନେଇ ଫତୁଆ ଜାରି କରିଛନ୍ତି ଗ୍ରାମବାସୀ ।
ଦୟାକରି ଗେଟ୍ ଭିତରକୁ କେହି ପ୍ରବେଶ କରନ୍ତୁ ନାହିଁ । ସାବଧାନ୍, କାହିଁକି ନା ଗାଁ ଭିତରେ ପୂଜା ଚାଲିଛି । ଗାଁ ଭିତରକୁ ଅନ୍ୟ ଗାଁର ଲୋକେ ପ୍ରବେଶ କରିପାରିବେ ନାହିଁ । ଆଉ ବିନା ଅନୁମତିରେ ପ୍ରବେଶ କଲେ ଜରିମାନା ଦେବାକୁ ପଡିବ 5 ହଜାର ଟଙ୍କା । ଏମିତି ଧମକପୂର୍ଣ୍ଣ ପୋଷ୍ଟର ଲଗାଛି ଗାଁ ମୁଣ୍ଡରେ । ତେବେ ପ୍ରଶାସନ ତରଫରୁ ଗାଁକୁ ଯାଇ ଲୋକଙ୍କୁ ସଚେତନ କରିବାର ବ୍ୟବସ୍ଥା କରାଯିବ ବୋଲି କହିଛନ୍ତି ରାୟଗଡ଼ା ଜିଲ୍ଲାପାଳ ।
ତେବେ ଅନ୍ଧ ବିଶ୍ବାସକୁ ନେଇ ଜିଲ୍ଲାରେ ଅନେକ ଘଟଣା ଦୁର୍ଘଟଣା ଘଟିଯାଇଥିବା ବେଳେ ଗାଁ ଗଣ୍ଡାରେ ସଚେତନତା କାର୍ଯ୍ୟକ୍ରମକୁ ଜୋରଦାର କରିବାର ସମୟ ଆସିଯାଇଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
