ରାୟଗଡା: ଆଗକୁ ବର୍ଷା ଋତୁକୁ ନଜରରେ ରଖି ବସିଲା ଜିଲ୍ଲା ସ୍ତରୀୟ ପ୍ରାକୃତିକ ବିପର୍ଯ୍ୟୟ କମିଟି ବୈଠକ । ଏଥିରେ ମୁଖ୍ୟତଃ ଆଗାମୀ ଦକ୍ଷିଣ ପଶ୍ଚିମ ମୌସୁମୀରେ ସାମ୍ଭାବ୍ୟ ବନ୍ୟା ଓ ସେଥି ନିମନ୍ତେ ବିଭିନ୍ନ ବିଭଗୀୟ ପ୍ରସ୍ତୁତି ସମ୍ପର୍କରେ ସମୀକ୍ଷା କରାଯାଇଥିଲା । ବିଗତ ବର୍ଷ ମାନଙ୍କରେ ରାୟଗଡା ଜିଲ୍ଲାର ନାଗବଳୀ, ଵଂଶଧାରା, ଝାଞ୍ଜବତୀ, ଫଳଫଳିଆ ନଦୀମାନଙ୍କରେ ଘଟିଥିବା ଭୟାବହ ବନ୍ୟାର ଅନୁଭୂତି ଓ ଆଗାମୀ ସମ୍ଭାବ୍ୟ ବନ୍ୟାକୁ ଦୃଷ୍ଟିରେ ରଖି ବିଶେଷ କରି ଜଳସେଚନ ବିଭାଗ ପାରଳାଖେମୁଣ୍ଡି ବିଭାଜନ, ପୁର୍ତ୍ତ ବିଭାଗ, ଗ୍ରାମୀୟ ନିର୍ମାଣ ବିଭାଗ, ମଧ୍ୟମ କ୍ଷୁଦ୍ର ଜଳସେଚନ ଓ ଅନ୍ୟାନ୍ୟ ବିଭାଗର କାର୍ଯ୍ୟ ପ୍ରସ୍ତୁତି ସମ୍ପର୍କରେ ଆଲୋଚନା କରାଯାଇଥିଲା । ଏଥିରେ ଚାଲୁରହିଥିବା ପ୍ରକଳ୍ପ ବର୍ଷା ଦିନ ପୂର୍ବରୁ ସାରିବା ନୂତନ ପ୍ରକଳ୍ପ ପାଇଁ ତୁରନ୍ତ ଡି. ପି.ଆର ପ୍ରସ୍ତୁତି କରି ଅନୁମୋଦନ କରି ଶୀଘ୍ର କାର୍ଯ୍ୟ ଆରମ୍ଭ ପାଇଁ ଜିଲ୍ଲାପାଳ ନିର୍ଦେଶ ଦେଇଥିଲେ ।
ସେହିପରି ଦୁର୍ଗମ ଅଞ୍ଚଳରେ ବର୍ଷା ଦିନ ପୂର୍ଵରୁ ଖାଦ୍ୟସମଗ୍ରୀ ମହଜୁଦ ରଖିବା ନିମନ୍ତେ କୁହାଯାଇଛି। କୃଷି ବିଭାଗ, ସ୍ବାସ୍ଥ୍ୟ ବିଭାଗ, ପ୍ରାଣୀଧନ ଚିକିତ୍ସା ବିଭାଗ ଉପରେ ଅଲୋଚନା କରି ବର୍ଷା ଦିନ ଆଗରୁ ସବୁ ପ୍ରସ୍ତୁତି ରହିବା ନିମନ୍ତେ ନିର୍ଦେଶ ଦିଆଯାଇଛି । ଏଥିରେ ଜିଲ୍ଳାପାଳଙ୍କ ପ୍ରମୋଦ କୁମାର ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଅନୁସୂଚିତ ଜାତି ଓ ଜନଜାତି ବିକାଶ,ପଛୁଆ ବର୍ଗ ତଥା ସଂଖ୍ୟା ଲଘୁ କଲ୍ୟାଣ ବିଭାଗ ମନ୍ତ୍ରୀ ଜଗନ୍ନାଥ ସାରକା, ରାୟଗଡ଼ା ବିଧାୟକ ମକରନ୍ଦ ମୁଦୁଲି, ଜିଲ୍ଲା ପରିଷଦ ଅଧ୍ୟକ୍ଷ ଗଙ୍ଗାଧର ପୁଆଲା ପ୍ରମୁଖ ଯୋଗଦେଇ ବର୍ଷା ଋତୁରେ ସମ୍ଭାବ୍ୟ ବନ୍ୟାକୁ ନେଇ ଆଲୋଚନା କରିଥଲେ ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
