ରାୟଗଡା: ପ୍ରେମିକଙ୍କ ପାଇଁ ନିଜ ମଥାରୁ ସିନ୍ଦୂର ପୋଛିଦେଲା ସ୍ତ୍ରୀ । ଅବୈଧ ସଂପର୍କରେ କଣ୍ଟା ସାଜିଥିବା ସ୍ଵାମୀକୁ ରାସ୍ତାରୁ ହଟାଇବା ପାଇଁ ସ୍ତ୍ରୀ ରଚିଥିଲା ଷଡ଼ଯନ୍ତ୍ର । ପ୍ରେମିକ ସହ ମିଶି ପତିକୁ ଚିରନିଦ୍ରାରେ ଶୁଆଇ ଦେଲା ପତ୍ନୀ । ପତିହନ୍ତା ସ୍ତ୍ରୀକୁ ଗିରଫ କଲା ପୋଲିସ । ତେବେ ରାୟଗଡ଼ା ଜିଲ୍ଲା ଚାନ୍ଦିଲି ଥାନା ଅଞ୍ଚଳରେ ଗତ ବୁଧବାର ରାତିରେ ଘଟିଥିବା ହତ୍ୟାକାଣ୍ଡରେ ଏଭଳି ଚାଞ୍ଚଲ୍ୟକର ଖୁଲାସା କରିଛି ପୋଲିସ । ଆଜି ରାୟଗଡ଼ା ଏସ୍ଡିପିଓ ରଶ୍ମିରଞ୍ଜନ ସେନାପତି ସବିଶେଷ ତଥ୍ୟ ଦେଇ ରାୟଗଡ଼ା ସାଇପ୍ରିୟା ନଗରର ଢାବା ରୋଷେୟା ବିନୟ ପାଳଙ୍କୁ ହତ୍ୟା ଘଟଣା ଉପରୁ ପରଦା ହଟାଇଛନ୍ତି ।
ବହୁଦିନ ଧରି ଜି. କାର୍ଷିକ ଓରଫ ମୁନା ସହ ବିନୟ କୁମାର ପାଳଙ୍କ ସ୍ତ୍ରୀ ସୁନିତାଙ୍କ ଅବୈଧ ସଂପର୍କ ରହିଥିଲା । ଏଥିରେ ସ୍ବାମୀ ବିନୟ ବାରମ୍ବାର କଣ୍ଟା ସାଜିଥିଲେ । ତେଣୁ ସବୁଦିନ ପାଇଁ ବିନୟକୁ ରାସ୍ତାରୁ ହଟାଇବାକୁ ପ୍ରେମିକ ସହ ସୁନିତା ଯୋଜନା କରିଥିଲେ । ରାୟଗଡ଼ା ସହର ଉପକଣ୍ଠ ସାଇପ୍ରିୟା ନଗର 10 ଲେନରେ ବିନୟ କୁମାର ପାଳଙ୍କୁ ଗତ 16 ତାରିଖ ରାତିରେ ନିର୍ମମ ହତ୍ୟା କରାଯାଇଥିଲା । ଗତ ବୁଧବାର ରାତିରେ ହତ୍ୟା କରିବା ପରେ ମୃତଦେହକୁ ବାହାରେ ଫୋପାଡ଼ି ଘରକୁ ଚାଲି ଆସିଥିଲେ ଉଭୟେ କାର୍ତ୍ତିକ ଏବଂ ସୁନିତା । ଏହାପରେ ସ୍ଵାମୀ ଘରକୁ ରାତିରେ ଆସିନଥିବା ସୁନିତା ଅଭିନୟ କରିଥିଲେ । ଅନ୍ୟପଟେ ବିନୟ ସରଳ ମଣିଷ ହୋଇଥିବାରୁ କିଏ ଏବଂ କାହିଁକି ହତ୍ୟା କଲା ତାହା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିଲା ।
ଏହା ମଧ୍ୟ ପଢ଼ନ୍ତୁ....ରାୟଗଡ଼ାରେ ଢ଼ାବା ରୋଷେୟାଙ୍କୁ ନିର୍ମମ ହତ୍ୟା ! କାରଣ ଅସ୍ଵଷ୍ଟ
ପରଦିନ ସକାଳୁ ରାସ୍ତାରୁ ବିନୟଙ୍କ ମୃତଦେହ ମିଳିଥିଲା । ମୁଣ୍ଡର ପଛପଟେ ଧାରୁଆ ଅସ୍ତ୍ର ବାଜିଥିବା ଚିହ୍ନ ରହିଥିଲା । ତେଣୁ ଏହା ଏକ ହତ୍ୟାକାଣ୍ଡ ବୋଲି ପୋଲିସର ସନ୍ଦେହ ହୋଇଥିଲେ । ତେବେ ପୋଲିସ ହତ୍ୟାକାରୀଙ୍କ କୌଣସି ସୁରାକ ପାଇ ନଥିଲା । ଅନ୍ୟପଟେ ବିନୟଙ୍କ ବାପା ରଜନୀକାନ୍ତ ପୁଅକୁ ହତ୍ୟା କରାଯାଇଥିବା ନେଇ ଚାନ୍ଦିଲି ଥାନାରେ ଏତଲା ଦେଇଥିଲେ । ପୁଲିସ କେଶ ନମ୍ବର ୨୬୬/୨୩ ଅନୁସାରେ ମାମଲା ରୁଜୁ କରି ବିଭିନ୍ନ ଦିଗରେ ତଦନ୍ତ ଆରମ୍ଭ କରିଥିଲା । ପ୍ରାଥମିକ ତଦନ୍ତରୁ ସନ୍ଦେହ କରି ମୃତ ବିନୟ ପାଳଙ୍କ ସ୍ତ୍ରୀ ଏବଂ ତାର ପୁରୁଷ ବନ୍ଧୁଙ୍କ ସମ୍ପୃକ୍ତି ଥିବା ଜାଣି ଦୁଇଜଣଙ୍କୁ ଅଟକ ରଖି ତଦନ୍ତ ଚଳାଇଥିଲା ।
ତଦନ୍ତ ସମୟରେ ବିନୟଙ୍କ ପତ୍ନୀ ସୁନିତାଙ୍କ କଥା ବାର୍ତ୍ତା ପୋଲିସର ସନ୍ଦେହକୁ ଆହୁରି ବଢ଼ାଇଥିଲା । ଜେରା ସମୟରେ ହତ୍ୟାକାଣ୍ଡର କାରଣ ପୋଲିସ ଜାଣିପାରିଥିଲା । ଶେଷରେ ଚାନ୍ଦିଲି ପୋଲିସ କାର୍ତ୍ତିକ ଏବଂ ମୃତ ବିନୟ ପାଳଙ୍କ ସ୍ତ୍ରୀ ସୁନିତାଙ୍କୁ ପାଳଙ୍କୁ ଗିରଫ କରି ଏହି ଚାଞ୍ଚଲ୍ୟକର ଘଟଣାରେ ପୂର୍ଣ୍ଣଚ୍ଛେଦ ଦେଇ ପକାଇଛି । ତଦନ୍ତ ସମୟରେ ସେମାନଙ୍କ ଠାରୁ ଏକ ମଟର ସାଇକଲ ସକପଜର ରଡ଼ ମଧ୍ୟ ଜବତ କରିଛି ଚାନ୍ଦିଲି ପୋଲିସ ।
ଇଟିଭି ଭାରତ, ରାୟଗଡ଼ା
