ରାୟଗଡା: ଡେଙ୍ଗୁ ଡ଼ରାଉଛି ଗ୍ରୀନ୍ ଜୋନକୁ । ଗୋଟିଏ ପଟେ ଜିଲ୍ଲା ପ୍ରଶାସନ ମହାମାରୀ କୋରୋନାକୁ ପ୍ରତିହତ କରିବା ପାଇଁ ପ୍ରାଣମୂର୍ଚ୍ଛା ଉଦ୍ୟମ କରୁଥିବା ବେଳେ ଏପଟେ ଡେଙ୍ଗୁ ପାଇଁ ମୁକୁଳା ହୋଇ ପଡିଛି ସାରା ଜିଲ୍ଲା । ମାସକ ଭିତରେ ଜିଲ୍ଲାରେ ୬୧ଟି ଡେଙ୍ଗୁ ପଜିଟିଭ ପ୍ରଶାସନର ପାରିବା ପଣିଆକୁ ପଦାରେ ପକାଇଛି ।
ରାୟଗଡା ଜିଲ୍ଲା ମୁନିଗୁଡାର ଟିକରପଡା ବସ୍ତିରୁ କାୟା ମେଲିଥିବା ଡେଙ୍ଗୁ ଏବେ ଧୀରେ ଧୀରେ ରାୟଗଡା ସହର ଦେଇ ଗ୍ରାମାଞ୍ଚଳରେ ପହଁଞ୍ଚିଲାଣି । ଗତ ୧୦ ଦିନ ତଳେ ଟିକରପଡାରେ ୪୨ ପଜିଟିଭ ଚିହ୍ନଟ ହୋଇଥିବା ବେଳେ ଏବେ ଏହା ବଢ଼ି ୬୧ରେ ପହଁଞ୍ଚିଛି । ଡେଙ୍ଗୁକୁ ନେଇ ଏବେ ଭୟଭୀତ ଅବସ୍ଥାରେ ଜିଲ୍ଲାବାସୀ।
ଗୁଣୀଗାରେଡି ଉପରେ ଭରସା ଛାଡି ଏବେ ଡାକ୍ତରଖାନା ମୁହାଁ ହେଉଛନ୍ତି ଆକ୍ରାନ୍ତ । ଜିଲ୍ଲାରେ ଦିନକୁ ଦିନ ଡେଙ୍ଗୁ ରୋଗୀଙ୍କ ସଂଖ୍ୟା ବୃଦ୍ଧି ନେଇ ଚିନ୍ତା ବଢିଛି ସ୍ୱାସ୍ଥ୍ୟ ବିଭାଗର । ମାସକ ମଧ୍ୟରେ ୧୨୯ ଜଣଙ୍କ ରକ୍ତନମୁନା ପରୀକ୍ଷାରେ ୬୧ଟି ଡେଙ୍ଗୁ ପଜିଟିଭ ବାହାରିବାର କାରଣ ଖୋଜୁଛି ସ୍ୱାସ୍ଥ୍ୟ ବିଭାଗ ।
ଆର.ଏମ୍.ଆର.ସି ଏବଂ ଏସ୍ସିବି ମେଡିକାଲକୁ ୨୫ଟି ଡେଙ୍ଗୁ ରୋଗୀଙ୍କ ରକ୍ତ ନମୁନାକୁ ପୁନଃ ପରୀକ୍ଷଣ ପାଇଁ ପଠାଯାଇ ନିଦାନ ଖୋଜା ଯାଉଛି । ତେବେ ଗାଁ ନିର୍ମଳ ସାଙ୍ଗକୁ ସଚେତନତାକୁ ଗୁରୁତ୍ୱ ଦେଇଛି ପ୍ରଶାସନ।
କୋରୋନା ପାଇଁ ଜିଲ୍ଲା ପ୍ରଶାସନ ଯେତେ ତତ୍ପର ସେତିକି ଡ଼େଙ୍ଗୁ ପାଇଁ ହେବା ଆବଶ୍ୟକ ହୋଇପଡ଼ିଛି । ଯଦି ଏ ଦିଗରେ ଟିକିଏ ଅବହେଳା କରାଯାଏ ତେବେ ଜିଲ୍ଲାରେ ଡ଼େଙ୍ଗୁ ମହାମାରୀର ରୂପ ନେବାର ଆଶଙ୍କାକୁ ଏଡ଼ାଇ ଦିଆଯାଇ ନପାରେ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
