ରାୟଗଡା: ବିଭିନ୍ନ ମୌଳିକ ଦାବି ଏବଂ ଜଳ,ଜମି,ଜଙ୍ଗଲ ସହ ଗୁଡାରିଠାରେ ପାଣିଡ଼ଙ୍ଗର ପ୍ରକଳ୍ପ ନିର୍ମାଣ ଦାବିରେ ଉପ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରିଲେ ଆଦିବାସୀ । CPI(ML)ଆଦିବାସୀ ନେତା ତ୍ରିପତି ଗମାଙ୍ଗଙ୍କ ନେତୃତ୍ବରେ ଆଜି ଶତାଧିକ ଆଦିବାସୀ ଗୁଣୁପୁର ନୂତନ ବସଷ୍ଟାଣ୍ଡ ଠାରୁ ଏକ ଶୋଭାଯାତ୍ରାରେ ବାହାରି ଗୁଣୁପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟ ଭିତରକୁ ଧସେଇ ପଶିଥିଲେ।
କୋରୋନା କଟକଣା ଥିବାରୁ ଉପଜିଲ୍ଲାପାଳଙ୍କ କାର୍ଯ୍ୟାଳୟ ଗେଟ ସାମ୍ନାରେ ଆନ୍ଦୋଳନକାରୀଙ୍କୁ ପୋଲିସ ଅଟକାଇବା ସତ୍ତ୍ବେ କାର୍ଯ୍ୟାଳୟ ଭିତରକୁ ପ୍ରବେଶ କରି ସରକାରୀ ଉଦାସୀନତା ବିରୋଧରେ ନାରାବାଜି କରିଥିଲେ CPI(ML)କର୍ମୀ । ପରେ ଦଳର କେନ୍ଦ୍ରୀୟ ସମ୍ପାଦକ ତ୍ରିପତି ଗମାଙ୍ଗଙ୍କ ସହ ଅନ୍ୟ କିଛି ଆଦିବାସୀ ନେତା ଗୁଣୁପୁର ଉପଜିଲ୍ଲାପାଳ ଜେ ସୋନାଲଙ୍କୁ ସାକ୍ଷାତ କରି ସମସ୍ୟା ସମ୍ପର୍କରେ ଆଲୋଚନା କରିବା ସହ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ୧୪ ଦଫା ସମ୍ବଳିତ ଦାବିପତ୍ର ପ୍ରଦାନ କରିଥିଲେ ।
ଦାବି ଗୁଡିକ ମଧ୍ୟରେ ଆଦିବାସୀଙ୍କୁ ଜଳ,ଜମି,ଜଙ୍ଗଲ ସହ ସେମାନଙ୍କ ମୌଳିକ ସମସ୍ୟା ସମାଧାନ, ଗୁଡାରି ଠାରେ ପାଣିଦଙ୍ଗର ପ୍ରକଳ୍ପ ନିର୍ମାଣ ପ୍ରମୁଖ ରହିଛି । ଯଦି ରାଜ୍ୟ କିମ୍ବା କେନ୍ଦ୍ର ସରକାର ସେମାନଙ୍କ ଦାବି ପ୍ରତି ଗୁରୁତ୍ବ ନ ଦିଅନ୍ତି, ତେବେ ଆଗାମୀ ଦିନ ଯେଉଁ ଜନ ଆନ୍ଦୋଳନ ହେବ ସେଥିପାଇଁ ଉଭୟ ସରକାର ଦାୟୀ ରହିବେ ବୋଲି ଖୋଲା ଚେତାବନୀ ଦେଇଛନ୍ତି CPI(ML) ନେତା ତ୍ରିପତି ଗମାଙ୍ଗ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
