ଚଳଚଞ୍ଚଳ ଶ୍ରୀକ୍ଷେତ୍ର, ଗୋଷାଣୀ ମାଆଙ୍କ ଦର୍ଶନ ପାଇଁ ମଣ୍ଡପରେ ଶ୍ରଦ୍ଧାଳୁଙ୍କ ଗହଳି

ବିଜୟା ଦଶମୀକୁ ନେଇ ଉତ୍ସବ ମୁଖରିତ ଶ୍ରୀକ୍ଷେତ୍ର । ବିଜୟା ଦଶମୀ ଅବସରରେ ପୂଜା ମଣ୍ଡପ ଗୁଡ଼ିକରେ ସ୍ଵତନ୍ତ୍ର ପୂଜା ଅନୁଷ୍ଠିତ ହୋଇଛି । ଅଧିକ ପଢନ୍ତୁ

ପୁରୀ: ବିଜୟା ଦଶମୀ ନେଇ ଓଡ଼ିଶାର ପୁରପଲ୍ଲୀ ଉତ୍ସବ ମୁଖର ରହିଥିଲା ବେଳେ ଶ୍ରୀକ୍ଷେତ୍ର ପୁରୀ ମଧ୍ୟ ଉତ୍ସବ ମୁଖରିତ ହୋଇଥିଲା । ବିଜୟା ଦଶମୀ ଅବସରରେ ପୂଜା ମଣ୍ଡପଗୁଡ଼ିକରେ ସ୍ଵତନ୍ତ୍ର ପୂଜା ଅନୁଷ୍ଠିତ ହୋଇଥିଲା । ବିସର୍ଜନ ହୋମ ସହ ପନ୍ତି ନିତୀ ଅନୁଷ୍ଠିତ ହୋଇଛି । ତେବେ ମଙ୍ଗଳବାର ପବିତ୍ର ଦିବସରେ ମା’ଙ୍କୁ ଦର୍ଶନ ସହ ଆଶୀର୍ବାଦ ନେବା ପାଇଁ ପୂଜା ମଣ୍ଡପଗୁଡ଼ିକରେ ଭକ୍ତଙ୍କ ଭିଡ଼ ଲାଗି ରହିଥିଲା । କେବଳ ପୁରୀ କାହିଁକି ପୁରୀ ବାହାରୁ ଅନେକ ଭକ୍ତ, ପର୍ଯ୍ୟଟକ ପୁରୀ ଆସି ବିଜୟା ଦଶମୀରେ ମା’ଙ୍କୁ ଦର୍ଶନ କରି ସାନ୍ନିଧ୍ୟ ଲାଭ କରିଥିଲେ । ବିଶେଷ କରି ପୁରୀରେ ବିଭିନ୍ନ ପୂଜା ମଣ୍ଡପରେ ଆକର୍ଷଣୀୟ ଗୋଷାଣୀ ମୂର୍ତ୍ତି ଦେଖି ଭକ୍ତ ଭାବ ବିହ୍ଵଳିତ ହୋଇଥିଲେ । ପୁରୀ ସହରର ବିଭିନ୍ନ ପୂଜା ମଣ୍ଡପ ବୁଲି ମୂର୍ତ୍ତି ଦେଖିବା ସହ ଆକର୍ଷଣୀୟ ସାଜସଜ୍ଜା ଦେଖିଥିଲେ ।

ସେପଟେ ପୁରୀ ବାସିନ୍ଦା ମା’ ଗୋଷାଣୀଙ୍କ ଦର୍ଶନ ପାଇଁ ବିଭିନ୍ନ ମଣ୍ଡପ, ପୀଠ ଯାଇ ପୂଜାର୍ଚ୍ଚନା କରି ମାଆଙ୍କ ଆଶୀର୍ବାଦ କାମନା କରିଥିଲେ । ବାରବାଟୀ ଗୋଷାଣୀ ପୂଜା କମିଟିର ସମ୍ପାଦକ ମଦନ ମୋହନ ଖୁଣ୍ଟିଆ କହିଛନ୍ତି,"ଚଳିତ ବର୍ଷ ବେଶ ଧୁମଧାମରେ ଶାରଦୀୟ ଦୁର୍ଗାପୂଜା ପାଳନ ହୋଇଥିଲା । ହଜାର ହଜାର ଭକ୍ତ ଶ୍ରୀକ୍ଷେତ୍ରକୁ ଆସି ମା’ ଗୋଷାଣୀଙ୍କୁ ଦର୍ଶନ କରିଥିଲେ । ତେବେ ଆଜି ଗୋଷାଣୀ ଯାତ ପାଇଁ ସବୁ ପ୍ରସ୍ତୁତି ଶେଷ ହୋଇଛି । ଅପରାହ୍ନରେ ଶ୍ରୀମନ୍ଦିର ସିଂହଦ୍ୱାର ନିକଟରେ ଦେବସଭା ହେବ । ପୁରୀ ସହରର ସବୁ ଗୋଷାଣୀ, ନାଗା ମୂର୍ତ୍ତି ଏକତ୍ରିତ ହୋଇ ମହାପ୍ରଭୁଙ୍କ ଏକାଦଶୀ ମହାଦୀପ ଉଠିବା ପରେ ଭସାନ ପାଇଁ ପ୍ରସ୍ତୁତି ହେବ । ପ୍ରଶାସନ ନିର୍ଦ୍ଦେଶ ଅନୁଯାୟୀ ଶାନ୍ତି ଶୃଙ୍ଖଳାରେ ସବୁ ସମାପନ କରିବା ପାଇଁ ସବୁ ବ୍ୟବସ୍ଥା କରାଯାଇଛି ।"

ସେପଟେ ଶ୍ରୀକ୍ଷେତ୍ରରେ ଗୋଷାଣୀ ମେଢ଼ ଏକାଦଶୀରେ ଭସାଣି ହେଉଥିବା ବେଳେ ପରମ୍ପରା ଅନୁଯାଇ ଦେବୀ ବିମଳାଙ୍କ ପ୍ରତିନିଧି ମା’ କାକୁଡି ଖାଇଙ୍କ ମୂର୍ତ୍ତିର ଆଜି ଦଶମୀରେ ଜଳରେ ବିସର୍ଜନ ହେବ । ପରମ୍ପରା ଅନୁଯାୟୀ କାକୁଡି, ପାଣି କଖାରୁ ବଳି ନୀତି ଅନୁଷ୍ଠିତ ହେବ ।

ଇଟିଭି ଭାରତ, ପୁରୀ