ପୁରୀ: ନୂଆବର୍ଷ ଉପଲକ୍ଷେ ପୁରୀକୁ ଲକ୍ଷାଧିକ ଭକ୍ତ ଓ ପର୍ଯ୍ୟଟକଙ୍କ ସମାଗମକୁ ଦୃଷ୍ଟିରେ ରଖି ହୋଇଛି ସ୍ବତନ୍ତ୍ର ବ୍ୟବସ୍ଥା । ଶୃଙ୍ଖଳିତ ଟ୍ରାଫିକ ବ୍ୟବସ୍ଥା ଓ ଶ୍ରୀମନ୍ଦିର ଦର୍ଶନ ନେଇ ପୁରୀ ପୋଲିସ ପକ୍ଷରୁ ସୁବନ୍ଦୋବସ୍ତ କରାଯାଇଥିବା ପୁରୀ ଏସପି ଉମା ଶଙ୍କର ଦାସଙ୍କ ସୂଚନା ଦେଇଛନ୍ତି ।
ଏସପିଙ୍କ ସୂଚନା ଅନୁଯାୟୀ, ନୂଆବର୍ଷ ପାଇଁ ପୁରୀରେ ଶ୍ରୀମନ୍ଦିର ଓ ଭକ୍ତ ତଥା ପର୍ଯ୍ୟଟକଙ୍କ ସୁରକ୍ଷା ପାଇଁ ମୋଟ 60 ପ୍ଲାଟୁନ ପୋଲିସ ଫୋର୍ସ ମୁତୟନ ହେବା ସହ 8 ଶହ କନେଷ୍ଟବଳ ଓ ହୋମଗାର୍ଡ ମଧ୍ୟ ରହିବେ।
ଏଥିସହିତ ସୁରକ୍ଷା ବ୍ୟବସ୍ଥାର ସୁପରିଚଳନା ନେଇ 10 ଜଣ ଅତିରିକ୍ତ ଏସପି, 25 ଜଣ ଡିଏସପି, 260 ଜଣ ଇନ୍ସପେକ୍ଟର, ଏଏସଆଇ ରହିବେ। ତେବେ ଭକ୍ତଙ୍କ ସୁରକ୍ଷା ଓ ଭିଡ଼ ନିୟନ୍ତ୍ରଣ ନେଇ ମାର୍କେଟ ଛକରୁ ବଡ଼ ଦାଣ୍ଡକୁ ତିନି ଭାଗରେ ବିଭକ୍ତ କରାଯାଇଛି।
ବଡ଼ଦାଣ୍ଡ ମଝିରେ ଭକ୍ତଙ୍କ ପାଇଁ ବ୍ୟାରିକେଡ କରାଯାଇଛି । ଫଳରେ ଭକ୍ତମାନେ ବ୍ୟାରିକେଡରେ ପାଦରେ ଚାଲି ଶ୍ରୀମନ୍ଦିର ପର୍ଯ୍ୟନ୍ତ ଯାଇ ପାରିବେ। ସେହିପରି ବ୍ୟାରିକେଡର ବାମ ପଟେ କେଵଳ ଜରୁରୀକାଳୀନ ବ୍ୟବସ୍ଥା ଯଥା ପୋଲିସ ଗାଡି , ଅଗ୍ନିଶମ ଗାଡି ଓ ଦିବ୍ୟାଙ୍ଗ, ବରିଷ୍ଠ ନାଗରିକଙ୍କ ସହାୟତା ଗାଡି ଚଳାଚଳ କରିବ।
ମାର୍କେଟ ଛକରୁ ସମସ୍ତ ଗାଡି ଚଳାଚଳ ମନ୍ଦିର ଦିଗକୁ ନିଷିଦ୍ଧ କରାଯାଇଛି। ମାର୍କେଟ ଛକ ପୌର ପାଳିକା ମାର୍କେଟ କମ୍ପ୍ଲେକ୍ସର ଉଚ୍ଛେଦ ଜାଗାରେ ଦୁଇ ଚକିଆ ଗାଡି ପାର୍କିଂ ହେବ । ସେହିପରି ଜଗନ୍ନାଥ ବଲ୍ଲବ, ଜେଲ ରୋଡ଼ରେ 4 ଚକିଆ ଯାନ ପାର୍କିଂ ହେବ। ଅଧିକ ପାର୍କିଂ ଆବଶ୍ୟକ ହେଲେ ରଥଯାତ୍ରା ବ୍ୟବସ୍ଥା ଭଳି ଗୁଣ୍ଡିଚା ମନ୍ଦିର ନିକଟରେ ଥିବା ଖାଲି ଜାଗା , ତାଳବଣିଆ ଆଦି ଅଞ୍ଚଳରେ ପାର୍କିଂ ହେବ।
ତାଳ ବଣିଆ ପାର୍କିଂ ପାଇଁ ଗାଡି ଗୁଡିକ ମାଳତୀ ପାଟପୁର ଓଭର ବ୍ରିଜ ଦେଇ ଯିବେ। ସେହିପରି ମନ୍ଦିର ନିକଟକୁ କୌଣସି ଭିଭିଆଇପି ଗାଡି ଯିବା ନେଇ ପୁରୀ ପୋଲିସ କଟକଣା ଜାରି କରିଛି। କେଵଳ ରାଜ୍ୟ ସ୍ତରୀୟ ଅତିଥି ତଥା ସ୍ବତନ୍ତ୍ର ଅଧିକାରୀ ମାନେ ଯିବା ପାଇଁ ପାସ ବ୍ୟବସ୍ଥା ହେବ। ତେବେ ଏହି କାର୍ଯ୍ୟକ୍ରମରେ ସମସ୍ତେ ସହଯୋଗ କରିବାକୁ ପୁରୀ ଏସପି ନିବେଦନ କରିଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
