ପୁରୀ: କୋରୋନା ସତର୍କତାକୁ ନେଇ ସମସ୍ତ ସରକାରୀ କଟକଣାକୁ କଡାକଡି କଲା ପୁରୀ ଜିଲ୍ଲା ପ୍ରଶାସନ । ରବିବାର ଦିନ ଜନତା କର୍ଫ୍ୟୁକୁ କଡାକଡି ପାଳନ କରାଯିବା ବୋଲି ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ । ପୁରୀ ସହର ସମେତ ସମସ୍ତ ବିଜ୍ଞାପିତ ଅଞ୍ଚଳ, ପଂଚାୟତରେ ସେହିଦିନ ଗାଡିରେ ସାଇରନ ଲଗାଇ ଲୋକଙ୍କୁ ଘରୁ ନ ବାହାରିବାକୁ ସଚେତନ କରାଯିବ । ସେହିପରି ଆଜି ଠାରୁ ପୁରୀ ଜିଲ୍ଲାରେ ସମସ୍ତ ଅତ୍ୟାବଶ୍ୟକ ସାମଗ୍ରୀ ଦୋକାନ ଛାଡି, ଅନ୍ୟ ସବୁ ଦୋକାନ ବନ୍ଦ କରାଯିବ।
ଅନ୍ୟପଟେ ଯାନ ବହନ ଚଳାଚଳ କମ କରିବା ପାଇଁ ଦିଲ୍ଲୀ ଭଳି ଯୁଗ୍ମ ଅଯୁଗ୍ମ ନିୟମ ଗାଡିରେ ଲାଗୁ ହେବ । ଯୁଗ୍ମ ନମ୍ବର ଥିବା ଗାଡି ଯୁଗ୍ମ ଦିନ ଓ ଅଯୁଗ୍ମ ନମ୍ବର ଥିବା ଗାଡି ଅଯୁଗ୍ମ ଦିନ ରାସ୍ତାରେ ଚାଲିବ । ଏ ନେଇ ପୁରୀ ଆର ଟି ଓ ପକ୍ଷରୁ ଖୁବ ଶୀଘ୍ର ନିର୍ଦ୍ଦେଶ ନାମା ଜାରି କରାଯିବ । ସେହିପରି କିଛି ସ୍ବେଚ୍ଛାସେବୀ ସଂଗଠନ କୋରୋନା ସତର୍କତା ନେଇ ସଚେତନ କାର୍ଯ୍ୟକ୍ରମ ବେଳେ ଲିଫଲେଟ ଓ ମାସ୍କ ଲୋକଙ୍କୁ ପ୍ରଦାନ କରୁଛନ୍ତି । ଯାହାକୁ ନେଇ କଟକଣା ଜାରି କରିଛି ପୁରୀ ଜିଲ୍ଲା ପ୍ରଶାସନ। ପ୍ରଶାସନ ଠାରୁ ଅନୁମତି ନେଇ ସବୁ କାର୍ଯ୍ୟ ନ କଲେ ଆଇନ ଅନୁଯାୟୀ କାର୍ଯ୍ୟନୁଷ୍ଠାନ ନିଆଯିବ ବୋଲୀ ପୁରୀ ଜିଲ୍ଲାପାଳ ବଲ ବନ୍ତ ସିଂ ସୂଚନା ଦେଇଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
