ପୁରୀ : ପୁରୀରେ ଚାଲିଥିବା ରାଜ୍ୟସ୍ତରୀୟ କବାଡ଼ି ଚମ୍ପିଆନସିପର ପୁରୁଷ ବିଭାଗ ଫାଇନାଲରେ ଢ଼େଙ୍କାନାଳ ଓ କଟକ ମଧ୍ୟରେ ଅନୁଷ୍ଠିତ ମ୍ୟାଚରେ କଟକ ୨୭ ପଏଣ୍ଟରେ ଚାମ୍ପିଅନ ହୋଇଥିବା ବେଳେ ଢେଙ୍କାନାଳ ୧୬ ପଏଣ୍ଟରେ ରନର୍ସଅପ ହୋଇଛି । ଅନ୍ୟପକ୍ଷରେ ସେମି ଫାଇନାଲରେ କଟକ ୩୪ ପଏଣ୍ଟ ଠାରୁ ଓଡ଼ିଶା ପୋଲିସ ୩୨ ପଏଣ୍ଟ ଓ ଢ଼େଙ୍କାନାଳ ୨୭ ପଏଣ୍ଟ ଦ୍ବାରା ନୂଆପଡ଼ା ୨୫ ପଏଣ୍ଟ ପରାଜିତ ହୋଇ ଉଭୟ ଓଡ଼ିଶା ପୁଲିସ ଏବଂ ନୂଆପଡା ଯୁଗ୍ମ ଭାବେ ତୃତୀୟ ସ୍ଥାନ ଅକ୍ତିଆର କରିଛନ୍ତି।
ସେହିଭଳି ମହିଳା ବିଭାଗରେ ପୂର୍ବତଟ ରେଳବାଇ ଓ ଢେଙ୍କାନାଳ ମଧ୍ୟରେ ଅନୁଷ୍ଠିତ ସେମିଫାଇନାଲ ମ୍ୟାଚରେ ପୂର୍ବତଟ ରେଳବାଇ ୩୮ ପଏଣ୍ଟରେ ଚାମ୍ପିଅନ ହୋଇଥିବା ବେଳେ ଢେଙ୍କାନାଳ ୧୩ ପଏଣ୍ଟରେ ରନର୍ସ ଅପ ହୋଇଛି ।
ସେହିଭଳି ମହିଳା ବିଭାଗ ସେମି ଫାଇନାଲରେ ପୂର୍ବତଟ ରେଳବାଇ ୪୫ ପଏଣ୍ଟରେ କିଟ ବିଶ୍ବବିଦ୍ୟାଳୟ ୮ ପଏଣ୍ଟ ଓ ଢେଙ୍କାନାଳ ୨୯ ପଏଣ୍ଟ ଦ୍ବାରା ଗଞ୍ଜାମ ୨୬ ପଏଣ୍ଟ ପରାଜିତ ହୋଇ କିଟ ବିଶ୍ବବିଦ୍ୟାଳୟ ଏବଂ ଗଞ୍ଜାମ ଯୁଗ୍ମ ଭାବେ ତୃତୀୟ ସ୍ଥାନ ଅକ୍ତିଆର କରିଛନ୍ତି । ପ୍ରତ୍ୟେକ ଚମ୍ପିୟନ ଟିମକୁ ୩୦ ହଜାର ଟଙ୍କା, ରନର୍ସ ଅପ ମାନଙ୍କୁ ୨୦ ହଜାର, ତୃତୀୟ ସ୍ଥାନ ନିମନ୍ତେ ୧୫ ହଜାର ଟଙ୍କା ସହ ଟ୍ରଫି ପ୍ରଦାନ କରାଯାଇଛି । ପ୍ରତ୍ୟେକ ବିଭାଗରୁ ୩ ଜଣ ଶ୍ରେଷ୍ଠ ଖେଳାଳି ମାନଙ୍କୁ ପ୍ରତ୍ୟେକ ୩ ହଜାର ଟଙ୍କା ପୁରସ୍କାର ପ୍ରଦାନ କରାଯାଇଛି ।
ଅତିରିକ୍ତ ଜିଲ୍ଲାପାଳ ପ୍ରଦୀପ କୁମାର ସାହୁ, ଜିଲ୍ଲା କ୍ରୀଡ଼ାଧିକାରୀ ଚନ୍ଦନ କୁମାର ସାହୁ, ଜିଲ୍ଲା କ୍ରୀଡ଼ାସଂସଦ ସମ୍ପାଦକ ରବି ପ୍ରତିହାରୀ ପ୍ରମୁଖ କୋଚ ଏବଂ ଅଫିସିଆଲ ମାନଙ୍କୁ ସମ୍ବର୍ଦ୍ଧିତ କରିଥିଲେ । ଏହାସହ ଅତିରିକ୍ତ ଜିଲ୍ଲାପାଳ ରାଜସ୍ବ ସୁଭାଷ ଚନ୍ଦ୍ର ନାଥଶର୍ମା, ଜିଲ୍ଲା ଶିଶୁ ସୁରକ୍ଷା ଅଧିକାରୀ ମନୋଜ କୁମାର ତ୍ରିପାଠୀ ଖେଳାଳି, କବାଡ଼ି ପ୍ରଶିକ୍ଷିକା ସଂହିତା ଦାସ, ଜୁଡୋ ପ୍ରଶିକ୍ଷିକା ସବିତା ନନ୍ଦ ଓ ଟିମ ମାନଙ୍କୁ ସମ୍ବର୍ଦ୍ଧିତ କରିଥିଲେ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
